សហរដ្ឋអាមេរិក ៖គណបក្សប្រជាធិបតេយ្យ បន្តគ្រប់គ្រងព្រឹទ្ធសភាបន្ទាប់ពីបានឈ្នះនៅរដ្ឋNevada
ជាជោគជ័យថ្មីសម្រាប់លោកចូបៃដិន ក្នុងការបន្តដឹកនាំប្រទេស និងជាបរាជ័យដ៏ជូរចត់សម្រាប់បក្សសាធារណរដ្ឋរបស់ក្រុមលោកដូណាល់ ត្រាំ។ នៅថ្ងៃទី ១២វិច្ឆិកាម្សិលមិញ សារព័ត៌មានអាមេរិកបានប្រកាសផ្តល់ជ័យជំនះដល់សមាជិកព្រឹទ្ធសភាបក្សប្រជាធិបតេយ្យ លោកស្រី Catherine Cortez Masto នៅរដ្ឋនេវ៉ាដា។ ជាអាសនៈថ្មីមួយដែលមកបង្គ្រប់ ឱ្យបក្សប្រជាធិបតេយ្យមានសំឡេងភាគច្រើនគ្រប់គ្រាន់ នៅព្រឹទ្ធសភា។
ចុះផ្សាយនៅថ្ងៃ៖
ស្តាប់ - ០១:៤៣
បួនថ្ងៃក្រោយការបោះឆ្នោតពាក់កណ្តាលអាណត្តិ លទ្ធផលបានបង្ហាញកាន់ជាក់ច្បាស់។ ជាមួយនឹងជោគជ័យនៅរដ្ឋនេវ៉ាដា បក្សប្រជាធិបតេយ្យមានអាសនៈសរុបនៅក្នុងព្រឹទ្ធសភាចំនួន ៥០ លើ១០០។ ដូច្នេះគណបក្សរបស់លោកចូបៃដិន នឹងបន្តដឹកនាំសភាជាន់ខ្ពស់ ព្រោះតាមរដ្ឋធម្មនុញ្ញ អនុប្រធានាធិបតីខាម៉ាឡា ហារីស ជាមានអំណាចសម្រេច អារកាត់សេចក្តីនៅក្នុងព្រឹទ្ធសភា។
ម្យ៉ាងទៀត បក្សប្រជាធិបតេយ្យ អាចនឹងទទួលបានអាសនៈព្រឹទ្ធសភាមួយបន្ថែមទៀត នៅក្នុងរដ្ឋចចជី ដែលត្រូវរៀបចំការបោះឆ្នោតជុំទីពីរនៅថ្ងៃទី ៦ ធ្នូ។
ប្រធានព្រឹទ្ធសភាផុតអាណត្តិបក្សប្រជាធិបតេយ្យ លោក Chuck Schumer បានបញ្ចេញប្រតិកម្មអបអរក្រោយការប្រកាសលទ្ធផលតែប៉ុន្មាននាទី ដោយឆ្លៀតវាយប្រហារដោយផ្ទាល់លើក្រុមអ្នកសាធារណរដ្ឋនិងក្រុមការពារលោកដូណាល់ត្រាំ ថា ប្រជាពលរដ្ឋអាមេរិកច្រានចោលយ៉ាងច្បាស់ក្រលែតនយោបាយបែបប្រេះឆា ប្រឆាំងនឹងលទ្ធិប្រជាធិបតេយ្យ ផ្តាច់ការ និងកាចរបស់ក្រុមអ្នកសាធារណរដ្ឋត្រាំនិយម។
ខុសពីការរំពឹងទុក ដែលតាមទម្លាប់បក្សកាន់អំណាចមិនសូវគ្មានប្រៀបសោះក្នុងការបោះឆ្នោតពាក់កណ្តាលអាណត្តិ បក្សសាធារណរដ្ឋបានទទួលជោគជ័យ យ៉ាងមានកំរិតបំផុត។ បក្សសាធារណរដ្ឋ មានសំឡេងភាគច្រើន និងឡើងគ្រប់គ្រងសភាវិញ ដោយអាចចាប់រៀបចំអង្កេតសភាជាច្រើនប្រឆាំងនឹងរដ្ឋបាលលោកចូបៃដិននិងក្រុមជំនិត។ ប៉ុន្តែគ្មានសំឡេងភាគច្រើននៅព្រឹទ្ធសភា ពួកគេមិនអាចអនុម័តច្បាប់អ្វីចេញ មានជាអាទិ៍ច្បាប់ស្តីពីការរម្លូតកូន ឬច្បាប់អាកាសធាតុ ដូចបំណងទេ ហើយក៏មិនអាចរារាំងការតែងតាំងចៅក្រម ឯកអគ្គរដ្ឋទូត និងអ្នកទទួលខុសត្រូវក្នុងរដ្ឋាភិបាលដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ