ប្រទេស G7 អំពាវនាវឲ្យកាត់បន្ថយការប្រើប្រាស់ឧស្ម័ន និងជំរុញការផលិតថាមពលកកើតឡើងវិញ
ថ្ងៃសៅរ៍ទី១៥មេសា ប្រទេសសេដ្ឋកិច្ចជឿនលឿន G៧ បានយល់ព្រមគ្នាកាត់បន្ថយការប្រើប្រាស់ឧស្ម័ន ហើយនិងជំរុញឲ្យបង្កើនការផលិតថាមពលអគ្គិសនី ចេញពីថាមពលស្អាតកកើតឡើងវិញ។ ទន្ទឹមនឹងគ្នានេះ ប្រទេស G៧ មូលមាត់គ្នាចូលរួមកាត់បន្ថយឲ្យបានលឿនឆាប់នូវការបញ្ចេញផ្សែង ហើយនិងសន្យាប្តេជ្ញាមិនសាងសង់រោងចក្រថាមពលធ្យូងថ្ម បន្ថែមទៀតទេ។ ទាំងនេះ បើយោងតាមការប្រកាសឲ្យដឹងពីសំណាក់រដ្ឋមន្ត្រីថាមពលបារាំង ដែលបានចូលរួមកិច្ចប្រជុំថ្នាក់រដ្ឋមន្ត្រី G៧ នៅប្រទេសជប៉ុន។
ចុះផ្សាយនៅថ្ងៃ៖
ស្តាប់ - ០២:៤៧
ប្រទេសមានសេដ្ឋកិច្ចជឿនលឿន G ៧ ប្តេជ្ញាចិត្តបន្ថយការប្រើឧស្ម័ន កាត់កាត់បន្ថយនិងសន្សំថាមពល ហើយ ជំរុញការផលិតថាមពលស្អាត។ សេចក្តីនេះ គឺត្រូវបង្ហើបឲ្យដឹងតាមរយៈ អ្នកស្រី Agnès Pannier-Runacher រដ្ឋមន្ត្រីថាមពលបារាំង និងបញ្ជាក់ទៀតថា នេះគឺជាវិធានការឆ្លើយតបទៅនឹងវិបត្តិអាកាសធាតុ។ អ្នកស្រីរដ្ឋមន្ត្រីបារាំងបានប្រាប់ទៅកាន់បណ្តាញសារព័ត៌មាន យ៉ាងដូច្នេះ នៅទីក្រុងសាពូរ៉ូ ប៉ែកខាងជើងប្រទេសជប៉ុន។ នៅជប៉ុន ជាទីដែល បណ្តារដ្ឋមន្ត្រី វិស័យថាមពល និង វិស័យបរិស្ថាន នៃ ប្រទេសG៧ បានជួបជុំពិភាក្សាគ្នា ស្តីពី បរិស្ថានអាកាស និងថាមពល នាថ្ងៃសៅរ៍អាទិត្យ ទី១៥-១៦មេសា។
ចំណែកការណ៍ដែលប្រទេស G៧ មូលមាត់គ្នាចូលរួមកាត់បន្ថយ បញ្ចេញផ្សែង ឲ្យបានលឿនឆាប់ ហើយនិងសន្យាប្តេជ្ញាមិនសាងសង់រោងចក្រថាមពលធ្យូងថ្មបន្ថែមទៀត គឺត្រូវរដ្ឋមន្ត្រីថាមពលបារាំង វាយតម្លៃខ្ពស់ថា នេះជាលើកទី១ហើយដែលប្រទេសទាំងនេះ ហ៊ានប្តេជ្ញាចិត្តខ្ពស់បែបនេះ។ក៏ប៉ុន្តែ អ្នកស្រីរដ្ឋមន្ត្រីសង្កត់ធ្ងន់ដែរថា នៅខណៈពេលនេះ ប្រទេសទាំង៧ នៅមិនទាន់ស្របគ្នាទេ ចំពោះការកំណត់កាលបរិច្ឆេទនៅពេលណាឲ្យប្រាកដនៅឡើយទេ។
ប្រភពស្និទ្ធនឹងកិច្ចប្រជុំក៏បានបញ្ជាក់ប្រាប់ទីភ្នាក់ងារបារាំងអាអេហ្វប៉េ ថា គោលបំណងរបស់បណ្តារដ្ឋមន្ត្រីប្រទេសសេដ្ឋកិច្ចជឿនលឿនG៧ រំពឹងថានឹងបង្កើនសមត្ថភាពផលិតថាមពលស្អាត ចេញពីថាមពលកកើតឡើងវិញ ដូចជាពន្លឺនិងខ្យល់។ ក្នុងនោះ ពន្លឺព្រះអាទិត្យ យ៉ាងហោចឲ្យបាន ១ ថេរ៉ាវ៉ាត់ ហើយផលិតថាមពលពីខ្យល់សមុទ្រ ឲ្យបាន ១៥០ ជីហ្គាវ៉ាត់ ចាប់ពីពេលនេះទៅឆ្នាំ២០៣០។
ចំពោះប្រទេសជប៉ុន នាឪកាសធ្វើសុន្ទរកថាបើកកិច្ចប្រជុំ រដ្ឋមន្ត្រីក្រសួងសេដ្ឋកិច្ចនិងពាណិជ្ជកម្ម Yasutoshi Nishimura បានប្រកាសថា ប្រទេសសេដ្ឋកិច្ចជឿនលឿន មិនត្រឹមតែត្រូវកាត់បន្ថយការបញ្ចេញផ្សែង ក្នុងរង្វង់ប្រទេសទាំង៧នោះទេ ប៉ុន្តែ ត្រូវជំរុញឲ្យកាត់បន្ថយផ្សែងជាទូទៅនៅក្នុងពិភពលោក ហើយពិសេសក៏ត្រូវជួយគាំទ្រប្រទេសក្រីក្រ នៅក្នុងដំណើរនេះដែរ។
ក្នុងន័យនេះ រដ្ឋមន្ត្រីជប៉ុន ចង់សង្កត់ធ្ងន់លើការចូលរួមវិភាគទាន បង្កើតមូលនិធិកញ្ចប់ថវិកា សម្រាប់ជួយដល់ប្រទេសក្រីក្រ និងជួយប្រទេសកំពុងអភិវឌ្ឍ ក្នុងយន្តការកាត់បន្ថយការបញ្ចេញផ្សែង។ ការបញ្ចេញផ្សែងដែលធ្វើឲ្យប៉ះពាល់ដល់បរិយាកាស និងកំណើនកម្តៅផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ