សេតវិមានថា ទាហានស៊ីឈ្នួលរុស្ស៊ីWagnerទិញអាវុធពីកូរ៉េខាងជើង
សហរដ្ឋអាមេរិកបានទម្លាយឱ្យដឹងនៅថ្ងៃព្រហស្បតិ៍ទី ២២ធ្នូនេះ អំពីសន្ទុះអំណាចរបស់ក្រុមទាហានស៊ីឈ្នួលរុស្ស៊ី វ៉ាកណែ។ បើតាមសេតវិមាន វ៉ាកណែ ដែលកំពុងជ្រោមជ្រែងធ្វើសង្គ្រាមលើសមរភូមិនៅអ៊ុយក្រែនទន្ទឹមនឹងកងកម្លាំងយោធារដ្ឋរុស្ស៊ី ចាប់ផ្តើមទទួលអាវុធពីកូរ៉េខាងជើង ជាបន្តបន្ទាប់។
ចុះផ្សាយនៅថ្ងៃ៖
ស្តាប់ - ០១:៥៥
ក្រុមទាហានស៊ីឈ្នួលវ៉ាកណែបានបង់លុយរួច កូរ៉េខាងជើងបានផ្តើមបញ្ជូនសព្វាវុធមកឱ្យ កាលពីខែមុន នូវ គ្រាប់កាំភ្លើងធំ និងមីស៊ីល។ ហើយ ព្យុងយ៉ាង គ្រោងនឹងផ្តល់ អាវុធយុទ្ធភណ្ឌកាន់តែច្រើនថែមទៀត មកឱ្យក្រុមទាហានឯកជនរុស្ស៊ី។ នេះបើតាមប្រសាសន៍របស់លោក John Kirbyអ្នកនាំពាក្យទីប្រឹក្សាសន្តិសុខជាតិ ក្នុងបទសម្ភាសន៍ជាមួយអ្នកសារព័ត៌មាន។
បើតាមអ្នកនាំពាក្យដដែលនេះ ក្រុមទាហានស៊ីឈ្នួលរុស្ស៊ី វ៉ាកណែ បានបញ្ជូនកម្លាំងប្រមាណ៥ម៉ឺននាក់ទៅប្រយុទ្ធនៅក្នុងប្រទេសអ៊ុយក្រែន ក្នុងនោះ១ម៉ឺននាក់ជាទាហានស៊ីឈ្នួល និងបួនម៉ឺននាក់ជាទាហានរើសយកមកពីពន្ធនាគារ។ ក្នុងមួយខែៗ អង្គភាពឯកជនវ៉ាកណែ បានចំណាយ១០០លានដុល្លារ សម្រាប់ធ្វើប្រតិបត្តិការនៅអ៊ុយក្រែន។
យោធារុស្ស៊ីរំពឹងលើក្រុមវ៉ាកណែក្នុងការដឹកនាំប្រយុទ្ធនៅលើសមរភូមិជាច្រើន នៅអ៊ុយក្រែន មានជាអាទិ៍សមរភូមិនៅដុនបាស ហើយក្នុងករណីជាក់ស្តែងខ្លះ នាយទាហាននៃកងកម្លាំងជាតិរុស្ស៊ី ត្រូវស្ថិតនៅក្រោមការបញ្ជារបស់វ៉ាកណែផង។ នេះបើតាមការលម្អិតរបស់លោក ចន គៀប៊ី ដែលអះអាងបញ្ជាក់ទៀតថា កងទាហានឯកជនវ៉ាកណែ មិនសូវមានអាវុធនិងគ្មានការបង្វឹកត្រឹមត្រូវ ទើបត្រូវបាត់បង់យ៉ាងធ្ងន់ធ្ងរលើសមរភូមិ។ តាមការប៉ាន់ប្រមាណ មានយ៉ាងហោចទាហានវ៉ាកណែ១ពាន់នាក់បានស្លាប់នៅអ៊ុយក្រែន នារយៈពេលថ្មីៗ កន្លងមកនេះ។
ប៉ុន្តែ មេដឹកនាំអង្គភាពវ៉ាកណែ អេវហ្គេនី ព្រីហ្គោហ្ស៊ីន Evgueni Prigojine កំពុងឡើងឥទ្ធិពលកាន់តែ ខ្លាំងនៅវិមានក្រេមឡាំង។ ជាមនុស្សគ្មានមេត្តា ធ្លាប់បញ្ជូនទាហានទៅកាប់សម្លាប់មនុស្ស នៅស៊ីរី លីប៊ី ឬនៅអាហ្វ្រិកកណ្តាល និងថ្មីៗ នៅសមរភូមិបាក់ម៉ូតរបស់អ៊ុយក្រែន ព្រីហ្កោហ្ស៊ីន គិតតែម្យ៉ាងគឺពង្រីកឥទ្ធិពលខ្លួន និងយកចិត្តប្រធានាធិបតីរុស្ស៊ី ពូទីន។ នេះបើតាមសេចក្តីប្រកាសរបស់អ្នកនាំពាក្យទីប្រឹក្សាសន្តិសុខជាតិអាមេរិកដដែល។
វ៉ាស៊ីនតោនបានដាក់ទណ្ឌកម្មប្រឆាំងអង្គភាពវ៉ាកណែពីបទលូកដៃក្នុងជម្លោះផ្សេងនៅលើពិភពលោក ហើយនឹងបន្ថែមទណ្ឌកម្មថ្មីទៀត នៅសប្តាហ៍ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ