រុស្ស៊ីឡើងជាប្រធានផ្លាស់វេនក្រុមប្រឹក្សាសន្តិសុខអ.ស.ប. ក្នុងបរិបទសង្គ្រាមនៅអ៊ុយក្រែន
ចុះផ្សាយនៅថ្ងៃ៖
ស្តាប់ - ០៧:៣៥
រុស្ស៊ីដែលទើបអនុម័តយុទ្ធសាស្ត្រសកលប្រឆាំងនឹងបស្ចិមលោក ត្រូវក្លាយជាប្រធានផ្លាស់វេនក្រុមប្រឹក្សាសន្តិសុខអង្គការសហប្រជាជាតិ ចាប់ពីថ្ងៃទី១មេសានេះ និងសម្រាប់រយៈពេលមួយខែពេញ។ ជាប្រធានដែលសមាជិកអចិន្ត្រៃយ៍ទាំងអស់របស់ក្រុមបឹក្សាមិនរាប់រក ព្រោះតែរុស្ស៊ីនេះបានធ្វើសង្គ្រាមចូលឈ្លានពានអ៊ុយក្រែន។ សម្រាប់អ៊ុយក្រែន និងប្រទេសជាមិត្តមួយចំនួន រុស្ស៊ីមិនគួរមានកិត្តិយសធ្វើជាប្រមុខផ្លាស់វេននៃស្ថាប័នកំពូលរបស់អង្គការសហប្រជាជាតិទេ។ ក្នុងនាមជាប្រធានតើរុស្ស៊ីអាចមានអំណាចនិងឥទ្ធិពលអ្វីខ្លះ ?
សំឡេងប្រឆាំងក៏មាន សំឡេងអំពាវនាវឱ្យប្រទេសសមាជិកក្រុមប្រឹក្សាធ្វើពហិការមិនចូលប្រជុំក៏មាន សំឡេងប្រកូកប្រកាសធ្វើបាតុកម្មនៅតាមរដ្ឋធានីនៃបណ្តាប្រទេសជាសមាជិកអចិន្ត្រៃយ៍នៃក្រុមប្រឹក្សាសន្តិសុខ ដូចជានៅក្រុងឡុងដ៍ នារសៀលថ្ងៃនេះ ក៏មាន។ ពិតជាសកម្មភាពប្រកបដោយនិម្មិតរូបមែន។
នេះជាប្រតិកម្មធម្មតាទេ នៅចំពោះមុខរុស្ស៊ី ដែលកាលពីឆ្នាំទៅបានបំពានធម្មនុញ្ញសន្តិភាពរបស់អង្គការសហប្រជាជាតិ និងគោលការណ៍ច្បាប់អន្តរជាតិ ដោយប្រើកម្លាំងយោធាចូលទៅឈ្លានពានប្រទេសអ៊ុយក្រែនឯករាជ្យមួយនោះ។ នៅអង្គការសហប្រជាជាតិ រុស្ស៊ីបានអះអាងដោយផ្ទាល់ថាខ្លួនត្រូវប្រឈមនឹងក្រុមបស្ចិមលោកដែលរួមគ្នាដាក់រុស្ស៊ីឱ្យនៅឯកាតាំងពីបានចូលលុកលុយអ៊ុយក្រែនមក។ ជាងនេះទៀត ម្សិលមិញ រុស្ស៊ីបានអនុម័ត យុទ្ធសាស្ត្រសកលប្រឆាំងនឹងបស្ចិមលោក ថាជាការគំរាមកំហែងអត្ថិភាពរបស់រុស្ស៊ី។
សម្រាប់អ៊ុយក្រែន ឱ្យរុស្ស៊ីធ្វើប្រធានក្រុមប្រឹក្សាសន្តិសុខ ចាប់ពីថ្ងៃទី១មេសា ពិតជារឿងកំប្លែងដ៏អាក្រក់បំផុត។ ការរិះគន់ក៏មានខ្លាំងសម្បើមដែរមកពីខាងអាមេរិក។ ឯកអគ្គរដ្ឋទូតអាមេរិកប្រចាំអង្គការសហប្រជាជាតិ បានលើកឡើងថា យោលទៅ លើទង្វើរបស់រុស្ស៊ីលើអ៊ុយក្រែន រុស្ស៊ីមិនគួរមានឈ្មោះជាសមាជិកអចិន្ត្រៃយ៍នៃក្រុមប្រឹក្សាសន្តិសុខផង ប៉ុន្តែគួរឱ្យស្តាយ ធម្មនុញ្ញអង្គការសហប្រជាជាតិមិនអនុញ្ញាតឱ្យមានការប្តូរផ្លាស់លក្ខន្តិកៈសមាជិកអចិន្ត្រៃយ៍ទេ។
យន្តការនៃប្រធានផ្លាស់វេនក្រុមប្រឹក្សាសន្តិសុខ
ជាស្ថាប័នមួយក្នុងចំណោមស្ថាប័នទាំង៦របស់អង្គការសហប្រជាជាតិ ក្រុមប្រឹក្សាសន្តិសុខមានអំណាចចេញសេចក្តីសម្រេច ឱ្យប្រទេសជាសមាជិកអង្គការសហប្រជាជាតិទាំងអស់អនុវត្តតាម។ ក្រុមប្រឹក្សាមានសមាជិកសរុប១៥ប្រទេស ៖ ៥ជាសមាជិកអចិន្ត្រៃយ៍ ( អាមេរិក បារាំង អង់គ្លេស ចិន និងរុស្ស៊ី) និងសមាជិកមិនអចិន្ត្រៃយ៍១០ប្រទេសទៀត ដែលមានអាណត្តិពីរឆ្នាំ និងបោះឆ្នោតជ្រើសតាំងចំនួនពាក់កណ្តាលជារៀងរាល់ឆ្នាំ។
តាមវិធាន សមាជិក អចិន្ត្រៃយ៍ និងមិនអចិន្រ្តៃយ៍ ត្រូវផ្លាស់ប្តូរគ្នាធ្វើជា ប្រធានដឹកនាំក្រុមប្រឹក្សាសន្តិសុខ ម្នាក់ម្តងៗ សម្រាប់រយៈពេលមួយខែ តាមលំដាប់លំដោយឈ្មោះប្រទេសជាភាសាអង់គ្លេស។ រុស្ស៊ីបន្តតំណែងពីប្រទេសមូសំប៊ិច នៅខែមេសានេះ ហើយខែក្រោយនឹងដល់វេនប្រទេសស្វីសម្តង តៗគ្នា...
កាលពីខែកុម្ភៈឆ្នាំទៅ រុស្ស៊ីក៏ជាប្រធានផ្លាស់វេនក្រុមប្រឹក្សាសន្តិសុខដែរ ហើយគឺនៅខែនោះតែម្តងដែលរុស្ស៊ីបានលើកទ័ពចូលវាយប្រហារអ៊ុយក្រែន។ តាំងពីពេលនោះមក សកម្មជនគាំទ្រអ៊ុយក្រែននិងសមាជិកសភាផ្សេងៗ ចង់សុំឱ្យបណ្តេញរុស្ស៊ីចេញពីក្រុមប្រឹក្សាសន្តិសុខ ប៉ុន្តែជាសំណើដែល គឺ មិនអាចទៅរួចសោះ ព្រោះបើតាមអ្នកជំនាញ សំណើនឹងត្រូវឆ្លងកាត់ការបោះឆ្នោតនៅក្រុមប្រឹក្សាសន្តិសុខ ហើយរុស្ស៊ីច្បាស់ជានឹងប្រើសិទ្ធិវេតូប្រឆាំង។ ដូច្នេះធ្វើម្តេចនឹងអាចបណ្តេញរុស្ស៊ីកើត !
ប៉ុន្តែវាដូចជាការចាក់បញ្ឈឺពេក ! ក្នុងខណៈដែលប្រទេសជាច្រើនយល់ថារុស្ស៊ីជាអ្នកគំរាមកំហែងសន្តិភាព ស្រាប់តែរុស្ស៊ីក្លាយជាប្រធានផ្លាស់វេនស្ថាប័នរបស់អង្គការសហប្រជាជាតិទទួលបន្ទុកស្វែងរកសន្តិភាពទៅវិញ។
ប្រធានាធិបតីពូទីន អាចទាញប្រយោជន៍ពីអ្វីខ្លះ ពីតួនាទីរុស្ស៊ីជាប្រធានផ្លាស់វេនក្រុមប្រឹក្សាសន្តិសុខ ?
អ្វីដែលជាកង្វល់ខ្លាំង គឺចំណុចនេះឯង។ គេខ្លាចរុស្ស៊ីប្រើតួនាទីជាប្រធានផ្លាស់វេន សម្រាប់ជាប្រយោជន៍ផ្ទាល់ ដោយអាចបំប៉ោងបំពងឃោសនា បំភ្លៃព័ត៌មានជុំវិញសង្គ្រាមនៅអ៊ុយក្រែន ទៅកាន់ពិភពលោកផង និងបង្ហាញខ្លួនលើឆាកអន្តរជាតិ បិទបាំងភាពឯការបស់ខ្លួនព្រមទាំងសាកល្បងបង្វែរចំណាប់អារម្មណ៍ពិភពលោក ដើម្បីការពារទង្វើរបស់ខ្លួនលើអ៊ុយក្រែន។ រុស្ស៊ី តាមគម្រោងនឹងរៀបចំជំនួបប្រជុំក្រុមប្រឹក្សាសន្តិសុខក្រៅផ្លូវការមួយនៅដើមខែមេសា ដើម្បីបង្ហាញអំពី “ស្ថានភាពពិត” របស់កុមារអ៊ុយក្រែននៅរុស្ស៊ី ដែលត្រូវបានបង្ហើបឱ្យដឹងដោយតុលាការព្រហ្មទណ្ឌអន្តរជាតិ ពេលចេញដីកាតាមចាប់ខ្លួនលោកពូទីន ពីបទប្រព្រឹត្តឧក្រិដ្ឋកម្មសង្គ្រាមជម្រិតក្មេង។
បើតាមអ្នកនាំពាក្យ ប្រមុខការទូតរុស្ស៊ី លោក ស៊ែកហ្គៃ ឡាវ្រូស នឹងដឹកនាំកិច្ចប្រជុំក្រុមប្រឹក្សាសន្តិសុខនៅខែមេសានេះ។ រដ្ឋមន្ត្រីការបរទេសរុស្ស៊ីក៏នឹងដឹកនាំព្រឹត្តិការណ៍ដ៏សំខាន់មួយទៀត គឺការប្រជុំតស៊ូមតិជាសាធារណៈស្តីពី ប្រសិទ្ធភាពនៃពហុនិយមដោយការពារគោលការណ៍ធម្មនុញ្ញអង្គការសហប្រជាជាតិ។ នៅថ្ងៃទី ២៥មេសា លោក ឡាវ្រូសនឹងបើកសម័យប្រជុំជុំវិញប្រធានបទដើមបូព៌ាទៀត។
ក្នុងនាមជាប្រធានផ្លាស់វេន រុស្ស៊ីអាចស្នើ និងទទួលយកសំណើពីសមាជិក ក្នុងការសម្រេចប្រកាសបើកប្រជុំបន្ទាន់នានាមែន ប៉ុន្តែ ការឡើងធ្វើជាប្រធាន មិនមែនជារឿងអស្ចារ្យឡើយ ព្រោះនេះជាយន្តការធម្មតារបស់ស្ថាប័នទេ។
យ៉ាងណាមិញ តួនាទីជាប្រធានផ្លាស់វេនរបស់រុស្ស៊ី មិនអាចផ្តល់ប្រយោជន៍អ្វីបានលើសពីទម្លាប់ ដល់មូស្គូឡើយ។ លោកពូទីន មិនអាចប្រើតួនាទីនេះបានទេ ព្រោះគ្រប់សមាជិកនៃក្រុមប្រឹក្សាសន្តិសុខសុទ្ធតែមានសិទ្ធិបញ្ចេញមតិ និងសំឡេងដូចគ្នាក្នុងពេលប្រជុំក្រុមប្រឹក្សា ហើយសហរដ្ឋអាមេរិក បារាំង អង់គ្លេស ច្បាស់ជានឹងមិនផ្តល់យោបល់ស្របជាមួយរុស្ស៊ីទេ មិនថាជាសំណុំរឿងអ៊ុយក្រែនឬសំណុំរឿងលើពិភពលោកផ្សេងទៀតឡើយ។ បើរុស្ស៊ីហ៊ានបញ្ចូលសំណើអ្វីមួយដែលមិនសម អាមេរិកនិងសមាជិកផ្សេងទៀតក៏ប្រមូលសំឡេងរារាំងរុស្ស៊ីមិនឱ្យធ្វើអ្វីស្រេចតែនឹងចិត្តបានដែរ។
ការពិតមួយដែលមិនអាចប្រកែកបានមួយគឺ ប្រសិនបើសមាជិកអចិន្ត្រៃយ៍នៃក្រុមប្រឹក្សាសន្តិសុខណាមួយ លូកដៃឬមានពាក់ព័ន្ធនឹងជម្លោះប្រដាប់អាវុធ ក្រុមប្រឹក្សាសន្តិសុខមិនអាចធ្វើអ្វីចេញសម្រាប់រារាំងទេ ព្រោះភាគីពាក់ព័ន្ធនោះមានសិទ្ធប្រឆាំងវេតូ ដូចករណីរុស្ស៊ីធ្វើលើអ៊ុយក្រែន ដូចចិនធ្វើលើតៃវ៉ាន់ និងដូចអាមេរិកធ្វើនៅអាហ្វហ្កានីស្ថាន និងអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ