អ្នកជំនាញ៖ជំហររបស់បេឡារុសចំពោះរុស្ស៊ីមិនមែនជារឿងងាយស្រួល និងបង្កប់ដោយហានិភ័យចំពោះខ្លួនឯង
នៅក្នុងប្រទេសបេឡារុស ប្រធានាធិបតីលោកអាឡិចសង់ លូកាឆេនកូបានថ្លែងក្នុងថ្ងៃសុក្រ ទី៣១ មីនាថា បេឡារុសត្រៀមខ្លួនរួចហើយដើម្បីឲ្យរុស្ស៊ីដាក់ពង្រាយអាវុធនុយក្លេអ៊ែរយុទ្ធសាស្រ្តបន្ថែមពីលើអាវុធនុយក្លេអ៊ែរតាក់តិក។ លោកលូកាឆេនកូបានថ្លែងដូចនេះនៅក្នុងសុន្ទរកថាទៅកាន់ប្រជាជាតិ។ ដោយបានតាំងខ្លួនជាសម្ព័ន្ធមិត្តចាក់ទឹកមិនលេចរបស់ប្រធានាធិបតីរុស្ស៊ីលោកពូទីន លោកលូកាឆេនកូបានចេញមុខព្រមានបស្ចិមលោកដែលកំពុងព្យាយាមកម្ទេចបេឡារុស និងរុស្ស៊ីពីខាងក្នុង និងពីខាងក្រៅ។ ការថ្លែងរបស់លោកលូកាឆេនកូនេះបានធ្វើឡើង បន្ទាប់ពីលោកពូទីនបានប្រកាសពីគម្រោងការដាក់ពង្រាយអាវុធនុយក្លេអ៊ែរតាក់តិកនៅលើទឹកដីបេឡារុស។ គួរបញ្ជាក់ថា បេឡារុសដែលបានដឹកនាំដោយលោកលូកាឆេនកូតាំងពីឆ្នាំ ១៩៩៤ ជាសម្ព័ន្ធមិត្តតែមួយគត់របស់រុស្ស៊ីនៅអឺរ៉ុប។ លោកនីកូឡា ទែនស្ហឺ អ្នកជំនាញយុទ្ធសាស្រ្ត និងជាសាស្រ្តាចារ្យនៅសាកលវិទ្យាល័យវិទ្យាសាស្រ្តនយោបាយក្រុងប៉ារីសបានយល់ឃើញថា ជំហររបស់ប្រធានាធិបតីបេឡារុសមិនមែនជារឿងងាយស្រួល និងបង្កប់ដោយហានិភ័យចំពោះខ្លួនឯង។
ចុះផ្សាយនៅថ្ងៃ៖
ស្តាប់ - ០១:៤៤
« ការដែលលោកអាឡិចសង់ លូកាឆេនកូបានយល់ព្រមឲ្យរុស្ស៊ីដាក់ពង្រាយអាវុធនុយក្លេអ៊ែរតាក់តិកលើទឹកដីបេឡារុសនាពេលកន្លងទៅនេះ លោកលូកាឆេនកូបានរំលោភបំពានលើរដ្ឋធម្មនុញ្ញឆ្នាំ ១៩៩០ ផង និងរំលោភបំពានលើអនុស្សរណៈក្រុងប៊ុយដាប៉ែសឆ្នាំ ១៩៩៤ ផង។ ក្រៅពីការបំពានទាំងពីរខាងលើដោយខុសច្បាប់ លោកលូកាឆេនកូក៏បានលួចបន្លំសន្លឹកឆ្នោតនៅក្នុងបោះឆ្នោតខ្លួនឯងដែរ។
ការអនុញ្ញាតឲ្យរុស្ស៊ីដាក់ពង្រាយអាវុធនុយក្លេអ៊ែរយុទ្ធសាស្រ្ត និងតាក់តិកលើទឹកដីបេឡារុស លោកអាឡិចសង់ លូកាឆេនកូកំពុងមានជំហរមួយដែលលោកចាំបាច់ត្រូវតែបំពេញចិត្ត បំពេញថ្លើមប្រធានាធិបតីរុស្ស៊ីលោកពូទីន។ តែលោកលូកាឆេនកូខ្លួនឯងក៏បានដឹងដែរថា គាត់កំពុងស្ថិតនៅក្នុងជម្រើសដែលសឹងតែមិនអាចទៅរួច។ ឬមួយលោកលូកាឆេនកូបន្តរក្សាភាពស្មោះស្ម័គ្រ ស៊ូស្លាប់ រស់របស់គាត់ជាមួយប្រធានាធិបតីរុស្ស៊ីលោកពូទីន។
ឬមួយក៏លោកលូកាឆេនកូសម្រេចមិនគាំទ្រលោកពូទីន ១០០% និងហ៊ានចេញមុខប្រឆាំងលោកពូទីនបន្តិច។ ក្នុងករណីនេះ លោកពូទីនអាចសម្រេចបោះបង់ចោលលោកលូកាឆេនកូ។ ផ្ទុយទៅវិញ បើលោកលូកាឆេនកូសន្យាសហការជាមួយលោកពូទីនខ្លាំងជ្រុល ហើយបើរុស្ស៊ីចាញ់សង្រ្គាមនៅអ៊ុយក្រែននោះ លោកលូកាឆេនកូក៏ដឹងថាអំណាចរបស់លោកក៏នៅមិនយូរដែរ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ