លោកអេប្រាហ៊ីម រៃស៊ីធ្វើដំណើរទៅប៉េកាំងដើម្បីពង្រឹងទំនាក់ទំនងជាមួយមហាអំណាចិន
ចុះផ្សាយនៅថ្ងៃ៖
ស្តាប់ - ០៦:៤៣
នៅប្រទេសចិន ប្រធានាធិបតីអ៊ីរ៉ង់ លោកអេប្រាហ៊ីម រ៉ៃស៊ី ចាប់ផ្តើមនៅថ្ងៃអង្គារទី ១៤ កុម្ភៈ ទស្សនកិច្ចផ្លូវរដ្ឋរយៈពេល៣ថ្ងៃ ទៅតាមការអញ្ជើញរបស់ប្រធានាធិបតីចិន។ អមដោយគណៈប្រតិភូជាន់ខ្ពស់ ដែលមានតាំងពីរដ្ឋមន្រ្តី និងអ្នកជំនួញអ៊ីរ៉ង់ លោកប្រធានាធិបតី អេប្រាហ៊ីម រ៉ៃស៊ី គ្រោងចូលជួប ពិភាក្សាជាមួយលោកប្រធានាធិបតី ស៊ី ជីនពីង នៅថ្ងៃនេះ នៅទីក្រុងប៉េកាំង។ ទស្សនកិច្ចរបស់ប្រធានាធិបតីអ៊ីរ៉ង់ នៅប្រទេសចិន កើតឡើងចំពេលដែលអ៊ីរ៉ង់ និងចិន សុទ្ធតែកំពុងជាប់តានតឹងជាមួយប្រទេសលោកខាងលិច ជាពិសេសអាមេរិក។ អ៊ីរ៉ង់ និងចិនអាចចាប់ដៃគ្នា ដើម្បី បង្កើតខែលប្រឆាំងលោកខាងលិច ឬក៏យ៉ាងណា?
ប្រធានាធិបតីអ៊ីរ៉ង់ លោកអេប្រាហ៊ីម រ៉ៃស៊ីបានធ្វើដំណើរទៅដល់ទីក្រុងប៉េកាំង នៅព្រឹកព្រលឹមថ្ងៃអង្គារនេះ ដើម្បីបំពេញទស្សនកិច្ចរយៈពេល៣ថ្ងៃ។ ប្រធានាធិបតីអ៊ីរ៉ង់ធ្វើដំណើរទៅប្រទេសចិន ដោយនាំយកគណៈប្រតិភូ ដ៏ច្រើនសន្ធឹកសន្ធាប់។
គិតចាប់តាំងពីចូលកាន់តំណែង នៅអ៊ីរ៉ង់ នៅខែសីហាឆ្នាំ ២០២១ ជាលើកទី១ ដែលលោកប្រធានាធិបតីអ៊ីរ៉ង់ អេប្រាហ៊ីម រ៉ៃស៊ីទើបធ្វើដំណើរ ទៅប្រទេសចិន។ លោកអេប្រាហ៊ីម រ៉ៃស៊ីក៏ជាប្រធានាធិបតីអ៊ីរ៉ង់ លើកដំបូងដែរ ដែលមេដឹកនាំចិនអញ្ជើញឲ្យធ្វើទស្សនកិច្ចផ្លូវរដ្ឋនៅប្រទេសចិន នៅក្នុងរយៈពេល ២០ឆ្នាំចុងក្រោយនេះ។
ប្រធានាធិបតីអ៊ីរ៉ង់ មុន គឺលោក ហាសាន់ រូហានីបានធ្វើដំណើរទៅប្រទេសចិន កាលពីឆ្នាំ ២០១៨ ដើម្បីចូលរួមក្នុងកិច្ចប្រជុំសហប្រតិបត្តិការសៀងហៃ ប៉ុន្តែ មិនមែនក្នុងក្របខ័ណ្ឌ ទស្សនកិច្ចផ្លូវរដ្ឋនៅចិននោះទេ។
លោកអេប្រាហ៊ីម រ៉ៃស៊ីវិញ លោកធ្លាប់ជួប ប្រធានាធិបតីចិន លោកស៊ី ជីនពីង ផ្ទាល់ ជាលើកទី១ កាលពីខែ កញ្ញាឆ្នាំមុន នៅក្រៅក្របខ័ណ្ឌកិច្ចប្រជុំរបស់អង្គការសហប្រតិបត្តិការសៀងហៃនេះដែរ ប៉ុន្តែ ដែលរៀបចំ នៅប្រទេសអ៊ូប៊ែរគីស្ថាន។ នៅក្នុងជំនួបកំពូល នៅពេលនោះ មេដឹកនាំអ៊ីរ៉ង់បានស្នើសុំឲ្យពង្រឹងទំនាក់ទំនងសេដ្ឋកិច្ចជាមួយ ប្រទេសចិន ជាពិសេស នៅក្នុងផ្នែក ប្រេង ថាមពល ការដឹកជញ្ជូន កសិកម្ម និងការវិនិយោគ។
ចិនជាប្រទេសដៃគូ ទិញប្រេងដ៏សំខាន់របស់អ៊ីរ៉ង់ ខណៈពេលដែលវិស័យនាំចេញប្រេងរបស់អ៊ីរ៉ង់ ត្រូវរឹតត្បិត មិនអាចនាំចេញទៅលក់នៅបរទេស ដោយសារគំនាបទណ្ឌកម្មសេដ្ឋកិច្ចរបស់អាមេរិក។ ការដោះដូរពាណិជ្ជកម្មរវាងប្រទេសទាំងពីរមានទំហំទឹកប្រាក់ប្រហាក់ប្រហែលគ្នា។ ឧទាហរណ៍ នៅក្នុងរយៈពេល១០ខែមកនេះ ការនាំចេញរបស់អ៊ីរ៉ង់ ទៅប្រទេសចិន មានទំហំទឹកប្រាក់ ១២,៦ពាន់លានដុល្លារ ចំណែក ការនាំចូលទំនិញចិន ទៅអ៊ីរ៉ង់ មានទឹកប្រាក់ ១២,៧ពាន់លានដុល្លារ។
ទោះចិនជាប្រទេសដៃគូសេដ្ឋកិច្ចសំខាន់របស់អ៊ីរ៉ង់ ប៉ុន្តែ អ៊ីរ៉ង់ ស្ថិតនៅក្រោយអាហ្វហ្កានីស្ថាន និងតួកគី ទៅទៀត បើនិយាយពីទំហំវិនិយោគរបស់ចិន។ នៅអ៊ីរ៉ង់ ចិនបានវិនិយោគទឹកប្រាក់ប្រមាណ ១៦២លានដុល្លារ ប៉ុណ្ណោះ ទៅក្នុងសេដ្ឋកិច្ចរបស់អ៊ីរ៉ង់ នៅក្នុងឆ្នាំទី១នៃអាណត្តិរបស់ប្រធានាធិបតីលោកអេប្រាហ៊ីម រ៉ៃស៊ី។
ធ្វើដំណើរជាលើកទី១ ទៅប្រទេសចិន នៅសប្តាហ៍នេះ លោកប្រធានាធិបតីរ៉ៃស៊ី ដែលអមដោយប្រធានធនាគារកណ្តាល និងរដ្ឋមន្រ្តីក្រសួងសំខាន់ៗ ដូចជា ក្រសួងពាណិជ្ជកម្ម ក្រសួងថាមពល ក្រសួង ដឹកជញ្ជូន កសិកម្ម ជាដើម នឹងធ្វើជាអធិបតី លើការចុះហត្ថលេខាលើកិច្ចព្រមព្រៀងមួយចំនួន ជាមួយភាគីចិន។
តាមជំនួយការរបស់ប្រធានាធិបតីអ៊ីរ៉ង់ ដែលទទួលបន្ទុកកិច្ចការនយោបាយ នៅក្នុងអំឡុងទស្សនកិច្ចរបស់លោករ៉ៃស៊ី នៅប្រទេសចិន ភាគីអ៊ីរ៉ង់ និងភាគីចិននឹងពិភាក្សាធ្វើឲ្យចប់ កិច្ចព្រមព្រៀង សម្រាប់រយៈពេល ២៥ឆ្នាំ ដែលប្រទេសទាំងពីរបានចុះហត្ថលេខាជាមួយគ្នា កាលពី ២ឆ្នាំមុន។ កិច្ចព្រមព្រៀងស្តីពីកិច្ចសហប្រតិបត្តិការយុទ្ធសាស្រ្ត និងពាណិជ្ជកម្មរយៈពេល ២៥ឆ្នាំ ដែលផ្តោតទៅលើផ្នែកថាមពល សន្តិសុខព័ត៌មានវិទ្យា និងហេដ្ឋារចនាសម្ព័ន្ធ មានតែនៅលើក្រដាស តែប៉ុណ្ណោះ នៅរយៈពេល ២ឆ្នាំមកនេះ។
ទស្សនកិច្ចរបស់ប្រធានាធិបតីអ៊ីរ៉ង់នៅប្រទេសចិន ធ្វើឡើងនៅក្នុងកាលៈទេសៈមួយ ដែលអ៊ីរ៉ង់កំពុងរងការចោទប្រកាន់ពីអាមេរិកថា បានបញ្ជូន ដ្រូន និងបង្កើនសហប្រតិបត្តិការយោធាជាមួយ រុស្ស៊ី ដែលកំពុងធ្វើសង្រ្គាមឈ្លានពានអ៊ុយក្រែន។
ចិនវិញ មិនបានចូលរួមថ្កោលទោសសង្រ្គាមរុស្ស៊ីឈ្លានពានអ៊ុយក្រែន និងមិនបានចូលរួមដាក់ទណ្ឌកម្មសេដ្ឋកិច្ចទៅលើរុស្ស៊ី ដូចប្រទេសលោកខាងលិច ប៉ុន្តែ ចិនអះអាងថា ខ្លួនបដិសេធមិនបញ្ជូនសព្វាវុធជួយរុស្ស៊ី។
ចិនចង់អូសទាញអ៊ីរ៉ង់ឲ្យនៅក្នុងអង្គការSCO និង BRICS
កិច្ចព្រមព្រៀងស្តីពីកិច្ចសហប្រតិបត្តិការយុទ្ធសាស្រ្ត និងពាណិជ្ជកម្មរយៈពេល ២៥ឆ្នាំ ដែលចិនបានចុះហត្ថលេខាជាមួយអ៊ីរ៉ង់ កាលពីឆ្នាំ ២០២១ ជាផ្នែកមួយនៃយុទ្ធសាស្រ្តពង្រឹងផ្លូវមួយ ខ្សែក្រវ៉ាត់មួយ ដែលលោកប្រធានាធិបតីស៊ី ជីនពីងបានប្រកាសបង្កើតឡើង នៅពេលចូលកាន់តំណែងដំបូង នៅឆ្នាំ ២០១៣។
ជាមួយអ៊ីរ៉ង់ ដែលកំពុងឯកោរ ដោយសារការដាក់ទណ្ឌកម្មសេដ្ឋកិច្ចរបស់ប្រទេសលោកខាងលិច ជាពិសេសអាមេរិក ចិនសំឡឹងឃើញសម្ព័ន្ធមិត្តមួយទៀត ដែលចិនដែលអាចជួយឲ្យចិនមានកម្លាំង ប្រឈមទប់ទល់នឹងអាមេរិក។
ដើម្បីប្រមូលកម្លាំងទប់ទល់ក្រុមលោកខាងលិច ក្រុមប្រទេសមហាអំណាចឧស្សាហកម្ម ហ្សេ ៧ជាដើម ដែលនាំមុខ ដោយអាមេរិក ចិនបានចេញមុខពង្រឹងបក្សសម្ព័ន្ធមួយទៀត គឺ SCO អង្គការសហប្រតិបត្តិការសៀងហៃ និងBRICS។ ដើម្បីជំរុញឲ្យបក្សសម្ព័ន្ធដែលចិនជាអ្នកផ្តួចផ្តើមគំនិតបង្កើតឡើង ចិនបានជំរុញ គាំទ្រ អ៊ីរ៉ង់បានបានក្លាយជាសមាជិកទី៩ របស់អង្គការសហប្រតិបត្តិការសៀងហៃ នៅឆ្នាំ ២០២១។ ឥលូវនេះ ចិនកំពុងបញ្ចុះបញ្ចូលឲ្យសមាជិកដទៃទៀត របស់BRICS ដែលមានឥណ្ឌា រុស្ស៊ី ប្រេស៊ីល និងអាហ្វ្រិកខាងត្បូង យល់ព្រមទទួលយកអ៊ីរ៉ង់ជាសមាជិកមួយទៀត។ គោលដៅរបស់ចិន គ្មានអ្វីក្រៅពីប្រមែប្រមូល ប្រទេសដែលជាសត្រូវរបស់អាមេរិក ឲ្យមកនៅក្នុងក្រុមខ្លួននោះទេ។
ចិន និងអ៊ីរ៉ង់ មិនមែនល្អូកល្អឺននឹងគ្នាគ្រប់រឿង
ទណ្ឌកម្មរបស់អាមេរិក និងទំនាក់ទំនងមិនសូវរលូនសហភាពអឺរ៉ុប បានធ្វើឲ្យចិន ក្លាយជាដៃគូ មិនខ្វះបានរបស់អ៊ីរ៉ង់។ ប៉ុន្តែ មិនមែនមានន័យថា អ៊ីរ៉ង់យល់ស្រប ជាមួយចិនគ្រប់រឿងនោះទេ។ ដំណើរទស្សនកិច្ចរបស់ប្រធានាធិបតី អ៊ីរ៉ង់ លោកអេប្រាហ៊ីម រ៉ៃស៊ីទៅចិន ធ្វើឡើងនៅតែ ២ខែក្រោយ អ៊ីរ៉ង់បានកោះហៅឯកអគ្គរដ្ឋទូតចិននៅតេហេរ៉ង់ ដើម្បី សំដែងការមិនសប្បាយចិត្តរបស់អ៊ីរ៉ង់ ទាក់ទងនឹងជំហរចម្រូងចម្រាសរបស់លោកប្រធានាធិបតីចិន ស៊ី ជីនពីង នៅពេលលោក ធ្វើទស្សនកិច្ចនៅប្រទេសអារ៉ាប់ កាលពីខែធ្នូ។ នៅក្នុងជំនួបកំពូលជាមួយមេដឹកនាំអារ៉ាប់ លោកស៊ីជីនពីងបានចុះហត្ថលេខាលើសេចក្តីថ្លែងការណ៍រួម ដែលនៅក្នុងនោះ មានការអំពាវនាវឲ្យមេដឹកនាំអារ៉ាប់ចរចាជាមួយភាគី អ៊ីរ៉ង់ ស្តីពីជម្លោះដណ្តើមកោះ នៅច្រកសមុទ្រ Ormuz។
អ៊ីរ៉ង់មិនសប្បាយចិត្តដែលឃើញចិនលូកដៃក្នុងរឿងនេះ ព្រោះថា កោះទាំងបី ដែលអេមីរ៉ាត អារ៉ាប់រួម ទាមទារចង់បាន ជាកម្មសិទ្ធិគ្រប់គ្រងដោយអ៊ីរ៉ង់ តាំងពីឆ្នាំ ១៩៧១មកម្ល៉េះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ