ចិនប្រាប់អាមេរិកឲ្យឈប់រករឿងTikTok ក្នុងហេតុផល ការពារសន្តិសុខជាតិ
ប៉េកាំងស្រែកទាមទារឲ្យវ៉ាស៊ីនតោនឈប់រករឿង ដាក់សម្ពាធលើកម្មវិធី TikTokរបស់ក្រុមហ៊ុនចិន ByteDance។ ចិន តាមរយៈអ្នកនាំពាក្យរបស់ក្រសួងការបរទេស កាលពីថ្ងៃព្រហស្បតិ៍ បានដំឡើងសំឡេងរិះគន់អាមេរិក នៅបន្ទាប់ពី កាសែតដកស្រង់សំដីរបស់មន្រ្តីសេតវិមានដែលថា រដ្ឋបាលអាមេរិកដាក់ឱសានវាទឲ្យកម្មវិធីTikTok ត្រូវដោះដៃចេញពីក្រុមហ៊ុន ចិន បើមិនចង់ឲ្យអាជ្ញាធរអាមេរិកបិទហាម មិនឲ្យប្រើប្រាស់ក្នុងទឹកដីអាមេរិក។
ចុះផ្សាយនៅថ្ងៃ៖
ដល់វេលាដែលចិនប្រាប់ក្រុមប្រទេសលោកខាងលិចឲ្យឈប់យកហេតុផលការពារសន្តិសុខជាតិ មកធ្វើជាលេស ដាក់សម្ពាធ រករឿងក្រុមហ៊ុនបរទេស ជាពិសេសក្រុមហ៊ុនចិន។ នៅក្នុងសន្និសីទកាសែត កាលពីថ្ងៃព្រហស្បតិ៍ អ្នកនាំពាក្យរបស់ក្រសួងការបរទេសចិន លោកWang Wenbin និយាយថា រហូតមកដល់ពេលនេះ អាមេរិកនៅតែមិនទាន់បង្ហាញភស្តុតាងដែលថា កម្មវិធីTikTokគំរាមកំហែងសន្តិសុខជាតិអាមេរិក។ សម្រាប់មន្រ្តីចិន ប្រទេសមួយចំនួនមិនគួរយកបញ្ហាសន្តិសុខទិន្នន័យទៅប្រើជាឧបករណ៍សម្រាប់ពង្រីកកុងសេប (Concept) សន្តិសុខជាតិ ក្នុងគោលដៅ រំលោភអំណាច និងសង្កត់សង្កិនក្រុមហ៊ុនរបស់ប្រទេសដទៃ។
តាមរយៈអ្នកនាំពាក្យក្រសួងការបរទេស ចិនចេញមុខប្រតិកម្មរិះគន់ខ្លាំងៗ វ៉ាស៊ីនតោន នៅក្រោយកាសែតអាមេរិក Wall Street Journal ចុះផ្សាយថា រដ្ឋបាលលោកចូ បៃដិនបានដាក់ឱសានវាទឲ្យកម្មវិធីTikTokត្រូវតែចាកចេញពីក្រុមហ៊ុនចិន ByteDance បើសិនមិនចង់ឲ្យអាមេរិកហាមឃាត់ ក្នុងទឹកដីអាមេរិក។ បារម្ភខ្លាចថា រដ្ឋអំណាចចិនចូលទៅយកទិន្នន័យរបស់អ្នកប្រើប្រាស់កម្មវិធីTikTok អាមេរិក គណកម្មការអឺរ៉ុប និងចុងក្រោយរដ្ឋាភិបាលអង់គ្លេស នៅសប្តាហ៍នេះ បានចេញបញ្ជា ហាមមិនឲ្យគេប្រើកម្មវិធីTikTokនៅលើទូរស័ព្ទ ម៉ាស៊ីនអេឡិចត្រូនិករបស់រដ្ឋាភិបាល។
អ្នកនាំពាក្យរបស់កម្មវិធីTikTok ដកស្រង់សំដីដោយទីភ្នាក់ងារព័ត៌មានបារាំង AFP បញ្ជាក់ការដាក់ឱសានវាទរបស់សេតវិមាន។
សម្រាប់បុគ្គលិករបស់កម្មវិធីTikTok បើសិនរដ្ឋាភិបាលអាមេរិកពិតជាមានគោលដៅ ការពារសន្តិសុខជាតិមែន នោះ ការដោះដៃរបស់កម្មវិធីTikTokពីក្រុមហ៊ុនចិន ByteDance មិនមែនជាដំណោះស្រាយ និងជារឿងចាំបាច់នោះទេ។ មធ្យោបាយដ៏សំខាន់ដើម្បីបំបាត់ក្តីបារម្ភ ពីសន្តិសុខទិន្នន័យរបស់អ្នកប្រើប្រាស់អាមេរិកាំង គឺ អាជ្ញាធរអាមេរិកត្រូវប្រើប្រព័ន្ធការពារទិន្នន័យអ្នកប្រើប្រាស់ ដោយមានជំនួយពីភាគីទី៣។ តាមអ្នកនាំពាក្យខាងលើ ក្រុមហ៊ុនTikTok បានធ្វើការជាច្រើនឆ្នាំមកហើយ ដើម្បីការពារទិន្នន័យរបស់អ្នកប្រើប្រាស់។
នៅសប្តាហ៍មុន រដ្ឋបាលលោកចូ បៃដិនស្វាគមព្រឹទ្ធសភាអាមេរិកដែលស្នើច្បាប់ អនុញ្ញាតឲ្យរដ្ឋាភិបាលអាមេរិក ហាមឃាត់ កម្មវិធីTikTok ដោយសារតែកម្មវិធីបណ្តាញសង្គមមួយនេះ អាចគំរាមកំហែងទិន្នន័យ និងសន្តិសុខជាតិអាមេរិក។
នៅខែមករាកន្លងទៅ សមាជិកសភាអាមេរិកធ្លាប់បានទាមទារ ឲ្យហាមឃាត់ការប្រើប្រាស់ TikTok ទាំងស្រុងតែម្តង ដោយចោទថា កម្មវិធីនេះ គឺជាឧបករណ៍ប្រមូលទិន្នន័យ និងស៊ើបការណ៍សម្ងាត់ បម្រើឲ្យរដ្ឋាភិបាលចិន។ TikTok បានបដិសេធការចោទប្រកាន់។
តាមក្រុមហ៊ុនTikTok មានមនុស្សជាង ១ពាន់លាននាក់ នៅក្នុងពិភពលោកប្រើប្រាស់កម្មវិធីTikTokដែលនៅក្នុងនោះ ១០០លាននាក់ រស់នៅទឹកដីអាមេរិក ជាទីដែលកម្មវិធីTikTok មានកូដប្រជាប្រិយ ប្រើច្រើនក្នុងចំណោមយុវជន។ នៅប៉ុន្មានឆ្នាំមកនេះ កម្មវិធីសប្បាយៗ TikTok បានវ៉ាដាច់គ្រប់បណ្តាញសង្គម Youtube Facebook Instagram Twitter នៅពេលគេនិយាយពីការចំណាយពេលរបស់អ្នកប្រើប្រាស់ នៅលើបណ្តាញTikTok។
សម្រាប់អង្គការការពារអ្នកប្រើប្រាស់អាមេរិក វិធានការរបស់រដ្ឋាភិបាលអាមេរិក ដើម្បីបិទខ្ទប់ កម្មវិធីTikTok នឹងប៉ះពាល់ដល់សិទ្ធិបញ្ចេញមតិរបស់ប្រជាជន និងទៅបន្ទុចបង្អាក់ ការផ្សព្វផ្សាយវប្បធម៌អាមេរិកាំង តាមរយៈកម្មវិធីរបស់ក្រុមហ៊ុនចិន TikTok៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ