ចិនហាមមិនឱ្យទិញផលិតផលរបស់ក្រុមហ៊ុនអាមេរិក Micron ដោយហេតុផលសន្តិសុខ
ជម្លោះនិងការប្រកួតប្រជែងរវាងចិននិងអាមេរិក បានឈានចូលដល់ដំណាក់កាលថ្មីមួយទៀត ពាក់ព័ន្ធនឹងវិស័យយុទ្ធសាស្ត្រ សឺមីកុងឌុចទ័រ។ នៅថ្ងៃអាទិត្យម្សិលមិញ ប៉េកាំង បានចេញបម្រាមលែង ឱ្យក្រុមប្រតិបត្តិករមានទិន្នន័យរសើបៗមួយចំនួន ទិញផលិតផលរបស់ក្រុមហ៊ុនផលិតសឺមីកុងឌុចទ័រអាមេរិក Micron ដោយមូលហេតុសន្តិសុខ។
ចុះផ្សាយនៅថ្ងៃ៖
ស្តាប់ - ០២:០៧
ផលិតផលរបស់ក្រុមហ៊ុនMicron ចោទជាបញ្ហាធំដល់សន្តិសុខនៃបណ្តាញសំខាន់ៗ ដែលអាចប៉ះពាល់ដល់សន្តិសុខនៃបណ្តាញផ្គត់ផ្គង់ និងសន្តិសុខជាតិរបស់ចិន។ នេះជាសេចក្តីថ្លែងការណ៍របស់ស្ថាប័នគ្រប់គ្រងសន្តិសុខអ៊ីនធ័រនែតចិន ដោយអំពាវនាវឱ្យក្រុមហ៊ុនក្នុងវិស័យរសើបៗនៅចិនទាំងអស់ ត្រូវឈប់ទិញផលិតផលរបស់ក្រុមហ៊ុនMicron ពោលគឺរាប់តាំងពីក្រុមហ៊ុនក្នុងវិស័យដឹកជញ្ជូនដល់វិស័យសុខាភិបាល។
ដំណើរបែបបទប្រឆាំងនឹងក្រុមហ៊ុនអាមេរិកនេះ ធ្លាប់ត្រូវបានចិនប្រកាសឱ្យដឹងតាំងពីដើមខែមេសា ថាជាវិធានការធម្មតាសម្រាប់ការពារសន្តិសុខជាតិ ប្រឈមនឹងហានិភ័យជាយថាហេតុណាមួយ។
មានមូលដ្ឋាននៅរដ្ឋIdaho ភាគពាយ័ព្យសហរដ្ឋអាមេរិក Micron ដែលត្រៀមលក្ខណៈជាស្រេចនឹងពិភាក្សាជាមួយអាជ្ញាធរចិន ជាក្រុមហ៊ុនផលិតសឺមីកុងឌុចទ័រលំដាប់ទីបួនពិភពលោក។ ក្នុងឧស្សាហកម្មនេះ ក្រុមហ៊ុនមានចំណែកលើទីផ្សារពិភពលោកប្រមាណពី២០ទៅ ២៥% ហើយ១០%នៃប្រាក់ចំណូលរបស់ក្រុមហ៊ុនប្រចាំឆ្នាំ២០២២ហូរមកពីចិន។ ប៉ុន្តែផលិតផលមួយភាគធំរបស់ក្រុមហ៊ុនដែលលក់នៅចិន ត្រូវបានទិញដោយផលិតករបរទេស។ ដូច្នេះគេមិនដឹងថាតើសេចក្តីសម្រេចរបស់អាជ្ញាធរចិនម្សិលមិញ អាចពាក់ព័ន្ធដល់ការ លក់របស់ក្រុមបរទេសនេះដែរឬអត់ទេ។
ក្រោមហេតុផលសន្តិសុខជាតិ សហរដ្ឋអាមេរិកក៏បានប្រកាសកាលពីខែតុលាឆ្នាំ២០២២ ត្រួតពិនិត្យជាថ្មី ការនាំចេញសឺមីកុងឌុចទ័រ ដើម្បីកំរិតការទិញនិងកុំឱ្យចិនផលិតយកទៅប្រើក្នុងកម្មវិធីយោធា។ បន្ទាប់ពីអាមេរិកនិងហូឡង់ កាលពីចុងខែមីនា ជប៉ុនក៏បានប្រកាសចេតនាចង់កំរិតការនាំចេញសម្ភារៈបរិក្ខាផលិតសឺមីកុងឌុចទ័រដែរ ដែលជាហេតុធ្វើឱ្យចិនផ្ទុះកំហឹងយ៉ាងខ្លាំង។
ក្នុងរយៈពេល១០ឆ្នាំចុងក្រោយនេះ ដើម្បីឈប់រំពឹងលើការនាំចូលពីបរទេស ចិនបានចំណាយរាប់ពាន់លានដុល្លារក្នុងឧស្សាហកម្មសឺមីកុងឌុចទ័រ។ នៅឆ្នាំ២០២១ ចិនបាននាំចូលសឺមីកុងឌុចទ័រ ក្នុងតម្លៃជាង៤៣០ពាន់លានដុល្លារ ពោលគឺច្រើនជាងចំណាយទិញប្រេងទៅទៀត។ បន្ទះសឺមីកុងឌុចទ័រ ជាស្នូលនៃសេដ្ឋកិច្ចសម័យទំនើប មានប្រើក្នុងស្ទើរគ្រប់ម៉ាស៊ីនអេឡិចត្រូនិចទាំងអស់ ដូចជា អំពូលភ្លើងLED ម៉ាស៊ីនបោកខោអាវ រថយន្ត ឬទូរស័ព្ទ ។ល។ និង។ល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ