អ.ស.ប.៖ចំនួនមនុស្សក្នុងលោកនឹងឡើងដល់ ៨ ០០០លាននាក់នៅថ្ងៃទី១៥ វិច្ឆិកា
នាយកដ្ឋានទទួលបន្ទុកកិច្ចការសេដ្ឋកិច្ច និងសង្គមរបស់អង្គការសហប្រជាជាតិបានផ្សព្វផ្សាយរបាយការណ៍មួយស្តីពីចំនួនប្រជាជនក្នុងលោក។ របាយការណ៍បានប្រមើលមើលថា ចំនួនប្រជាជនក្នុងលោកនឹងកើនដល់ ៨ ០០០លាននាក់នៅថ្ងៃទី១៥ វិច្ឆិកាខាងមុខ និងថា ឥណ្ឌានឹងមានប្រជាជនច្រើនជាងចិននៅឆ្នាំ ២០២៣។
ចុះផ្សាយនៅថ្ងៃ៖
ស្តាប់ - ០២:៣៤
នៅមុនដំណាច់ឆ្នាំ ២០២២ ចំនួនប្រជាជនសរុបក្នុងលោកនឹងឡើងដល់ ៨ ០០០លាននាក់ ពោលមានការកើនឡើងចំនួន ៥ ៥០០លាននាក់បើគិតតាំងពីឆ្នាំ ១៩៥០។ តែនាយកដ្ឋានទទួលបន្ទុកកិច្ចការសេដ្ឋកិច្ច និងសង្គមរបស់អង្គការសហប្រជាជាតិមិនភ្លេចបញ្ជាក់នៅក្នុងរបាយការណ៍របស់ខ្លួនថា អត្រាកំណើនប្រជាជនក្នុងលោកសព្វថ្ងៃតាំងពីឆ្នាំ ១៩៥០ មានសង្វាក់យឺតខ្លាំងណាស់។ យឺតខ្លាំងព្រោះនៅឆ្នាំ ២០៣០ ចំនួនប្រជាជនសរុបក្នុងលោកអាចនឹងមានប្រមាណជា ៨ ៥០០លាននាក់ និងមានប្រមាណជា ៩ ៧០០លាននាក់នៅឆ្នាំ ២០៥០។
បន្ទាប់មកនៅក្នុងរង្វង់ឆ្នាំ ២០៨០ ចំនួនប្រជាជនសរុបក្នុងលោកនឹងអាចមានប្រមាណ ១០ ៤០០លាននាក់ ហើយចំនួននេះអាចនឹងបន្តនៅឋេររហូតដល់ឆ្នាំ ២១០០។ តាមរបាយការណ៍របស់អង្គការសហប្រជាជាតិដដែល ខណៈដែលអត្រាកំណើតបានធ្លាក់ចុះយ៉ាងគំហុកនៅក្នុងប្រទេសអភិវឌ្ឍន៍ជាច្រើន កំណើនអត្រាកំណើតជាងពាក់កណ្តាលនៅក្នុងលោកត្រូវបានគេរង់ចាំនាទសវត្សរ៍ខាងមុខនៅក្នុងប្រទេសចំនួន ៨ រួមមានសាធារណរដ្ឋប្រជាធិបតេយ្យកុងហ្គោ អេហ្ស៊ីប អេត្យូពី ឥណ្ឌា នីហ្សេរីយ៉ា ប៉ាគីស្ថាន ហ្វីលីពីន និងប្រទេសតង់ហ្សានី។
តែរបាយការណ៍របស់អង្គការសហប្រជាជាតិមិនភ្លេចបញ្ជាក់ថានៅឆ្នាំ ២០២៣ ឥណ្ឌានឹងមានចំនួនប្រជាជនច្រើនជាងចិនក្នុងនាមជាប្រទេសដែលមានចំនួនប្រជាជនច្រើនជាងគេក្នុងលោក។ ខណៈដែលផែនដីកំពុងត្រៀមទទួលមនុស្ស ៨ ០០០លាននាក់នៅថ្ងៃទី១៥ វិច្ឆិកាខាងមុខ អគ្គលេខាធិការអង្គការសហប្រជាជាតិលោកអង់តូនីញ៉ូ ហ្គូទែរស៍បានចេញផ្សាយសេចក្តីប្រកាសព័ត៌មានមួយដោយផ្តោតសំខាន់លើពីរចំណុច ទី១ លោកបានរម្លឹកពីការទទួលខុសត្រូវចែករំលែករួមរបស់មនុស្សលោកក្នុងថែរក្សាភពផែនដី និងជាពេលវេលាដើម្បីគិតគូរលើចំណុចដែលមនុស្សលោកមិនបានគោរពតាមការប្តេជ្ញាចិត្តរបស់ខ្លួនចំពោះគ្នាទៅវិញទៅមក និងទី២ លោកបានចាត់ទុកជាឱកាសដែលត្រូវសាទរពីភាពចម្រុះរបស់មនុស្សលោក ការទទួលស្គាល់មនុស្សជាតិទូទៅ និងការត្រេកត្រអាលលើភាពរីកចម្រើននៅក្នុងវិស័យសុខាភិបាលដែលបានចូលរួមកាត់បន្ថយនូវអត្រាមរណៈរបស់មាតា និងទារក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ