របាយការណ៍របស់មូលនិធិ IMF៖ ពិភពលោកជៀសផុតពីវិបត្តិសេដ្ឋកិច្ចដើរថយក្រោយ នៅឆ្នាំ២០២៣
ចុះផ្សាយនៅថ្ងៃ៖
ស្តាប់ - ០៦:៣៣
ទោះជួបវិបត្តិថាមពល ដោយសារសង្រ្គាមអ៊ុយក្រែន ពិភពលោកឆ្នាំ ២០២៣អាចជៀសរួចផុតពីវិបត្តិសេដ្ឋកិច្ចដើរថយក្រោយ។ នៅក្នុងរបាយការណ៍ ចេញផ្សាយ នៅថ្ងៃអង្គារទី៣១មករា មូលនិធិរូបិយវត្ថុអន្តរជាតិ IMF បានបង្កើនការព្យាករកំណើនសេដ្ឋកិច្ចពិភពលោក ឆ្នាំ សម្រាប់ឆ្នាំ ២០២៣ ដល់២,៩% ប៉ុន្តែ មិនមែន ២,៧%ដូចដែលមូលនិធិធ្លាប់បានវាយតម្លៃ កាលពីខែតុលាឆ្នាំមុន។ តាមមូលនិធិ IMF បន្ទាប់ពីមានកំណើន ៣,៤% នៅឆ្នាំ ២០២២ កំណើនសេដ្ឋកិច្ចពិភពលោកសម្រាប់ឆ្នាំ ២០២៣ មានត្រឹម ២,៩% មុននឹងកើនឡើង ឡើងវិញ ដល់៣,១% នៅ ឆ្នាំក្រោយ។
របាយការណ៍ របស់មូលនិធិរូបិយវត្ថុអន្តរជាតិបានបង្ហាញថា ពិភពលោកជៀសរួចផុតពីវិបត្តិសេដ្ឋកិច្ចដើរថយក្រោយ នៅឆ្នាំ ២០២៣។ នៅក្នុងរបាយការណ៍ចេញផ្សាយនៅថ្ងៃអង្គារនេះ មូលនិធិរូបិយវត្ថុអន្តរជាតិ IMF បានព្យាករ កំណើនសេដ្ឋកិច្ចពិភពលោក សម្រាប់ឆ្នាំ ២០២៣ ដែលមានប្រមាណ ២,៩% ពោលគឺ មិនមែន ២,៧% ដូចការព្យាករទុក កាលពីខែតុលាឆ្នាំមុន។
ដោយ សើរើការព្យាករដែលខ្លួនធ្លាប់បានកត់ត្រាទុក កាលពីខែតុលាឆ្នាំមុន មូលនិធិរូបិយវត្ថុអន្តរជាតិ IMF បានផ្តល់ក្តីសង្ឃឹមថ្មីស្តីពីកំណើនសេដ្ឋកិច្ចពិភពលោក។ ក្តីសង្ឃឹមនៅត្រង់ថា ផ្ទុយពីការបារម្ភដែលថា ពិភពលោកអាចជួបវិបត្តិសេដ្ឋកិច្ចដើរថយក្រោយ នៅឆ្នាំ២០២៣នេះ របាយការណ៍របស់មូលនិធិរូបិយវត្ថុអន្តរជាតិបានបង្ហាញថា សម្រាប់ឆ្នាំ ២០២៣ ពិភពលោក នឹងមានកំណើនសេដ្ឋកិច្ចល្អប្រសើរជាងការរំពឹងទុក។
ជាការពិតដែលថា កំណើនសេដ្ឋកិច្ចពិភពលោកសម្រាប់ឆ្នាំ ២០២៣ នឹងមានត្រឹម ២,៩% ពោលគឺនៅទាបជាងឆ្នាំ ២០២២ ដែលមាន៣,៤% ប៉ុន្តែ យ៉ាងហោចណាស់ វានៅតែល្អ គ្រាន់បើជាង ២,៧% ដែលមូលនិធិរូបិយវត្ថុអន្តរជាតិធ្លាប់បានព្យាករទុកកាលពីខែតុលា។ កំណើនសេដ្ឋកិច្ចពិភពលោកចាប់ល្អប្រសើរឡើងវិញ នៅឆ្នាំ ក្រោយ ជាមួយអត្រាកំណើន ៤,៣%។
មានហេតុផលមួយចំនួនដែលធ្វើឲ្យមូលនិធិរូបិយវត្ថុអន្តរជាតិ IMF វាយតម្លៃថា ពិភពលោកអាចជៀសរួចផុតពីវិបត្តិសេដ្ឋកិច្ចដើរថយក្រោយនៅឆ្នាំនោះ។ ទី១ គឺសេដ្ឋកិច្ចរបស់អាមេរិក អឺរ៉ុប និងចិន ដែលជាក្បាលម៉ាស៊ីនរបស់សេដ្ឋកិច្ចសកល នៅតែរឹងមាំ អាចធន់ តស៊ូ នឹងវិបត្តិនៅត្រីមាសចុងក្រោយ របស់ឆ្នាំ ២០២២។ តាមIMF ផ្ទុយពីការរំពឹងទុក ការវិនិយោគឯកជន ការចំណាយសម្រាប់ការទិញប្រើប្រាស់បានកើនឡើងគួរឲ្យកត់សំគាល់ នៅអឺរ៉ុប នៅអាមេរិក នោះក៏មកពីវិធានការផ្តល់ជំនួយអន្តរាគមន៍របស់រដ្ឋសម្រាប់ទប់ទល់តម្លៃថាមពលដែលឡើងថ្លៃ ដោយសារវិបត្តិសង្រ្គាមនៅអ៊ុយក្រែន។
ទី២ គឺ ឧស្សាហកម្ម សេដ្ឋកិច្ចចិន ដែលចាប់ផ្តើមបើកទ្វារសកម្មភាពឡើងវិញ នៅក្រោយ ចិនបោះបង់ចោលគោលនយោបាយកូវីដសូន្យ ឈប់បិទខ្ទប់ប្រទេសតទៅទៀត។ តាមរបាយការណ៍របស់មូលនិធិរូបិយវត្ថុអន្តរជាតិ កំណើនសេដ្ឋកិច្ចរបស់ចិន ដែលមានប្រមាណ ៥,២% នៅឆ្នាំនេះ ជាចលករសំខាន់ សម្រាប់រុញច្រានកំណើនសេដ្ឋកិច្ចសកល។
មូលនិធិរូបិយវត្ថុអន្តរជាតិ IMFវាយតម្លៃថា អតិផរណានឹងធ្លាក់ថយចុះ មកនៅត្រឹម ៦,៦% នៅឆ្នាំ២០២៣ បន្ទាប់ពីឡើងខ្ពស់ខ្លាំង ដល់៨,៨% នៅឆ្នាំ ២០២២។ តាមមូលនិធិរូបិយវត្ថុអន្តរជាតិ IMF គោលនយោបាយរបស់ធនាគារកណ្តាលនឹងបន្តទម្លាក់អត្រាអតិផរណានៅក្នុងពិភពលោក ឲ្យនៅត្រឹម ៤,៣%នៅឆ្នាំក្រោយ។
អង់គ្លេសជាប្រទេសតែមួយគត់របស់ ហ្សេ ២០ ដែលមានសេដ្ឋកិច្ចដើរថយក្រោយ
ពិភពលោកជៀសរួចផុតពីវិបត្តិសេដ្ឋកិច្ច ប៉ុន្តែ មិនមែនគ្រប់ប្រទេសសុទ្ធតែមានកំណើនសេដ្ឋកិច្ចវិជ្ជមាននោះទេ។ នៅក្នុងរបាយការណ៍ មូលនិធិរូបិយវត្ថុអន្តរជាតិ បានបង្ហាញថា អង់គ្លេសជាប្រទេសអ្នកមានតែមួយគត់ដែលត្រូវជួបវិបត្តិសេដ្ឋកិច្ចដើរថយក្រោយ នៅឆ្នាំនេះ។
នៅក្នុងរបាយការណ៍របស់មូលនិធិរូបិយវត្ថុអន្តរជាតិ គេបានលើកយកករណីពិសេសរបស់អង់គ្លេស ព្រោះថា អង់គ្លេសជាប្រទេសមហាអំណាចឧស្សាហកម្មតែមួយគត់ដែលជួបវិបត្តិសេដ្ឋកិច្ចដើរថយក្រោយនៅឆ្នាំនេះ។ កំណើនសេដ្ឋកិច្ចអវិជ្ជមាន ២ត្រីមាសជាប់គ្នា នៅចុងឆ្នាំ ២០២២នឹងធ្វើឲ្យផលិតផលក្នុងស្រុកសរុបរបស់អង់គ្លេសមានតែ០,៦%ប៉ុណ្ណោះនៅឆ្នាំ នេះ។ សេដ្ឋកិច្ចអង់គ្លេសដើរថយក្រោយ ដោយសារតែ នយោបាយដំឡើងអត្រាការប្រាក់ និងនយោបាយរឹតបន្តឹងថវិកា ចំណាយរបស់រដ្ឋាភិបាលអង់គ្លេស។
អង់គ្លេសជួបវិបត្តិសេដ្ឋកិច្ចដើរថយក្រោយ ខុសផ្ទុយស្រឡះពីអាល្លឺម៉ង់ ដែលគេធ្លាប់ព្យាករទុកថា នឹងអាចជួបវិបត្តិសេដ្ឋកិច្ចដើរថយក្រោយនៅឆ្នាំនេះ។ តាមមូលនិធិរូបិយវត្ថុអន្តរជាតិ អាល្លឺម៉ង់និងអ៊ីតាលី រួចផុតពីវិបត្តិសេដ្ឋកិច្ចដើរថយក្រោយ ដោយមកពីប្រទេសទាំងពីរនេះចាត់វិធានការ ដោះស្រាយបញ្ហាថាមពល ប្រកប ប្រសិទ្ធិភាព និងទាន់ពេលវេលា បើទោះបីជាឈប់ទិញប្រេង និងឧស្ម័នពីរុស្ស៊ីដោយសារ សង្រ្គាមអ៊ុយក្រែន។
ក្នុងករណីរុស្ស៊ី ប្រទេសលោកខាងលិច នឹងត្រូវខកចិត្តខ្លាំង ព្រោះថា ទណ្ឌកម្មសេដ្ឋកិច្ចរបស់ប្រទេសលោកខាងលិច ដូចជាការឈប់ទិញ ព្រមទាំងការកំណត់បញ្ចុះតម្លៃប្រេង និងឧស្ម័នរបស់រុស្ស៊ី មិនបានធ្វើឲ្យរុស្ស៊ី ជួបវិបត្តិសេដ្ឋកិច្ចនោះទេ។ រុស្ស៊ី នៅតែមានកំណើនសេដ្ឋកិច្ច ២,២%នៅឆ្នាំ នេះ ព្រោះថា រុស្ស៊ីនៅតែអាចបន្តផលិត និងលក់ប្រេងដល់ប្រទេសដែលមិនអនុវត្តនយោបាយដាក់ទណ្ឌកម្មសេដ្ឋកិច្ចរបស់ប្រទេសលោកខាងលិច។
សេដ្ឋកិច្ចសកលនៅតែផុយស្រួយ
ពិភពលោកជៀសផុតពីវិបត្តិសេដ្ឋកិច្ចដើរថយក្រោយ នៅឆ្នាំ នេះមែន ប៉ុន្តែ មូលនិធិរូបិយវត្ថុអន្តរជាតិ IMF នៅតែដាស់តឿនឲ្យគេប្រុងប្រយ័ត្នជានិច្ច ព្រោះថា សុខភាពសេដ្ឋកិច្ចសកលនៅតែខ្សោយ ផុយស្រួយនៅឡើយទេ បើប្រៀបធៀបនឹងសម័យមុនកូវីដ។ តាមមូលនិធិ IMF សង្រ្គាមរុស្ស៊ី ឈ្លានពានអ៊ុយក្រែន ដែលអូសបន្លាយពេលវេលានៅឆ្នាំនេះ បូកផ្សំ នឹងវិបត្តិជំងឺកូវីដនៅចិន ដែលអាចបន្ទុចបង្អាក់សកម្មភាពសេដ្ឋកិច្ចរបស់មហាយក្សចិន នឹងអាចជះឥទ្ធិពលអាក្រក់ទៅលើសេដ្ឋកិច្ចសកល។ ការដំឡើងការប្រាក់របស់ធនាគារកណ្តាល នឹងទៅដាក់បន្ទុកលើប្រទេសជាប់បំណុល ដែលភាគច្រើនជាប្រទេស កំពុងអភិវឌ្ឍ ប្រទេសក្រីក្រ។ នេះគេនៅមិនទាន់និយាយពីការបែកបាក់ បែងចែកបក្សពួក ដោយសារហេតុផលភូមិសាស្រ្តនយោបាយ ដែលជាកត្តាសំខាន់មួយដែរ ដែលគំរាមកំហែងកំណើនសេដ្ឋកិច្ចសកល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ