IMF៖ឆ្នាំ ២០២៣ ជាឆ្នាំដែលអាចមានពោរពេញដោយភាពតានតឹងសង្គមក្នុងកម្រិតពិភពលោក
អគ្គនាយិកាមូលនិធិរូបិយវត្ថុអន្តរជាតិ IMF លោកស្រីគ្រីស្តាលីណា ហ្សកជីវ៉ាបានថ្លែងដោយក្តីបារម្ភក្នុងថ្ងៃព្រហស្បតិ៍ ទី១២ មករាថា ឆ្នាំ ២០២៣ អាចជាឆ្នាំដែលមានពោរពេញដោយភាពតានតឹងសង្គមក្នុងកម្រិតពិភពលោក។ កំណើនអតិផរណា កង្វះការងារ ឬមួយកំណើនអត្រាការប្រាក់សុទ្ធសឹងជាកត្តាដែលអាចជាប្រភពនៃភាពតានតឹងសង្គម។ តាមប្រមុខមូលនិធិរូបិយវត្ថុអន្តរជាតិ ការព្យាករណ៍ថ្មីស្តីពីកំណើនសេដ្ឋកិច្ចឆ្នាំ ២០២៣ ក្នុងលោកមានការធ្លាក់ចុះខ្លាំងបើធៀបនឹងការព្យាករណ៍ក្នុងខែតុលាឆ្នាំ ២០២២។
ចុះផ្សាយនៅថ្ងៃ៖
ស្តាប់ - ០២:២១
ឆ្នាំ ២០២៣ ទើបតែចាប់ផ្តើមមិនទាន់បាន ២សប្តាហ៍ពេញលេញផង IMF បានសម្តែងក្តីបារម្ភរួចជាស្រេចពីភាពតានតឹងសង្គមនៅទូទាំងពិភពលោក។ នៅក្នុងន័យនេះ ប្រមុខ IMF លោកស្រីគ្រីស្តាលីណា ហ្សកជីវ៉ាបានលើកឡើងពីព្រឹត្តិការណ៍ដែលបានកើតមាននៅក្នុងប្រទេសប្រេស៊ីល ប៉េរូ បូលីវី កូឡុំប៊ី និងអង់គ្លេស។ តាមលោកស្រីហ្សកជីវ៉ា ទោះបីជាព្រឹត្តិការណ៍នៅក្នុងប្រទេសទាំងអស់នេះមានហេតុផលខុសគ្នាក៏ដោយក៏ជារូបភាពដែលឆ្លុះបញ្ជាំងយ៉ាងច្បាស់ក្រឡែតពីភាពតានតឹងសង្គម។ ភាពតានតឹងសង្គមដែលអាចបង្កចេញពីទំនិញឡើងថ្លៃ កង្វះការងារ និងកំណើនអត្រាការប្រាក់។
ទាក់ទងនឹងការព្យាករណ៍ថ្មីស្តីពីកំណើនសេដ្ឋកិច្ចសកលក្នុងឆ្នាំ ២០២៣ ត្រូវបានប្រមុខ IMF គូសបញ្ជាក់ថា មានការថមថយខ្លាំងបើធៀបនឹងការព្យាករណ៍ក្នុងខែតុលាឆ្នាំទៅមិញ។ តែមកដល់ពេលនេះ លោកស្រីហ្សកជីវ៉ាបានមើលឃើញពីភាពធន់របស់ទីផ្សារការងារនៅក្នុងប្រទេសនីមួយៗ។ ភាពធន់ដែលកើតចេញពីចំណាត់ការឆាប់រហ័សរបស់រដ្ឋាភិបាលក្នុងការជួយគាំទ្រពលរដ្ឋប្រឈមនឹងការឡើងថ្លៃតម្លៃទំនិញ ពិសេសម្ហូបអាហារ និងថាមពល។ តាមលោកស្រីហ្សកជីវ៉ា ដរាបណាមនុស្សមានការងារធ្វើ ដរាបនោះពួកគេមានលុយចាយ ទោះបីជាតម្លៃទំនិញថ្លៃជាងមុនក៏ដោយ។
ដោយឡែក ប្រមុខ IMF បានទាញសញ្ញាអាសន្នជាថ្មីថា កំណើនអត្រាការប្រាក់នឹងធ្វើឲ្យប្រទេសដែលកំពុងជំពាក់បំណុលគេជួបគ្រោះមហន្តរាយ ពិសេសក្រុមប្រទេសកំពុងមានសេដ្ឋកិច្ចរីកលូតលាស់ខ្លាំង និងក្រុមប្រទេសក្រីក្រ។ ត្រង់ចំណុចនេះ លោកស្រីហ្សកជីវ៉ាបានរម្លឹកពីភាពចាំបាច់ក្នុងការសាររើមើលឡើងវិញពីប្រាក់បំណុលនេះជាមួយម្ចាស់បំណុលសំខាន់ ដូចជាចិន អារ៉ាប៊ីសាអូឌីត ឬមួយក៏ម្ចាស់បំណុលជាវិស័យឯកជន។ ចុងក្រោយ លោកស្រីហ្សកជីវ៉ាបានយល់ឃើញថា ចិនអាចក្លាយជាក្បាលម៉ាស៊ីនសេដ្ឋកិច្ចសកលជាថ្មីក្នុងឆ្នាំ ២០២៣ បើចិនមិនបិទប្រទេសឡើងវិញ ឬមិនផ្លាស់ប្តូរនយោបាយដោយសារកំណើនឆ្លងកូវីដ១៩ ពេលនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ