ចិនបើកសមយុទ្ធ ដើម្បីហាត់សមចូលឡោមព័ទ្ធកោះតៃវ៉ាន់
ចុះផ្សាយនៅថ្ងៃ៖
ចិនប្រកាសបើកសមយុទ្ធរយៈពេល៣ថ្ងៃ ដោយចាប់ផ្តើម នៅថ្ងៃសៅរ៍នេះ នៅក្នុងបរិបទនៃភាពតានតឹងខ្លាំង រវាងចិន និងកោះតៃវ៉ាន់។ សមយុទ្ធរបស់ចិននឹងមានរួមបញ្ចូលការបាញ់គ្រាប់កាំភ្លើងពិតនៅច្រកសមុទ្រតៃវ៉ាន់ នៅថ្ងៃចន្ទដើមសប្តាហ៍ក្រោយ។ តាមសេចក្តីប្រកាសព័ត៌មានរបស់កងទ័ពរំដោះប្រជាជនចិន។ សមយុទ្ធរបស់ចិនធ្វើឡើងនៅ៣ថ្ងៃក្រោយ ចិនបានចេញមុខព្រមាន និងគំរាមតៃវ៉ាន់ ពីរឿងដែលប្រធានាធិបតីតៃវ៉ាន់ ចូលជួបប្រធានសភាអាមេរិក។ នៅថ្ងៃសៅរ៍នេះ ប្រធានាធិបតីតៃវ៉ាន់ លោកស្រី ត្សៃអ៊ីងវេន ដែលបានធ្វើដំណើរត្រលប់ចូលប្រទេសវិញ បាននិយាយបរិហាររិះគន់នយោបាយពង្រីកអំណាចផ្តាច់ការរបស់ចិន និងចាត់ទុកសមយុទ្ធរបស់ចិន ថា ជាការគំរាមកំហែងស្ថិរភាព និងសន្តិសុខនៅក្នុងតំបន់អាស៊ីប៉ាស៊ីហ្វិក។
កងទ័ពចិនបានប្រកាសបើកសមយុទ្ធបីថ្ងៃ ចាប់ផ្តើមនៅថ្ងៃសៅរ៍នៅច្រកសមុទ្រតៃវ៉ាន់។ សមយុទ្ធរបស់ចិន ដែលធ្វើឡើងនៅ៣ថ្ងៃក្រោយ ដែលប្រធានាធិបតីតៃវ៉ាន់ចូលជួបពិភាក្សាជាមួយប្រធានសភាអាមេរិក ដោយមិនខ្វល់ពីការគំរាមព្រមានរបស់ចិនដីគោក។ដើម្បីបង្ហាញកំហឹងក្រេវក្រោធ ដែលឃើញ ប្រធានាធិបតីតៃវ៉ាន់ លោកស្រី ត្សៃអ៊ីងវេន ធ្វើដំណើរទៅជួប ប្រធានសភាអ្នកតំណាងរាស្រ្តអាមេរិក ចិនធា្លប់បង្ហាញសាច់ដុំយោធា កាលពីថ្ងៃព្រហស្បតិ៍ និងថ្ងៃសុក្រ ដោយបានបញ្ជូននាវាចម្បាំង និងឧទ្ធម្ភាចក្រប្រឆាំងនាវាមុជទឹក នៅចរាចរ នៅជុំវិញតៃវ៉ាន់។
នៅចំពោះមុខនយោបាយផ្គើន របស់ប្រធានាធិបតីតៃវ៉ាន់ ដែលមិនខ្វល់ពីការគំរាម ព្រមានរបស់ចិន ដោយជំនះទៅជួប ប្រធានសភាអាមេរិក ចិនមានតែបន្តយុទ្ធសាស្រ្តបង្ហាញសាច់ដុំយោធា ដាក់តៃវ៉ាន់។ ចិនបានបញ្ជូននាវាចម្បាំងសរុបចំនួន ៤ គ្រឿង និងឧទ្ធម្ភាគចក្រប្រឆាំងនាវាមុជទឹកទៅបើកព័ទ្ធជុំវិញ កោះតៃវ៉ាន់នៅថ្ងៃព្រហស្បតិ៍ និងថ្ងៃសុក្រ ដើម្បីសំដែងការខឹងសម្បាររបស់ខ្លួន ប្រឆាំងនឹងជំនួបប្រធានាធិបតីតៃវ៉ាន់ និងប្រធានសភាងអ្នកតំណាងរាស្រ្តអាមេរិក ដែលជាបុគ្គលមានអំណាចធំទី៣នៅអាមេរិក បន្ទាប់ពីអនុប្រធានាធិបតី។
លោកស្រី ប្រធានាធិបតីតៃវ៉ាន់ ត្សៃ អ៊ីងវេន ក៏បានវិលត្រលប់ចូលប្រទេសវិញ តាំងពីថ្ងៃសុក្រ ដូច្នេះ ភាពតានតឹងក៏គួរតែធ្លាក់ថយចុះតាមនោះដែរ ប៉ុន្តែ វាមិនអីចឹងឯណា។ ទើបតែត្រលប់ដល់តៃវ៉ាន់ នៅថ្ងៃសុក្រ លោកស្រីប្រធានាធិបតីត្សៃអ៊ីងេវនបានទទួលជួប នៅថ្ងៃសៅរ៍នេះ គណៈប្រតិភូអាមេរិកសភាអាមេរិក ដែលដឹកនាំដោយលោក Michael McCaul អ្នកទទួលខុសត្រូវរឿងលក់អាវុធអាមេរិកទៅឲ្យបរទេស។ នៅក្នុងជំនួប ក្នុងទីក្រុងតៃប៉ិ នៅថ្ងៃសៅរ៍នេះ លោក Michael McCaul បានអះអាងថា អាមេរិកនឹងប្រឹងប្រែងបញ្ជូនសព្វាវុធ ដែលតៃវ៉ាន់បានកុម្ម៉ង់ទិញ ឲ្យបានឆាប់រហ័សបំផុត។
តាមលោក Michael McCaul សភាអាមេរិកនឹងប្រឹងប្រែងអស់សមត្ថភាពដើម្បីជំរុញការលក់សព្វាវុធឲ្យតៃវ៉ាន់ និងបណ្តុះបណ្តាលកងទ័ពតៃវ៉ាន់ឲ្យចេះប្រើអាវុធអាមេរិក ក្នុងគោលដៅសន្តិភាព ប៉ុន្តែ មិនមែនក្នុងគោលដៅសង្រ្គាម។
វត្តមានរបស់គណៈប្រតិភូសភាអាមេរិកនៅតៃវ៉ាន់ ជាពិសេសអ្នកទទួលខុសត្រូវផ្នែកលក់អាវុធទៅឲ្យតៃវ៉ាន់ ប្រាកដណាស់ដុតកំហឹងរបស់ចិន ព្រោះថា ប្រធានាធិបតីតៃវ៉ាន់ និងសភាអាមេរិក ជួបគ្នាមិនអស់ចិត្តនៅទឹកដីអាមេរិក ប៉ុន្តែ បន្តមកជួបគ្នា នៅតៃវ៉ាន់ទៀត។
សម្រាប់ អ្នកនាំពាក្យកងទ័ពចិន លោកShi Yi សមយុទ្ធលើកនេះ ជាសារព្រមាន ដាស់តឿនរបស់ចិន ដែលប្រឆាំងការឃុបឃិតគ្នារបស់ក្រុមបំបែកខ្លួន ដែលចង់ទាមទារឲ្យឯករាជ្យភាពឲ្យតៃវ៉ាន់ ជាមួយកម្លាំងទ័ពបរទេស។
ចិនធ្វើលំហាត់សឹកបែបចូលឡោមព័ទ្ធតៃវ៉ាន់
សមយុទ្ធរយៈពេល ៣ថ្ងៃ ដែលមានឈ្មោះថា ការរួបរួមដាវដ៏មុតស្រួច United sharp Sword នឹងប្រព្រឹត្តទៅរហូតដល់ថ្ងៃចន្ទ ថ្ងៃដែលកងទ័ពចិនបាញ់គ្រាប់កាំភ្ហើងពិតៗ នៅខេត្តFujian ខេត្តដែលស្ថិតចំពីមុខ កោះតៃវ៉ាន់។ នៅក្នុងសមយុទ្ធ ចិននឹងប្រើនាវាចម្បាំង កប៉ាល់បាញ់មីស៊ីល យន្តហោះចម្បាំង យន្តហោះចាក់សាំងលើអាកាស និងប្រព័ន្ធរំខានការចាប់សញ្ញា។
សមយុទ្ធលើកនេះគ្មានទ្រង់ទ្រាយធំ ដូចសមយុទ្ធ កាលពីខែ សីហា ឆ្នាំ មុន នៅពេលចិនបើកសមយុទ្ធបាញ់គ្រាប់មីស៊ីលជាច្រើនគ្រាប់ ដើម្បីប្រឆាំងទស្សនកិច្ចរបស់ប្រធានសភាអ្នកតំណាងរាស្រ្តអាមេរិក លោកស្រី ណាន់ស៊ី ពេឡូស៊ី នៅកោះតៃវ៉ាន់។ កាលណោះគ្រាប់មីស៊ីល មួយចំនួនរបស់ចិន នៅបានទៅហោះរំលង ប្រទេសជប៉ុន រហូតបង្កឲ្យមានការដំឡើងសំឡេងដាក់គ្នា និងភាពតានតឹងមួយរយៈ នៅក្នុងតំបន់។
ទោះសមយុទ្ធលើកនេះ គ្មានទ្រង់ទ្រាយធំ ដូចឆ្នាំមុន ប៉ុន្តែ វាខុសប្លែកបន្តិចត្រង់ថា វាមិនមែនត្រឹមសំដែងកំហឹងក្រេវក្រោធរបស់ចិន។ តាមទូរទស្សន៍ចិនដែលដកស្រង់សេចក្តីថ្លែងការណ៍របស់កងទ័ពចិន សមយុទ្ធរបស់កងទ័ពចិន ដែលធ្វើឡើងនៅភាគខាងជើង ខាងកើត និងខាងត្បូងតៃវ៉ាន់ ផ្តោតសំខាន់លើសមត្ថភាពរបស់កងទ័ពចិន ដើម្បីវាយចូលគ្រប់គ្រងដែនអាកាស ដែនសមុទ្រ និងព័ត៌មាន ដើម្បី ចូលឡោមព័ទ្ធកោះតៃវ៉ាន់។ សម្រាប់អ្នកវិភាគកងទ័ពចិន ដោយធ្វើលំហាត់សឹក ក្នុងរូបភាពវាយឡោមព័ទ្ធតៃវ៉ាន់ ចិនចង់បង្ហាញថា កងទ័ពចិនត្រៀមខ្លួន ជានិច្ច ក្នុងករណីដែលមានការញុះញង់ជាប់ជានិច្ចរបស់តៃវ៉ាន់ ដើម្បីដោះស្រាយបិទបញ្ចប់បញ្ហាកោះតៃវ៉ាន់។
តៃវ៉ាន់ថ្កោលទោសសមយុទ្ធបង្កហេតុរបស់ចិន
តាមក្រសួងការពារជាតិតៃវ៉ាន់ ចិនបញ្ជូននាវាចម្បាំង ៨គ្រឿង និងយន្តហោះចម្បាំង ៤២គ្រឿង ដែលក្នុងនោះ ២៩គ្រឿងបានហោះរំលោភចូលដែនអាកាសរបស់តៃវ៉ាន់ នៅថ្ងៃសៅរ៍នេះ។ ក្រសួងការពារជាតិតៃវ៉ាន់បាននិយាយថា តៃវ៉ាន់តាមដានជានិច្ចសកម្មភាពយោធារបស់ចិន និងបានចាត់វិធានការតបវិញ ដោយមានហេតុផលបំផុត។
ប្រតិកម្មតបនឹងសមយុទ្ធរបស់ចិន ប្រធានាធិបតីតៃវ៉ាន់ លោកស្រី ត្សៃអ៊ីងវេន ដែលទើបធ្វើដំណើរត្រលប់ចូលប្រទេសកាលពីថ្ងៃសុក្រ បាននិយាយបរិហាររិះគន់នយោបាយពង្រីកអំណាចផ្តាច់ការរបស់ចិន និងចាត់ទុកសមយុទ្ធរបស់ចិន ថា ជាការគំរាមកំហែងស្ថិរភាព និងសន្តិសុខនៅក្នុងតំបន់អាស៊ីប៉ាស៊ីហ្វិក។
នៅក្នុងសន្និសីទកាសែត នៅថ្ងៃវិលត្រលប់ពីទស្សនកិច្ចនៅអាមេរិក លោកស្រីប្រធានាធិបតីតៃវ៉ាន់អះអាងថា តៃវ៉ាន់ទុកឲ្យសហគមន៍អន្តរជាតិឃើញស្គាល់សាមគ្គីភាព របស់ប្រជាជនតៃវ៉ាន់ នៅចំពោះមុខការគំរាមកំហែង ដាក់សម្ពាធរបស់ចិន។
តើគេគួរព្រួយបារម្ភពីការធ្វើសមយុទ្ធបាញ់គ្រាប់ពិតរបស់ចិន?
នៅមុនធ្វើសមយុទ្ធបាញ់គ្រាប់ពិតៗ ភាគីចិនបានអំពាវនាវរួចហើយ ឲ្យរាល់កប៉ាល់ដឹកជញ្ជូនទាំងអស់ ផ្អាកការធ្វើដំណើរចរាចរ នៅច្រកសមុទ្រតៃវ៉ាន់ នៅថ្ងៃចន្ទ។ គ្រប់ក្រុមហ៊ុនដឹកជញ្ជូន មិនថា ផ្លូវទឹក និងផ្លូវអាកាសប្រហែលត្រូវស្តាប់តាម បើសិនគេចង់ជៀស មិនជួបបញ្ហា ដូចកាលពីឆ្នាំមុន ដែលត្រូវស្លន់ស្លោរដោយសារសមយុទ្ធបាញ់គ្រាប់មីស៊ីលរបស់ចិន នៅក្នុងតំបន់សមុទ្រតៃវ៉ាន់។
នៅក្នុងសមយុទ្ធ កាលពីខែសីហាឆ្នាំមុន ដើម្បីប្រតិកម្មប្រឆាំងនឹងទស្សនកិច្ចរបស់ប្រធានសភាអ្នកតំណាងរាស្រ្តអាមេរិកនៅតៃវ៉ាន់ ចិនធ្លាប់បាញ់គ្រាប់មីស៊ីលពិតៗ ដែលបានទៅរំខាន ដំណើរគោចររបស់កប៉ាល់សមុទ្រ និងយន្តហោះដឹកអ្នកដំណើរ។
ម្យ៉ាង ទោះទឹកសមុទ្រតៃវ៉ាន់អាចរំជួលដោយសាររលកកប៉ាល់ចម្បាំងរបស់ចិន ដែលត្រូវចូលរួមក្នុងសមយុទ្ធលើកនេះ ប៉ុន្តែ នៅម្តុំកោះក្បែរខេត្តFujian ដែលចិនត្រូវធ្វើសមយុទ្ធ គឺមិនរំជើបរំជួល ដោយសារការប្រកាសធ្វើសមយុទ្ធ។ នៅលើកោះ Pingtanរបស់ចិនដែលនៅជិតកោះតៃវ៉ាន់ជាងគេ អ្នកទេសចរចិននៅតែដើរកំសាន្តធម្មតានៅតាមឆ្នេរកំពង់ផែរ ដោយគ្មានបារម្ភពីរឿងសំឡេងគ្រាប់កាំភ្លើងនៅក្នុងសមយុទ្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ