ក្នុងពេលតែ១ថ្ងៃ អាមេរិកបាញ់ទម្លាក់វត្ថុហោះចំនួន២ ក្នុងដែនអាកាសអាមេរិក និងកាណាដា
ចុះផ្សាយនៅថ្ងៃ៖
ស្តាប់ - ០៧:០៤
មេដឹកនាំអាមេរិក និងកាណាដា កាលពីថ្ងៃសៅរ៍ម្សិលមិញ បានរួមគ្នា បញ្ជាឲ្យគេបាញ់ទម្លាក់ វត្ថុរាងស៊ីឡាំងមួយ ដែលហោះក្នុងដែនអាកាសកាណាដា។ តាមរដ្ឋមន្រ្តីការពារជាតិកាណាដា យន្តហោះ ចម្បាំងអាមេរិកប្រភេទ F22 បានបាញ់ទម្លាក់វត្ថុហោះ នៅភាគពាយ័ព្យប្រទេសកាណាដា ក្បែរអាឡាស្កា របស់អាមេរិក។ គេអាចនិយាយបានថា ក្នុងរយៈពេល ១ថ្ងៃ យន្តហោះចម្បាំងអាមេរិក F22 បានបាញ់ទម្លាក់ វត្ថុហោះមិនដឹងអត្តសញ្ញាណដល់ពីរគ្រឿង ក្នុងដែនអាកាសអាមេរិកខាងជើង។ តើវត្ថុហោះដែលអាមេរិក និងកាណាដា រួមគ្នាបាញ់ទម្លាក់នៅថ្ងៃសៅរ៍ម្សិលមិញ មានជាប់ពាក់ព័ន្ធនឹងបាឡុងចារកម្មរបស់ចិន និងវត្ថុដែលអាមេរិកបាញ់ទម្លាក់កាលពីថ្ងៃសុក្រដែរឬទេ?
ក្នុងរយៈពេលតែ ២៤ម៉ោង យន្តហោះចម្បាំងអាមេរិកបាញ់ទម្លាក់វត្ថុហោះ ដែល គេមិនស្គាល់អត្ថសញ្ញាណ ដលទៅ២គ្រឿង។ នៅថ្ងៃសៅរ៍ វត្ថុហោះ ក្នុងដែនអាកាសរបស់កាណាដា ក្បែរព្រំដែនជាមួយអាមេរិក ត្រូវបាញ់ទម្លាក់ ក្នុងប្រតិបត្តិការរួមគ្នារវាងកងទ័ពអាមេរិក និងកងទ័ពកាណាដា។
តាមរដ្ឋមន្រ្តីការពារជាតិកាណាដា វត្ថុហោះ ដែលយន្តហោះចម្បាំងអាមេរិកបាញ់ទម្លាក់ កាលពីថ្ងៃសៅរ៍ មានទម្រង់រូបរាងជាស៊ីឡាំង និងមានទំហំតូចជាង បាឡុងចារកម្មរបស់ចិន ដែលអាមេរិកបាញ់ទម្លាក់ កាលពីថ្ងៃសុក្រសប្តាហ៍មុន។ ទាំងមន្រ្តីកាណាដា និងអាមេរិក មិនបានលម្អិតទេ ថា តើវត្ថុហោះ ដែលគេបាញ់ទម្លាក់នៅថ្ងៃសៅរ៍ នៅក្នុងដែនអាកាសរបស់កាណាដា ដូចគ្នានឹងវត្ថុដែលអាមេរិកបាញ់ទម្លាក់នៅអាឡាស្កាកាលពីថ្ងៃសុក្រម្សិលម្ង៉ៃដែរឬទេ។ នៅថ្ងៃសៅរ៍ យន្តហោះអាមេរិកទើបបាញ់ទម្លាក់វត្ថុហោះមួយគ្រឿងដែលមានទំហំ ប៉ុនឡាន គឺតូចជាង បាឡុងចារកម្មរបស់ចិន ដែលមាន ទម្ងន់រាប់តោន និងកំពស់ ៦០ម៉ែត្រ។
តាមអ្នកនាំពាក្យរបស់មន្ទីរបញ្ចកោណ បញ្ជាការដ្ឋានការពារដែនអាកាសអាមេរិកខាងជើង ដែលប្រមូលផ្តុំដោយកងទ័ពអាមេរិក និងកាណាដា បានតាមដាន ចាប់បានសញ្ញាវត្ថុហោះ នៅក្នុងដែនអាកាស ភាគខាងជើង ឆៀងខាងលិច របស់កាណាដា តាំងពីយប់ថ្ងៃសុក្រ ពោលគឺនៅប៉ុន្មានម៉ោងក្រោយ អាមេរិកបាញ់ទម្លាក់វត្ថុហោះ នៅអាឡាស្កា។ នៅថ្ងៃសៅរ៍ ទៅតាមការបញ្ជារួមគ្នា របស់ប្រធានាធិបតីអាមេរិក និងនាយករដ្ឋមន្រ្តីកាណាដា យន្តហោះចម្បាំងអាមេរិកបានបាញ់ទម្លាក់ វត្ថុហោះ នៅតំបន់ភ្នំ Yokun របស់កាណាដា ដែលស្ថិតនៅចម្ងាយ១៦០គីឡូម៉ែត្រពីព្រំដែនអាមេរិក។
ក្នុងរយៈពេល១សប្តាហ៍ នេះជាលើកជា៣ ដែលយន្តហោះអាមេរិកចេញធ្វើប្រតិបត្តិការបាញ់ទម្លាក់ បាឡុងចារកម្ម និងវត្ថុហោះ គ្មានអត្តសញ្ញាណ។
រដ្ឋមន្រ្តីការពារជាតិកាណាដា៖វត្ថុហោះ គ្រោះថ្នាក់ គំរាមកំហែងយន្តហោះស៊ីវិល
ផ្ទុយពីបាឡុង ចារកម្មរបស់ចិន ដែលអាមេរិករង់ចាំពេលជាច្រើនថ្ងៃ មុននឹងបាញ់ទម្លាក់នៅរដ្ឋCaroline ខាងជើង វត្ថុហោះ ដែលមានទំហំ តូច ត្រូវប្រធានាធិបតីអាមេរិក និងនាយករដ្ឋមន្រ្តីកាណាដា ឯកភាពគ្នា បញ្ជាឲ្យគេបាញ់ទម្លាក់ភ្លាមៗ ទៅតាមសំណើរបស់កងទ័ពប្រទេសទាំងពីរ។
តាមរដ្ឋមន្រ្តីការពារជាតិកាណាដា លោកស្រី Anita Anand គេចាំបាច់ត្រូវចាត់វិធានការ បាញ់ទម្លាក់វត្ថុហោះ ក្នុងដែនអាកាសកាណាដា ដើម្បីសុវត្ថិភាពយន្តហោះដឹកអ្នកដំណើរ។ ផ្ទុយពី បាឡុងចារកម្មចិនដែលហោះក្នុងកំពស់ដ៏ខ្ពស់ វត្ថុហោះ កាលពីថ្ងៃសៅរ៍ ស្ថិតនៅកំពស់១២ ២០០ម៉ែត្រ ពីផែនដី ដែលជាកំពស់ហោះហើរ របស់យន្តហោះស៊ីវិល យន្តហោះដឹកអ្នកដំណើរ។ តាមប្រមុខការពារជាតិកាណាដា វត្ថុរូបរាងស៊ីឡាំង បានហោះចូលដោយខុសច្បាប់ ក្នុងដែនអាកាសរបស់កាណាដា និងអាចបង្កគ្រោះថ្នាក់ ដល់យន្តហោះស៊ីវិល។ ដូច្នេះ គេចាំបាច់ត្រូវបាញ់ទម្លាក់ភ្លាមៗ។
ទាំងអាមេរិក និងកាណាដាមិនបានបញ្ជាក់ថា តើវត្ថុហោះដែល គេបាញ់ទម្លាក់ម្សិលមិញ និងម្សិលម្ង៉ៃ មានជាប់ពាក់ព័ន្ធគ្នាដែរឬយ៉ាងណានោះទេ។ នៅក្នុងសន្និសីទកាសែត កាលពីថ្ងៃសៅរ៍ រដ្ឋមន្រ្តីការពារជាតិកាណាដា លោកស្រី Anita Anand មានការប្រុងប្រយ័ត្ន មិនទាន់ហ៊ានអះអាងថា វត្ថុហោះ ដែលគេមិនទាន់កំណត់អត្តសញ្ញាណ មានជាប់ពាក់ព័ន្ធនឹងបាឡុង ចារកម្មចិន ដែលអាមេរិកបាញ់ទម្លាក់ កាលពី ១សប្តាហ៍មុន។ តាមលោកស្រីរដ្ឋមន្រ្តីការពារជាតិកាណាដា នៅបន្ទាប់ពីចុះទៅប្រមូលបំណែករបស់វា គេត្រូវការពេលវេលាស្រាវជ្រាវ វិភាគសិន មុននឹងអាចកំណត់ ប្រភព អ្នកដែលបញ្ជូនវត្ថុទៅហោះ ក្នុងដែនអាកាសកាណាដា។
អាមេរិកថា ចិនបញ្ជូនយ៉ាងហោច បាឡុងចារកម្ម ចំនួន ២០ ទៅយកការណ៍សម្ងាត់នៅទ្វីបទាំង៥ ក្នុងពិភពលោក
នៅក្រោយបាញ់ទម្លាក់ បាឡុងរបស់ចិន អាមេរិកបានបញ្ជាក់ថា បាឡុងរបស់ចិន ដែលហោះរំលោភចូលដែនអាកាសរបស់អាមេរិក និងដែលអាមេរិកបាញ់ទម្លាក់កាលពីថ្ងៃសុក្រសប្តាហ៍ មុន គឺជាបាឡុង ស៊ើបយកការណ៍សម្ងាត់ អំពីទីតាំងយុទ្ធសាស្រ្តរបស់យោធាអាមេរិក ពោលគឺ មិនមែនបាឡុង ដែលមានគោលដៅ ស៊ីវិលដើម្បីសិក្សាអាកាសធាតុ ដូចការអះអាងរបស់ចិន។
តាមមន្រ្តី ដែលដកស្រង់សំដីដោយទូរទស្សន៍ CNN បាឡុងចារកម្មចិន ដែលហោះចូលក្នុងដែនអាកាសអាមេរិក ស្ថិតក្នុងចំណោម បាឡុងចារកម្ម យ៉ាងហោចណាស់ ២០ ដែលកងទ័ពចិន បានបញ្ជូនចេញទៅស៊ើបការណ៍សម្ងាត់ តាំងពីឆ្នាំ ២០១៨ នៅទ្វីបទាំង ៥ ក្នុងពិភពលោក ដែលនៅក្នុងនោះ ពាក់កណ្តាល ត្រូវបញ្ជូន ទៅអាមេរិកខាងជើង។ បាឡុងផ្សេងទៀត ត្រូវចិនបញ្ជូនទៅហោះពីលើដែនអាកាសរបស់ជប៉ុន វៀតណាម ឥណ្ឌា តៃវ៉ាន់ និងហ្វីលីពីនជាដើម ដែលសុទ្ធសឹងជាប្រទេសមានផលរមាស់ជាមួយចិន។
កន្លងមក អាមេរិកផ្ទាល់ធ្លាប់ចាប់បានសញ្ញា បាឡុងប្រភេទនេះរបស់ចិន ចំនួន៤ដែរ ដែលហោះ ពីលើរដ្ឋតិចសាស់ និងប៉ុន្តែ មិនដែលបានបាញ់ទម្លាក់ដូចលើកនេះទេ។ មន្រ្តីយោធាអាមេរិក ម្នាក់ដែលសុំមិនបញ្ចេញឈ្មោះ បាននិយាយប្រាប់កាសែតក្នុងស្រុកថា គេនឹងសើរើ មើលឡើងថា ហេតុអ្វីបានជា នៅក្នុងអាណត្តិប្រធានាធិបតីមុន មានការថ្លោះធ្លោយ បណ្តោយឲ្យបាឡុងចិន ហោះរំលោភចូលដែនអាកាសអាមេរិក និងគ្មានការចាត់វិធានការអ្វីសោះ។
បាឡុងចារកម្មចិន ដែលមានបំពាក់បច្ចេកវិទ្យាទំនើប មានសមត្ថភាពអាចចាប់ថតយកបានការសន្ទនា តាមទូរស័ព្ទ នៅអាមេរិក បានហោះពីលើទីតាំងយោធាសំខាន់ៗរបស់អាមេរិក ដូចជាកន្លែងបាញ់មីស៊ីលអន្តរជាតិរបស់អាមេរិកនៅរដ្ឋម៉ុងតាណាជាដើម។
តាមអ្នកជំនាញផ្នែកការពារដែនអាកាសចិន អាមេរិក បើទោះបីជាអាមេរិក បាញ់ទម្លាក់ បាឡុង ឬ វត្ថុហោះដែលអាចស៊ើបការណ៍សម្ងាត់របស់អាមេរិក ក៏អាមេរិកមិនអាចធ្វើអ្វីបានដែរ ព្រោះថា រាល់ព័ត៌មានសម្ងាត់ ដែលវត្ថុហោះ និងបាឡុងថតយកបាន គឺបានបញ្ជូន ទៅដល់ប៉េកាំង រួចរាល់អស់ទៅហើយ។
ប្រទេសច្រើនដែលប្រើបាឡុងចារកម្ម
ក្រៅពីចិន គឺមានអាមេរិក អ៊ីស្រាអែល រុស្ស៊ី ដែលអភិវឌ្ឍ ប្រើបាឡុង សម្រាប់ ស៊ើបយកការណ៍សម្ងាត់ ព្រោះថា វាជាមធ្យោបាយដែលមានតម្លៃថោក បើប្រៀបធៀបនឹងផ្កាយរណប។ ម្យ៉ាង គេកម្រនឹងអាចចាប់សញ្ញាបាននៅក្នុងរ៉ាដា បើប្រៀបធៀបនឹងយន្តហោះ ឬវត្ថុហោះស៊ើបការណ៍សម្ងាត់ផ្សេងទៀត ព្រោះវាហោះ នៅពីលើកំពស់ហោះ របស់យន្តហោះស៊ីវិល ប៉ុន្តែ នៅក្រោមគន្លងវិថីរបស់ផ្កាយរណប។
លេចចេញរូបរាងនៅអំឡុងសតវត្សរ៍ទី ១៨ នៅពេលទាហានបារាំងបញ្ជូនបាឡុងទៅស៊ើបយកការណ៍លើទីតាំងយោធារបស់សត្រូវ បាឡុងធ្លាប់ត្រូវប្រទេសមហាអំណាចយោធា អភិវឌ្ឍប្រើកាន់តែច្រើន តាំងពីសម័យសង្រ្គាមត្រជាក់ ដើម្បីលួចស៊ើបយកការណ៍គ្នាទៅវិញទៅមក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ