ចំនួនប្រជាជនចិនធ្លាក់ចុះ ជាលើកទី១ នៅក្នុងរយៈពេល ៦០ឆ្នាំ
ចុះផ្សាយនៅថ្ងៃ៖
ស្តាប់ - ០៦:៥០
ចិន ប្រទេសដែលមានប្រជាជនច្រើនជាងគេ នៅក្នុងពិភពលោកបានស្គាល់ការធ្លាក់ថយចុះ ចំនួនប្រជាជន ជាលើកទី១ នៅក្នុងរយៈពេល៦០ឆ្នាំមកនេះ។ តាមតួលេខផ្លូវការ ការិយាល័យស្ថិតិ ជាតិចិន ចុះផ្សាយនៅថ្ងៃអង្គារទី១៧ មករា ចំនួនប្រជាជនជនចិនបានធ្លាក់ថយចុះអស់ ៨សែន ៥ម៉ឺននាក់ នៅឆ្នាំ ២០២២។ ចំនួនប្រជាជនធ្លាក់ថយចុះហើយ ចិននៅឆ្នាំ ២០២២ ក៏មានកំណើនសេដ្ឋកិច្ច តែ ៣% គឺធ្លាក់ចុះទាប ជាងការព្យាករទុករបស់រដ្ឋាភិបាល។ តើការធ្លាក់ថយចុះចំនួនប្រជាជន ជាសញ្ញានៃការធ្លាក់ចុះ សេដ្ឋកិច្ចរបស់មហាយក្សចិន? វិបត្តិប្រជាសាស្រ្តនឹងជះផលអាក្រក់អ្វីខ្លះលើសេដ្ឋកិច្ចចិន និងសេដ្ឋកិច្ចពិភពលោក
ការិយាល័យស្ថិតិជាតិចិនបានចេញផ្សាយតួលេខផ្លូវការនៅថ្ងៃអង្គារ ដែលថា ចំនួនប្រជាជនចិនបានធ្លាក់ចុះ អស់៨សែន ៥ម៉ឺននាក់ នៅឆ្នាំ ២០២២។ នៅប្រទេសចិន ផ្ទុយពីការសង្ឃឹមគិតទុករបស់រដ្ឋអំណាច កំណើតទារកគឺបានចាប់ផ្តើមថយធ្លាក់ចុះ តាំងពីពេលគេបិទបញ្ចប់នយោបាយកូនទោល។ ជាក់ស្តែង អត្រាកំណើតទារកបានធ្លាក់ចុះ ៤ឆ្នាំ ជាប់ៗគ្នា គិតចាប់តាំងពីឆ្នាំ ២០១៩។ ក្នុងឆ្នាំ ២០១៩ ចំនួនកំណើតទារកមាន ១៤លាន ៦សែន ៥ម៉ឺននាក់។ នៅឆ្នាំ ២០២០ កំណើតទារកមានត្រឹម ១២លាននាក់ បន្ទាប់មកគឺ ជាង ១០លាននាក់ (១០លាន ៦សែន ២ម៉ឺននាក់) ក្នុងឆ្នាំ ២០២១។ នៅឆ្នាំ ២០២២ កំណើតទារកក៏បានបន្តធ្លាក់ចុះ អស់១លាន ទៀត មកនៅត្រឹម ៩លាន ៥សែននាក់។
ទោះ រដ្ឋបិទបញ្ចប់នយោបាយកូនទោល និងលើកទឹកចិត្ត ឲ្យគ្រួសារមានកូនដល់ទៅ ៣នាក់ មែនប៉ុន្តែ អត្រាកំណើតទារកនៅតែធ្លាក់ថយចុះ។ ហេតុផលនោះគឺប្រជាជនចិននៅតែមានទម្លាប់មានកូនតិច។ ម្យ៉ាងដោយសារតែជីវភាពឡើងថ្លៃ ការចំណាយមានកាន់តែច្រើនសម្រាប់ការរស់នៅប្រចាំថ្ងៃ បូកផ្សំនឹងការចំណាយខ្ពស់សម្រាប់ការរៀនសូត្ររបស់កូនក្មេង គូស្រករវ័យក្មេងរបស់ចិន មិនប្រាថ្នាចង់បានកូនច្រើន ជាង១នាក់ ចំណែក ស្រ្តីចិនសម័យថ្មី ដែលបានរៀនសូត្រជ្រៅជ្រះ ធ្វើការកាន់តំណែងធំ រវល់នឹងមុខជំនួញ រឹតតែគ្មានពេលមកនឹកគិតចង់បង្កើតគ្រួសារ នៅផ្ទះមើលកូន ដូចស្រ្តីចិនជំនាន់មុន។
នៅឆ្នាំ ២០២២ ចិនមានកូនក្មេងកើត ជាង ៩លាន ៥សែននាក់ ប៉ុន្តែ ចំនួនមនុស្សស្លាប់ វិញ គឺមានដល់ទៅ ១០លាន ៤សែននាក់។ ដោយសារតែអត្រាកំណើតទារកមានតិចជាងអត្រាមរណៈ ទើបចិនមានចំនួនប្រជាជនធ្លាក់ចុះ អស់ ៨សែន ៥ម៉ឺននាក់។
របាយការណ៍អង្គការសហប្រជាជាតិ៖ ចិនដែលមានប្រជាជន១៤០០លាននាក់ នឹងត្រូវឥណ្ឌាវ៉ាដាច់ នៅឆ្នាំ ២០២៣
របាយការណ៍របស់អង្គការសហប្រជាជាតិ នៅចុងឆ្នាំ២០២២ បង្ហាញ ថា ជាមួយអត្រាកំណើនប្រជាជន នៅប្រទេសឥណ្ឌា និងការធ្លាក់ចុះនៃចំនួនកំណើតទារកនៅប្រទេសចិន នៅប៉ុន្មានឆ្នាំចុងក្រោយនេះ ឥណ្ឌានឹងអាចវ៉ាដាច់ចិន ដើម្បីក្លាយជាប្រទេសដែលមានប្រជាជនច្រើនជាងគេបំផុតនៅក្នុងពិភពលោក។ ត្រូវឥណ្ឌា វ៉ាដាច់ ចិនដែលមានប្រជាជនប្រមាណ ១ពាន់ ៤រយនាក់ ទំនងនឹងអាចមានប្រជាសាស្រ្តថេរ មិនកើន ហើយក៏មិនថយចុះ នៅពេលដែលចំនួនមនុស្សកើត ស្មើគ្នានឹងចំនួនមនុស្សស្លាប់។
ប៉ុន្តែ នៅពេលដែលការិយាល័យស្ថិតិចិន បង្ហាញ ចំនួនប្រជាជនធ្លាក់ចុះ អស់ជាង ៨សែននាក់ ដោយសារតែ ចំនួនមនុស្សស្លាប់ ច្រើនជាង ចំនួនកំណើតទារក គេក៏ត្រូវភ្ញាក់ផ្អើល ព្រោះថា នេះជាលើកទី១ នៅប្រវត្តិប្រទេសចិន នៅក្នុងរយៈពេល ៦០ឆ្នាំមកនេះ។ គេចាំបានថា ចំនួនប្រជាជនចិនបានធ្លាក់ចុះ នៅពេលចុងក្រោយបំផុត គឺនៅអំឡុងឆ្នាំ ១៩៦០ និងឆ្នាំ ១៩៦១ នៅពេលចិនជួបគ្រោះទុរ្ភិក្ស មនុស្សស្លាប់ដោយអត់បាយ ដោយសារតែនយោបាយខុសឆ្គងរបស់បក្សកុម្មុយនិស្ត។
បើតាមអ្នកជំនាញប្រជាសាស្រ្ត ការធ្លាក់ចុះ ចំនួនប្រជាជនចិន នឹងមានបន្តបន្ទាប់ ពីពេលនេះ រហូតដល់ចុងសវត្សរ៍។ តាមការចុះផ្សាយរបស់ទីភ្នាក់ងារ ព័ត៌មានបារាំង ដែលបានដកស្រង់ការសិក្សារបស់វិទ្យាស្ថានវិទ្យាសាស្រ្តសង្គមនៅទីក្រុងសៀងហៃ អត្រាថយចុះ នៃចំនួនប្រជាជនចិននឹងមានជាមធ្យម ប្រមាណ ១,១%ក្នុងមួយឆ្នាំៗ។
ដោយសារតែចំនួនប្រជាជនធ្លាក់ចុះជារៀងរាល់ឆ្នាំ អ្នកជំនាញប្រជាសាស្រ្តវាយតម្លៃថា ចិននឹងអាចមានប្រជាជនប្រមាណ ៥៧៨លាននាក់ប៉ុណ្ណោះ នៅឆ្នាំ ២១០០ គឺធ្លាក់ថយចុះ អស់ជិត ៨០០លាននាក់ ពីពេលនេះ ដល់ចុងសតវត្សរ៍។
តើការធ្លាក់ថយចុះ ចំនួនប្រជាជននឹងអាចជះផលវិបាកអ្វីខ្លះ ទៅលើសេដ្ឋកិច្ចចិន?
មានចំនួនប្រជាជនថយចុះ ចិនដែលកំពុងប្រឈមនឹងកំណើនមនុស្សចាស់ ហើយនិងការធ្លាក់ចុះនៃមនុស្សសកម្ម ត្រូវប្រឈមនឹងផលវិបាកពីរ គឺហានិភ័យនៃការធ្លាក់ចុះកំណើនសេដ្ឋកិច្ច និងកំណើនតម្រូវការថវិកាដើម្បីចិញ្ចឹមមនុស្សចាស់ ដែលមានកាន់តែច្រើនឡើងៗ។
នៅថ្ងៃអង្គារទី ១៧មករា ចិនទទួលដំណឹងអាក្រក់ផ្ទួនៗគ្នា។ មានចំនួនប្រជាជនធ្លាក់ចុះជាលើកទី១ហើយ ចិនមានកំណើនសេដ្ឋកិច្ចទាប នៅឆ្នាំ ២០២២។ តាមតួលេខផ្លូវការរបស់រដ្ឋអំណាចចិន កំណើនសេដ្ឋកិច្ចរបស់ចិន នៅឆ្នាំ ២០២២ មានត្រឹម៣% គឺទាបជាងការកំណត់ដៅទុក របស់បក្សកុម្មុយនិស្តចិន ដែលមានប្រមាណ ៥,៥%។ ចិនមានកំណើនសេដ្ឋកិច្ច៣% គឺគ្រាន់បើជាងមហាអំណាចដទៃទៀត នៅក្នុងពិភពលោក ប៉ុន្តែ ជាមួយកំណើនសេដ្ឋកិច្ចត្រឹម ៣% នេះជាលើកទី១ នៅក្នុងរយៈពេល ៤០ឆ្នាំ មកនេះ ដែលចិនមានអត្រាកំណើនសេដ្ឋកិច្ចដ៏ទាប។
នយោបាយកូវីដសូន្យ ដែលបានទៅបិទខ្ទប់សកម្មភាពសេដ្ឋកិច្ច ហើយនិងការផ្ទុះឆ្លងរាលដាលជំងឺកូវីដ នៅក្រោយ ការប្រកាសបិទបញ្ចប់វិធានការរឹតបន្តឹងកូវីដនៅដើមខែធ្នូកន្លងទៅ ជាហេតុផលសំខាន់ដែលធ្វើឲ្យចិនមិនបានទទួលកំណើនសេដ្ឋកិច្ចតាមការដៅទុករបស់បក្សកុម្មុយនិស្ត។
ដោយសារតែនយោបាយកូវីដសូន្យ ការរឹតបន្តឹងលើការផ្តល់ឥណទាននៅក្នុងវិស័យអចលនទ្រព្យ ការចំណាយសាធារណៈកប់ពពក ដើម្បី អនុវត្តនយោបាយកូវីដ បូកផ្សំនឹងបរិយាកាសសេដ្ឋកិច្ចអាប់អួរនៅក្នុងពិភពលោកជាទូទៅ ដោយសារសង្រ្គាមនៅអ៊ុយក្រែន ចិនពិបាកនឹងអាចមានកំណើនសេដ្ឋកិច្ចខ្ពស់ ដូចកាលមុនសម័យកូវីដ។ ធនាគារពិភពលោកបានព្យាករថា ផលិតផលក្នុងស្រុកសរុបរបស់ចិន នឹងមានប្រមាណ ៤,៣%ប៉ុណ្ណោះ នៅឆ្នាំ នេះ ឆ្នាំ ២០២៣។
កំណើនសេដ្ឋកិច្ចដ៏ទាបនៅឆ្នាំ ២០២២ បានធ្វើឲ្យចិនលែងជាងក្បាលម៉ាស៊ីនអូសទាញសេដ្ឋកិច្ចពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ