អាមេរិក៖អន្តោប្រវេសន៍ និងប្រយុទ្ធប្រឆាំងគ្រឿងញៀនជាប្រធានបទនៃទស្សនកិច្ចរបស់លោកបៃដិននៅម៉ិកស៊ិក
ចុះផ្សាយនៅថ្ងៃ៖
ស្តាប់ - ០៧:០១
នៅថ្ងៃអាទិត្យ ទី៨ មករានេះ ប្រធានាធិបតីអាមេរិកលោកចូ បៃដិនផ្តើមទស្សនកិច្ចផ្លូវការលើកទី១ នៅក្នុងប្រទេសម៉ិកស៊ិក។ អន្តោប្រវេសន៍ គ្រឿងញៀន និងការប្រែប្រួលអាកាសធាតុជាប្រធានបទស្នូលនៃទស្សនកិច្ចរបស់លោកបៃដិននៅម៉ិកស៊ិក។ គួរបញ្ជាក់ថា ក្រៅពីជាដៃគូចម្បងរបស់អាមេរិក ម៉ិកស៊ិកក៏កំពុងធ្វើឲ្យអាមេរិកឈឺក្បាលខ្លាំងនឹងលំហូរជនអន្តោប្រវេសន៍ខុសច្បាប់ និងគ្រឿងញៀន ពិសេសថ្នាំញៀនសំយោគមរណៈឈ្មោះ fentanyl។
ទស្សនកិច្ចផ្លូវការលើកទី១ របស់លោកបៃដិននៅម៉ិកស៊ិកចាប់ផ្តើមក្នុងថ្ងៃអាទិត្យ ទី៨ មករា។ តែមុននឹងឆ្លងចូលទឹកដីម៉ិកស៊ិក លោកបៃដិនបានធ្វើដំណើរទៅកាន់ស្រុក El Paso ដែលស្ថិតនៅប៉ែកខាងត្បូងរដ្ឋ Texas។ ជម្រើសទៅកាន់ស្រុក El Paso របស់លោកបៃដិនមិនមែនជាជម្រើសចៃដន្យទេ ព្រោះទី១ ស្រុកនេះមានខ្សែព្រំដែនជាប់ជាមួយប្រទេសម៉ិកស៊ិក ហើយខ្សែព្រំដែនជាប់គ្នារវាងប្រទេសទាំងពីរមានប្រវែងដល់ទៅ ៣ ១០០គីឡូម៉ែត្រ និងទី២ ការធ្វើដំណើរទៅកាន់ស្រុក El Paso របស់លោកបៃដិនមានគោលដៅរំងាប់ការរិះគន់របស់ក្រុមប្រឆាំងដែលថា លោកបៃដិនមិនដែលបានដាក់ជើងជាន់នៅតាមព្រំដែនជាមួយម៉ិកស៊ិកក្នុងរយៈពេលនៃកាន់តំណែងចំនួន ២ឆ្នាំកន្លងទៅ។
បន្ទាប់មក គឺនៅថ្ងៃចន្ទ ទី៩ មករាទើបលោកបៃដិនធ្វើដំណើរទៅកាន់ក្រុងម៉ិកស៊ីកូដើម្បីជួបសមភាគីម៉ិកស៊ិកលោកអង់ដ្រេ ម៉ានុយអែល ឡូប៉េ អូប្រាដ័រ។ បន្ទាប់មកទៀតនៅថ្ងៃអង្គារ ទី១០ មករា លោកបៃដិននឹងចូលរួមនៅក្នុងកិច្ចប្រជុំកំពូលត្រីភាគីអាមរិក ម៉ិកស៊ិក និងកាណាដាដោយមានវត្តមាននាយករដ្ឋមន្រ្តីកាណាដាផ្ទាល់លោកហ្សូសស្តាំង ទ្រុយដូ។ គួររម្លឹកថា កិច្ចប្រជុំកំពូលត្រីភាគីអាមរិក ម៉ិកស៊ិក និងកាណាដានេះទើបត្រូវបានលោកបៃដិនរៀបចំឲ្យមានឡើងវិញក្នុងឆ្នាំ ២០២១ ក្រោយពីអតីតប្រធានាធិបតីអាមេរិកលោកដូណាល់ ត្រាំបានលុបចោលក្នុងឆ្នាំ ២០១៦។
អន្តោប្រវេសន៍កំពុងបន្តជារឿងស្មុកស្មាញរវាងអាមេរិក និងម៉ិកស៊ិក
នៅសឹងគ្រប់រដ្ឋបាលអាមេរិកទាំងអស់ មិនថារូបប្រធានាធិបតីចេញមកពីគណបក្សប្រជាធិបតេយ្យ ឬគណបក្សសាធារណរដ្ឋទេ អន្តោប្រវេសន៍បាន កំពុង និងបន្តជាឆ្អឹងទទឹង ក រវាងប្រទេសជិតខាងទាំងពីរ និងពេលខ្លះបានបង្កឲ្យមានភាពចម្រូងចម្រាសខ្លាំងរវាងគ្នាទៀតផង។ គេពិតជានៅចាំបានមិនភ្លេចនៅក្នុងជំនាន់ប្រធានាធិបតីអាមេរិកលោកដូណាល់ ត្រាំ លោកត្រាំបានសម្រេចសាងសង់ជញ្ជាំងប្រវែង ១ ៦០០គីឡូម៉ែត្រនៅតាមព្រំដែនជាមួយម៉ិកស៊ិកដើម្បីទប់លំហូរជនអន្តោប្រវេសន៍ខុសច្បាប់។ ទីបំផុត មានជញ្ជាំងប្រវែងប្រមាណតែជាង ៧០០គីឡូម៉ែត្រដែលបានសាងសង់រួច ព្រោះលោកបៃដិនបានបញ្ឈប់ការសាងសង់នោះវិញក្នុងខែមករា ឆ្នាំ ២០២១ នៅពេលលោកចូលកាន់តំណែង។
តែទោះជាយ៉ាងនេះក្តី ច្បាប់ក្នុងការបណ្តេញជនអន្តោប្រវេសន៍ឆ្លងព្រំដែនម៉ិកស៊ិកចូលអាមេរិកដែលលោកត្រាំបានអនុម័តក្នុងសម័យកូវីដ១៩កំពុងបន្តអនុវត្តមកដល់សព្វថ្ងៃ។ ថ្មីៗនេះ តុលាការកំពូលបានសម្រេចឲ្យបន្តអនុវត្តច្បាប់មួយនេះ ខណៈដែលលោកបៃដិនកំពុងគិតគូរពីគម្រោងកំណែទម្រង់ទ្រង់ទ្រាយធំលើបញ្ហាអន្តោប្រវេសន៍។ គួរបញ្ជាក់ថា គ្រាន់តែក្នុងឆ្នាំ ២០២២ មានការឃាត់ខ្លួនជនអន្តោប្រវេសន៍ខុសច្បាស់នៅព្រំដែនម៉ិកស៊ិកជាង ២លាននាក់ ហើយសព្វថ្ងៃនេះ លំហូរហាក់មិនបានស្ងប់ស្ងាត់ទេ។
ដូច្នេះវាជារឿងបន្ទាន់បំផុតដែលលោកបៃដិនត្រូវរិះរកដំណោះស្រាយឲ្យបានឆាប់បំផុត ប្រសិនបើលោកចង់ឈរឈ្មោះអាណត្តិថ្មី។ ចូរកុំភ្លេចថា ប្រធានរឿងអន្តោប្រវេសន៍ជាអាវុធនយោបាយមួយដែលក្រុមអ្នកសាធារណរដ្ឋប្រើដើម្បីប្រឆាំងនឹងក្រុមអ្នកប្រជាធិបតេយ្យក្នុងរយៈពេលនៃការកាន់តំណែងរបស់លោកបៃដិនចំនួន ២ឆ្នាំកន្លងទៅនេះ។
ថ្នាំញៀន fentanyl ជាសោកនាដកម្មនៅអាមេរិក
ប្រធានរឿងក្តៅ និងចម្រូងចម្រាសមួយទៀតរវាងអាមេរិក និងម៉ិកស៊ិក គឺទាក់ទងនឹងគ្រឿងញៀន ពិសេសសារធាតុញៀនឈ្មោះ fentanyl ដែលកំពុងបង្កសោកនាដកម្មខ្លាំងនៅអាមេរិក។ Fentanyl ជាថ្នាំញៀនសំយោគមរណៈដែលត្រូវបានពួកជួញដូរគ្រឿងញៀនលាយផ្សំជាមួយនឹងថ្នាំញៀនផ្សេងទៀត ពិសេសសារធាតុគីមីមកពីចិនដើម្បីបង្កើនឥទ្ធិពល និងធ្វើឲ្យអ្នកប្រើប្រាស់កាន់តែញៀនខ្លាំងជាងថ្នាំញៀនផ្សេងទៀត។ Fentanyl ដែលមានឥទ្ធិពលពី ៣០ដងទៅ ៥០ដងខ្លាំងជាងថ្នាំញៀនហេរ៉ូអ៊ីនត្រូវបានផលិត ចែកចាយ និងគ្រប់គ្រងដោយក្រុមជួញដូរគ្រឿងញៀនជនជាតិម៉ិកស៊ិក។
ជារៀងរាល់ឆ្នាំនៅអាមេរិក មានអ្នកស្លាប់ដោយប្រើថ្នាំញៀន fentanyl ច្រើនខ្លាំងណាស់។ ជាក់ស្តែងក្នុងឆ្នាំ ២០២១ ចំនួនអ្នកស្លាប់ដោយប្រើគ្រឿងញៀនលើសកម្រិតទាំង ១០៨ ០០០នាក់ មាន ២ភាគ៣ស្លាប់ដោយប្រើថ្នាំញៀន fentanyl។ យោងតាមទីភ្នាក់ងារប្រយុទ្ធប្រឆាំងគ្រឿងញៀននៅអាមេរិក បរិមាណថ្នាំញៀន fentanyl ដែលរឹបអូសបានក្នុងឆ្នាំ ២០២២ មានចំនួនច្រើនជាងចំនួនដែលគ្រប់គ្រាន់ដើម្បីសម្លាប់ពលរដ្ឋអាមេរិកទាំងអស់ទៅទៀត។ នេះ ស បញ្ជាក់ឲ្យឃើញពីលំហូរ Fentanyl ចូលអាមេរិកយ៉ាងច្រើនសម្បើមដែលមិនអាចគ្រប់គ្រងបាន។
ដូច្នេះ នេះជាប្រធានរឿងបន្ទាន់មួយដែលលោកបៃដិនត្រូវជជែកជាមួយសមភាគីម៉ិកស៊ិកដើម្បីរកវិធានការទប់ស្កាត់។ ក្រៅពីអន្តោប្រវេសន៍ និងគ្រឿងញៀនដែលជាប្រធានបទក្តៅ និងរសើប នៅមានរឿងការប្រែប្រួលអាកាសធាតុ។ ការនិយាយរឿងនេះក៏ដោយសារនៅក្នុងសន្និសីទអន្តរជាតិស្តីពីអាកាសធាតុ COP២៧ រៀបចំក្នុងប្រទេសអេហ្ស៊ីបក្នុងឆ្នាំ ២០២២ អាមេរិក និងម៉ិកស៊ិកបានប្រកាសនូវគម្រោងវិនិយោគលើថាមពលបៃតងដែលមានទឹកប្រាក់ ៤៨ ០០០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ