សំណុំរឿងចិន-តៃវ៉ាន់និងសង្គ្រាមអ៊ុយក្រែន ជាស្នូលនៃកិច្ចប្រជុំរដ្ឋមន្ត្រីការបរទេសហ្សេ៧
ចុះផ្សាយនៅថ្ងៃ៖
កិច្ចប្រជុំថ្នាក់រដ្ឋមន្រ្តីនៃក្រុមប្រទេស ហ្សេ៧ កំពុងបន្តធ្វើនៅក្នុងប្រទេសជប៉ុនដោយនៅថ្ងៃអាទិត្យ ជាកិច្ចប្រជុំថ្នាក់រដ្ឋមន្រ្តីការបរទេស។ សំណុំបញ្ហាអន្តរជាតិជាច្រើន ដែល ប្រមុខការទូតទាំងនោះ នឹងជជែកគ្នា បែបយ៉ាងវិបត្តិសង្គ្រាមឈ្លានពាននៅអ៊ុយក្រែន, អធិករណ៍ថ្មីៗនៅកោះតៃវ៉ាន់, ការឡើងក្តាប់អំណាចរបស់ពួកតាលីបង់នៅអាហ្វហ្កានីស្ថាន , ការវាយប្រហារបង្ហូរឈាមថ្មីៗនៅភូមា, ការសាកល្បងសព្វាវុធរបស់កូរ៉េខាងជើង រួមទាំងបញ្ហាដ៏ចម្រូងចម្រាស់ជុំវិញឧក្រិដ្ឋកម្មព័ត៌មានវិទ្យា និងការបំភ្លៃបំភាន់ព័ត៌មាន។ ក្នុងចំណោមសំណុំវិបត្តិអន្តរជាតិទាំងនេះ គឺគេមើលឃើញថាបញ្ហាចិន-តៃវ៉ាន់ និងអ៊ុយក្រែន ជាប្រធានបទសំខាន់ខ្លាំង។
សំណុំរឿងចិន-តៃវ៉ាន់និងសង្គ្រាមអ៊ុយក្រែន
សំណុំបញ្ហាពីរនេះ ពាក់ព័ន្ធគ្នាខ្លាំង។ នៅអាស៊ី បញ្ហាចិន-តៃវ៉ាន់ នេះ ចម្រូងចម្រាស់ច្រើន ហើយរឹតតែត្រូវគេចាប់អារម្មណ៍ខ្លាំងទៀតនោះ គឺបន្ទាប់ពីប្រធានាធិបតីបារាំង អេម៉ានុយអែល ម៉ាក្រុង ដែលក្នុងដំណើរទស្សនិច្ចនៅប៉េកាំង ពីពេលថ្មីៗនេះ បានលើកឡើងថា «អឺរ៉ុបមិនត្រូវលូកដៃលង់ក្នុងវិបត្តិដែលពុំមែនជាបញ្ហារបស់ខ្លួនទេ»។ ដែលគេអាចបកស្រាយបានថា បើមានព្រឹត្តិការណ៍អ្វីមួយនៅក្នុងសំណុំរឿងតៃវ៉ាន់ អឺរ៉ុបមិនត្រូវលូកដៃទេ។ នេះជាអ្វីដែលធ្វើឲ្យពិភពលោកភ្ញាក់ផ្អើលនិងព្រួយពីបញ្ហាតៃវ៉ាន់ ហើយនិងធ្វើឲ្យប៉ះទង្គិចដល់សម្ព័ន្ធមិត្តផ្សេងទៀតនៅបស្ចិមប្រទេស និងបង្កជាជម្លោះពាក្យសម្តីផងរវាងអតីតប្រធានាធិបតីអាមេរិក ដូណាល់ ត្រាំ។
ជាក់ស្តែងពេលនេះ ប្រទេសជប៉ុន ដែលជាម្ចាស់ផ្ទះជំនួបកំពូលថ្នាក់រដ្ឋមន្ត្រីហ្សេ៧ ជប៉ុនគឺតែងតែលើកឡើងជាច្រើនលើកច្រើនសាពីក្តីបារម្ភខ្លាចថា «តំបន់អាស៊ីក្លាយទៅជាអ៊ុយក្រែន នៅថ្ងៃខាងមុខ»។ សម្តីនេះ ចេញពីមាត់របស់លោក ហ្វូមីអូ គីស៊ីដា នាយករដ្ឋមន្ត្រីជប៉ុនតែម្តង ដែលទំនងចង់មានសេចក្តីថា ព្រួយខ្លាច មហាយក្សចិន ធ្វើសង្គ្រាមប្រើកម្លាំងវាយយកកោះតៃវ៉ាន់ ដូចដែល រុស្ស៊ី ឈ្លានពានយកដី អ៊ុយក្រែន ដូច្នោះដែរ។
ហេតុដូច្នេះហើយ ជប៉ុន ដែលទទួលរងឥទ្ធិពលពីសង្គ្រាមនៅអ៊ុយក្រែន ដូចប្រទេសផ្សេងទៀតដែរ រដ្ឋបាលក្រុងតូក្យូបានជំរុញតាំងពីព្រឹត្តិការណ៍សង្គ្រាមដំបូងៗម្ល៉េះ ឲ្យអន្តរជាតិដាក់ទោសទណ្ឌកម្មលើរុស្ស៊ី ហើយជប៉ុន ក៏ជួយផ្តល់ជំនួយសម្ភារៈឲ្យកងទ័ពអ៊ុយក្រែន និងទទួលជនភៀសខ្លួនអ៊ុយក្រែនទៀតផង។ មិនតែប៉ុណ្ណោះ ជប៉ុនខ្លួនឯង បានបង្កើតកម្លាំងទ័ព និងពង្រឹងវិស័យយោធាយ៉ាងច្រើនសម្បើមមិនធ្លាប់មាន ដើម្បីការពារខ្លួនពីការគំរាមកំហែងរបស់ ចិន។
បញ្ហាតៃវ៉ាន់ ជាក្តីបារម្ភដែលគេមើលឃើញជាទូទៅ បារម្ភពីសន្តិសុខក្នុងតំបន់ និងព្រួយពីការប៉ះទង្គិចគ្នារវាងអាមេរិកនិងចិន។ ពីម្ខាង រដ្ឋបាលចិនប៉េកាំង មិនដែលលាក់លៀមនឹងអះអាងថា តៃវ៉ាន់ជាដីរបស់ខ្លួន ហើយនាពេលចុងក្រោយនេះ នៅផ្លូវសមុទ្រ ចិន ធ្វើសមយុទ្ធជាញឹកញយ។ ចិន ក៏ពឹតតែបង្ខិតកម្លាំងយោធាទៅក្បែរកោះតៃវ៉ាន់ ដែរ។ ករណីនេះ រដ្ឋមន្ត្រីការបរទេសអាល្លឺម៉ង់ បានបញ្ចេញការយល់ឃើញនៅថ្ងៃសុក្រថា ការចល័តទ័ពនិងសកម្មភាពរបស់ចិននៅក្បែរៗកោះតៃវ៉ាន់ គឺជាសេណារីយ៉ូអាក្រក់សម្រាប់ពិភពលោកទាំងមូល។
នៅម្ខាងទៀត សហរដ្ឋអាមេរិក ក៏មិនណយដែរ ក្រៅពីទទួលជួបជាមួយប្រធានាធិបតីតៃវ៉ាន់ អាមេរិក ក៏រឹតតែប្រឹងពង្រឹងនិងពង្រីកកម្លាំងយោធានៅហ្វីលីពីន ហើយ បង្កើតមូលដ្ឋានយោធា៤ថែមទៀត នៅហ្វីលីពីន ដែលប្រទេសនេះ នៅកៀកនឹងតៃវ៉ាន់ជាកេ។ មិនតែប៉ុណ្ណោះ រដ្ឋមន្ត្រីការបរទេសអាមេរិក មុននឹងទៅប្រជុំថ្នាក់រដ្ឋមន្ត្រីការបរទេសនៅជប៉ុន ក៏បានឆ្លៀតស្កាត់ទៅវៀតណាម វៀតណាមដែលគូប្រជែកមួយរបស់ចិន ហើយមានជម្លោះស្រាប់ជាមួយចិនក្នុងសំណុំវិបត្តិសមុទ្រចិនខាងត្បូង។ ប្រមុខទូតអាមេរិកនៅហាណូយ បានប្រកាសពីដៃគូសហការជាយុទ្ធសាស្ត្រជាមួយវៀតណាម ទៀតផង។
ហេតុដូច្នេះហើយ គឺជៀសមិនផុតដែលរដ្ឋមន្ត្រីការបរទេសនៃប្រទេសមានសេដ្ឋកិច្ចជឿនលឿន ត្រូវយកមិនពិភាក្សាគ្នា។
បញ្ហាសង្គ្រាមអ៊ុយក្រែន
ការវិវត្តថ្មី គឺកើតចេញពីដំណើរទស្សនកិច្ចដ៏ចម្រូងចម្រាសរបស់ប្រមុខរដ្ឋបារាំងទៅប៉េកាំង។ នៅថ្ងៃទី១៥មេសា ប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី បានប្រកាសឲ្យដឹងតាមប្រព័ន្ធតេលេក្រាម ថាលោកបានជជែកគ្នាតាមទូរសព្ទ ជាង១ម៉ោងកន្លះ ជាមួយនឹងប្រធានាធិបតីបារាំង អេម៉ានុយអែល ម៉ាក្រុង។ ការជជែកគ្នានេះ គឺស្តីពីជុំវិញដំណើរថ្មីៗរបស់លោក ម៉ាក្រុង ទៅប្រទេសចិន។ ចិន ដែលគេមើលឃើញថាស្និទ្ធនឹងរុស្ស៊ី។
ប្រភពពីវិមានប្រធានាធិបតីបារាំង គឺ «ប្រមុខរដ្ឋអ៊ុយក្រែននិងបារាំង បានពិភាក្សាគ្នាពីការគម្រោងការរៀបចំកិច្ចប្រជុំកំពូល១ស្តីពីសន្តិភាព»។
សារស្រដៀងគ្នានេះ គឺ ២ថ្ងៃមុននេះ ប្រធានាធិបតីប្រេស៊ីល លោក លូឡា ដែលមានទឹកមាត់ប្រៃនៅក្នុងតំបន់អាមេរិកឡាទីន បានអញ្ជើញបំពេញទស្សនកិច្ចនៅប្រទេសចិន និងពីទីក្រុងប៉េកាំង លោកប្រមុខរដ្ឋប្រេស៊ីល បានប្រកាសសូមឲ្យសហរដ្ឋអាមេរិកឈប់លើកទឹកចិត្តឲ្យបន្តសង្គ្រាមនៅអ៊ុយក្រែន ហើយងាយកមកចាប់ផ្តើមជជែកគ្នាពីសន្តិភាព។ ដូចគ្នានេះដែរ ប្រធានាធិបតីប្រេស៊ីល លោក លូឡា ក៏បានដាស់តឿន សហភាពអឺរ៉ុប លោកខាងលិច ឲ្យចាប់ផ្តើមរកផ្លូវចរចាបញ្ចប់សង្គ្រាមអ៊ុយក្រែន។
សញ្ញាណថ្មីដែលគួរឲ្យភ្ញាក់ផ្អើលមួយទៀត គឺពីខាងរុស្ស៊ី។ អ្នកឆ្លើយឆ្លងព័ត៌មានវិទ្យុបារាំងប្រចាំរដ្ឋធានីម៉ូស្កូ Julian Colling បានរាយការណ៍មកថា លោកEvguéni Prigojine ប្រធានក្រុមហ៊ុនទាហានស៊ីឈ្នួលច្បាំងរុស្ស៊ី Wagner បានប្រកាសក្នុងសេចក្តីថា ការបញ្ចប់«ប្រតិបត្តិការសឹក»ជាជម្រើសល្អបំផុត។ ក្នុងសេចក្តីប្រកាសនោះ គឺទ័ពរុស្ស៊ីនៅតែប្រើគ្រប់មធ្យោបាយការពារដែនដីដែលដណ្តើមកាន់កាប់បាន។ ប៉ុន្តែ គេបានដឹងដែរថា ភាគីរុស្ស៊ីបាត់បង់កម្លាំងទាហាន ប្រមាណ ៣០ ម៉ឺននាក់ដែលពាលីជីវិតនៅសមរភូមិអ៊ុយក្រែន។ ដែលចំនួននេះ គឺជាការខាត់បង់ធំ សម្រាប់ប្រធានក្រុមហ៊ុនទាហានស៊ីឈ្នួលច្បាំង Wagner ។
នៅថ្ងៃអាទិត្យ ទី១៦មេសា អាជ្ញាធរអ៊ុយក្រែន បានប្រកាសថាឈ្លើយសឹកអ៊ុយក្រេន ប្រមាណ១៣០នាក់ ត្រូវរុស្ស៊ីដោះលែង។ ហើយភាគីរុស្ស៊ី ក៏បញ្ជាក់ដែរ ថាទាហានឈ្លើយសឹករុស្ស៊ី ជាង១នាក់ ត្រូវខាងអ៊ុយក្រែនដោះលែងដែរ។ នេះគឺក្នុងឱកាសបុណ្យសែនផ្នូររំលឹកវិញ្ញាណក្ខន្ធ Pâque orthodoxe។
សំណួរដែលអាចចោទសួរនៅពេលនេះ គឺតាមរយៈធាតុផ្សំផ្សេងៗនិងការវិវត្តថ្មីទាំងនេះ តើវានឹងជំរុញឲ្យសង្គ្រាមនៅអ៊ុយក្រែនឆាប់ចប់ ហើយនិងបើកកិច្ចពិភាក្សាចរចាពីសន្តិភាព ដែរឬទេ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ