រដ្ឋសភាក្រោមការគ្រប់គ្រងរបស់បក្សសាធារណរដ្ឋនឹងទៅបង្កឧបសគ្គអ្វីខ្លះដល់រដ្ឋបាលចូ បៃដិន?
ចុះផ្សាយនៅថ្ងៃ៖
ស្តាប់ - ០៧:៤៤
នៅសហរដ្ឋអាមេរិក នៅជិត២ខែក្រោយការបោះឆ្នោតពាក់កណ្តាលអាណត្តិ សភាចាប់ផ្តើមនីតិកាលថ្មី នៅថ្ងៃអង្គារទី ៣មករា ជាមួយការចូលគ្រប់គ្រងរបស់គណបក្សសាធារណដ្ឋនៅសភាអ្នកតំណាងរាស្រ្ត ឬរដ្ឋសភា។ នៅពេលរដ្ឋសភាធ្លាក់ក្នុងដៃរបស់គណបក្សប្រឆាំង រដ្ឋបាលរបស់លោកចូ បៃដិននៅមានសង្ឃឹមខ្លះ ព្រោះថា ព្រឹទ្ធសភានៅបន្តស្ថិតក្រោមការកាន់កាប់របស់គណបក្សប្រជាធិបតេយ្យរបស់លោក។ មានអំណាចគ្រប់គ្រងរដ្ឋសភា តើបក្សសាធារណរដ្ឋដែលជាបក្សប្រឆាំងនឹងទៅបង្កឧបសគ្គអ្វីខ្លះ ដល់រដ្ឋបាលលោកចូ បៃដិន?
បន្ទាប់ពីបណ្តោយឲ្យសភាធ្លាក់ក្នុងកណ្តាប់ដៃគ្រប់គ្រងទាំងស្រុងរបស់គណបក្សកាន់អំណាចចំនួន២ឆ្នាំ គណបក្សប្រឆាំង បក្សសាធារណរដ្ឋដែលទទួលជ័យជំនះនៅក្នុងការបោះឆ្នោតកណ្តាលអាណត្តិ កាលពីខែវិច្ឆិកាកន្លងទៅ បានត្រលប់មកគ្រប់គ្រងសភាអ្នកតំណាងរាស្រ្ត ឬរដ្ឋសភាអាមេរិក ជាមួយពិធីស្បថចូលកាន់តំណែង នៅថ្ងៃអង្គារនេះ។គណបក្សប្រឆាំង បក្សសាធារណរដ្ឋមិនចង់ខាតពេលវេលាសូម្បីបន្តិច។ តាំងពីប៉ុន្មានថ្ងៃមុនពិធីស្បថចូលកាន់តំណែងនៅសភាអាមេរិក នៅថ្ងៃអង្គារនេះ គណបក្សនេះ បានបញ្ចេញផ្សាយរួចហើយ កម្មវិធីនយោបាយ និងបញ្ហាអាទិភាពមួយចំនួន ដែលពួកគេគ្រោងនឹងធ្វើនៅនីតិកាលថ្មី។ នៅ ២សប្តាហ៍ដំបូង ពួកគចង់ឲ្យមានការជជែកពីសេចក្តីព្រាងច្បាប់ទាក់ទងនឹងបញ្ហាអន្តោប្រវេសន៍ ឧក្រិដ្ឋកម្ម ថាមពល និងសំណុំរឿងរំលូតកូនជាដើម។
ជារួម បក្សសាធារណរដ្ឋដែលមានសំឡេងភាគច្រើននៅរដ្ឋសភា គ្រោងនឹងពិភាក្សាអត្ថបទច្បាប់ចំនួន ៨។ ដំបូង ពួកគេចង់ឲ្យមានការអនុម័តច្បាប់ថ្មីដែលនឹងទៅហាមឃាត់ ប្រធានាធិបតី មិនឲ្យមានអំណាច ប្រើប្រាស់ប្រេងក្នុងស្តុកបម្រុងរបស់រដ្ឋ បើសិនប្រធានាធិបតីគ្មានផែនការច្បាស់លាស់ដើម្បីបង្កើនការផលិតប្រេងនៅតាមបណ្តារដ្ឋទេនោះ។ នៅឆ្នាំមុន បក្សសាធារណរដ្ឋធ្លាប់បានរិះគន់ខ្លាំងៗ រដ្ឋបាលលោកចូ បៃដិនដែលបានចេញក្រឹត្យបញ្ជាឲ្យគេប្រើប្រេងក្នុងស្តុកបម្រុងរបស់រដ្ឋ ដើម្បីដោះស្រាយវិបត្តិថាមពលឡើងថ្លៃ ប៉ុន្តែ ដោយគ្មានផែនការបង្កើនការផលិតប្រេងបន្ថែម ដើម្បីធានាសុវត្ថិភាពថាមពលរបស់អាមេរិក។
ដោយមានសំឡេងភាគច្រើន កាន់កាប់រដ្ឋសភា គណបក្សសាធារណរដ្ឋប្រុងនឹងបង្កើតផងដែរច្បាប់ដែលនឹងទៅរឹតបន្តឹងបញ្ហាជនអន្តោប្រវេសន៍ ដែលកំពុងក្លាយជាវិបត្តិកាន់តែធ្ងន់ធ្ងរ ជាពិសេសនៅព្រំដែនជាមួយប្រទេសម៉ិកស៊ិក។
គណបក្សប្រឆាំង ចូលគ្រប់គ្រងរដ្ឋសភា នឹងអាចជាបញ្ហាចោទសម្រាប់រដ្ឋបាលលោកចូ បៃដិន?
នៅ២ឆ្នាំដំបូងនៃការចូលកាន់អំណាច លោកប្រធានាធិបតីចូ បៃដិនបានដឹកនាំអាមេរិក ដោយគ្មានជួបឧបសគ្គ ព្រោះថា សភាទាំងពីរថ្នាក់ ទាំងសភាអ្នកតំណាងរាស្រ្ត និងព្រឹទ្ធសភា ស្ថិតនៅក្រោមការគ្រប់គ្រងរបស់គណបក្សប្រជាធិបតេយ្យរបស់លោក។ មានច្បាប់មួយចំនួន ដែលរដ្ឋបាលរបស់លោកស្នើឡើង ហើយត្រូវបានបោះឆ្នោតគាំទ្រ ដោយគ្មានជួបការលំបាក ដូចជាច្បាប់ស្តីពីការស្តារអភិវឌ្ឍហេដ្ឋារចនាសម្ព័ន្ធអាមេរិកដែលមានតម្លៃរាប់ពាន់លានដុល្លារ។ មុនពេលដែលរដ្ឋសភាធ្លាក់ក្រោមការគ្រប់គ្រងរបស់គណបក្សសាធារណរដ្ឋ រដ្ឋបាលលោកចូ បៃដិនបានឆ្លៀតឲ្យសភាទាំងពីរថ្នាក់ ដែលនៅគ្រប់គ្រងដោយគណបក្សប្រជាធិបតេយ្យរបស់លោក បោះឆ្នោត អនុម័តលើច្បាប់ថវិកាជាតិ ១.៧ទ្រីលានដុល្លារសម្រាប់ដំណើរការរដ្ឋសហព័ន្ធពីពេលនេះ រហូតដល់ខែកញ្ញាឆ្នាំ ២០២៣។
ប៉ុន្តែ ជាមួយគណបក្សប្រឆាំង បក្សសាធារណរដ្ឋចូលគ្រប់គ្រងរដ្ឋសភា នៅពាក់កណ្តាលអាណត្តិយ៉ាងដូច្នេះ លោកចូ បៃដិនលែងសង្ឃឹមថា នឹងអាចបង្កើតច្បាប់សំខាន់ៗដូចមុន ដូចជាច្បាប់ដើម្បីផ្តល់ជំនួយដល់ប្រទេសអ៊ុយក្រែនជាដើម។
ចាប់តាំងពីសង្រ្គាមរុស្ស៊ីឈ្លានពានអ៊ុយក្រែន រដ្ឋបាលលោកចូ បៃដិន បានជំរុញឲ្យសភាអាមេរិក ដែលស្ថិតក្រោមការគ្រប់គ្រងរបស់បក្សប្រជាធិបតេយ្យ និងដោយមានការចូលរួមពីសមាជិកមួយចំនួនរបស់បក្សប្រឆាំង បោះឆ្នោតអនុម័តកញ្ចប់ថវិកា ១១០ពាន់លានដុល្លារ សម្រាប់ជំនួយយោធា សេដ្ឋកិច្ចនិងជំនួយមនុស្សធម៌នៅអ៊ុយក្រែន។ ប៉ុន្តែ រដ្ឋបាលអាមេរិកពិបាកនឹងអាចរដ្ឋសភាថ្មីបោះឆ្នោតលើកញ្ចប់ថវិកាថ្មីសម្រាប់អ៊ុយក្រែន ព្រោះថា គណបក្សសាធារណរដ្ឋបាននិយាយហើយថា គេនឹងមិនព្រមផ្តល់ជំនួយថ្មីដល់អ៊ុយក្រែន ដោយទទេៗ និងងាយស្រួលៗទៀតនោះទេ។
មានសំឡេងភាគច្រើននៅរដ្ឋសភា គណបក្សសាធារណរដ្ឋនឹងទៅរារាំងផែនការរបស់លោកចូ បៃដិនដែលចង់បង្កើតច្បាប់ហាមការប្រើប្រាស់អាវុធស្វ័យប្រវត្តិ និងការប៉ុនប៉ងរបស់លោកបៃដិន ដើម្បីធ្វើកំណែទម្រង់ច្បាប់បោះឆ្នោតដើម្បីការពារសិទ្ធិរបស់ប្រជាជនភាគតិចអាមេរិក។ ម្យ៉ាងទៀត ការសន្យារបស់លោកដើម្បីបង្កើតច្បាប់សហព័ន្ធស្តីពីសិទ្ធិរំលូតកូននឹងត្រូវរលាយដូចអំបិលត្រូវទឹក ព្រោះថាសមាជិករបស់បក្សសាធារណរដ្ឋមួយចំនួនដែលមាននិន្នាការអភិរក្សនិយមជ្រុល ធ្លាប់ចេញមុខប្រឆាំង មិនចង់ឲ្យមានការរំលូតកូននៅអាមេរិក។
ក្រៅពីដាក់ជើងខ្ទាស់ មិនឲ្យគណបក្សកាន់អំណាចអាចសម្រេចបង្កើតច្បាប់ដោយស្រួលៗហើយនោះ គណបក្សប្រឆាំង បក្សសាធារណរដ្ឋដែលនឹងមានសិទ្ធិដឹកនាំគណៈកម្មការមួយចំនួននៅរដ្ឋសភា នឹងអាចមានអំណាច បើកការស៊ើបអង្កេត កោះហៅសាក្សី ទាមទារឲ្យគេផ្តល់ឯកសារភស្តុតាង។ គណបក្សសាធារណរដ្ឋធ្លាប់បានសន្យាហើយថា នឹងបើកការស៊ើបអង្កេតស៊ីជម្រៅទៅលើការគ្រប់គ្រងរបស់រដ្ឋបាលលោកចូ បៃដិនលើវិបត្តិកូវីដ និងយុទ្ធសាស្រ្តរបស់លោកចូ បៃដិន ក្នុងការបញ្ជាដកទ័ពចេញពីអាហ្វហ្កានីស្ថាន។ បក្សសាធារណរដ្ឋបានសន្យាដែរថា នឹងប្រើអំណាចរបស់ខ្លួននៅ រដ្ឋសភា ដើម្បីបើកការស៊ើបអង្កេតលើលោកចូ ហាន់ធ័រ កូនប្រុសរបស់លោកចូ បៃដិន ដែលពួកគេចោទថាបានប្រើប្រាស់ឈ្មោះឪពុកដើម្បីធ្វើជំនួញទាញប្រយោជន៍នៅអ៊ុយក្រែន និងនៅចិន។
បក្សសាធារណរដ្ឋបែកបាក់គ្នាខ្លាំង
ចូលកាន់កាប់បានរដ្ឋសភាអាមេរិក ប៉ុន្តែ គណបក្សសាធារណរដ្ឋនៅមិនទាន់មានអំណាចខ្លាំងដើម្បីទៅបង្កការរាំងស្ទះខ្លាំងដល់កម្មវិធីនយោបាយរបស់លោកប្រធានាធិបតីចូ បៃដិន នោះទេ ព្រោះថា អំណាចខ្លាំងមួយទៀត របស់អាមេរិក គឺព្រឹទ្ធសភានៅតែបន្តស្ថិតក្នុងដៃរបស់គណបក្សរបស់លោកចូ បៃដិននៅឡើយ។
ម្យ៉ាង ទោះចូលគ្រប់គ្រងរដ្ឋសភា ប៉ុន្តែ គណបក្សសាធារណរដ្ឋលើកនេះ មិនសូវជារួបរួមគ្នាខ្លាំងនោះទេ។ រហូតមកដល់ថ្ងៃនេះ សមាជិករបស់បក្សនៅតែមិនទាន់ចុះសម្រុងគ្នា លើបេក្ខជនដែលត្រូវតំណាងបក្ស និងត្រូវធ្វើជាប្រធានរដ្ឋសភា។
ជាក់ស្តែង លោកKevin McCarthy អាយុ ៥៧ឆ្នាំ ជាបេក្ខជននាំមុខសម្រាប់តំណែងប្រធានសភាអ្នកតំណាងរាស្រ្ត ប៉ុន្តែ សមាជិកបក្សសាធារណរដ្ឋដែលមាននិន្នាការអភិរក្សនិយមមួយចំនួន ដែលជាគ្នីគ្នារបស់អតីតប្រធានាធិបតីដូណាល់ ត្រាំ បាននិយាយថា ពួកគេនឹងមិនបោះឆ្នោតគាំទ្រឲ្យលោក McCarthy អាចក្លាយជាប្រធានរដ្ឋសភានោះទេ។ ក្រុមអភិរក្សនិយមជ្រុល របស់បក្សសាធារណរដ្ឋបានចោទលោកMcCarthy ថា មិនសូវមានជំហររឹងមាំ ការពារលោកដូណាល់ ត្រាំ និងតែងមានជំហរទន់ភ្លន់ ដែលអនុញ្ញាតឲ្យបក្សប្រជាធិបតេយ្យអាចបញ្ចេញច្បាប់តាមការចង់បានរបស់រដ្ឋបាលលោកចូ បៃដិន។
មួយវិញទៀតដែរ នៅរដ្ឋសភា គណបក្សសាធារណមានសំឡេងច្រើន លើសគណបក្សប្រជាធិបតេយ្យតែប៉ុន្មានសំឡេងប៉ុណ្ណោះ។ គណបក្សសាធារណរដ្ឋទទួលបានអាសនៈ២២២ ចំណែកគណក្សប្រជាធិបតេយ្យបាន ២១៣។ ដោយសារតែគណបក្សសាធារណរដ្ឋមានសំឡេងភាគច្រើន ប៉ុន្តែស្តួចស្តើង និងដោយសារតែមានការបែកបាក់គ្នាផង នៅក្នុងចំណោមសមាជិករបស់បក្សសាធារណរដ្ឋ រវាងក្រុមអភិរក្សនិយមខ្លាំង និងក្រុមមិនសូវស្តាំនិយមខ្លាំង បក្សកាន់អំណាច គណបក្សប្រជាធិបតេយ្យ សង្ឃឹមថា គេនឹងអាចទាក់ទាញយកតែប៉ុន្មានសំឡេងបន្ថែមពីគណបក្សសាធារណរដ្ឋតែប៉ុណ្ណោះ គឺនឹងអាចអនុម័តច្បាប់បានហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ