ចំនួនជីហាតថយនៅស៊ីរីនិងអ៊ីរ៉ាក់ ទៅឡើងនៅលីប៊ី
មិនអាចធ្វើដំណើរទៅស៊ីរី ឬទៅអ៊ីរ៉ាក់ ព្រោះត្រូវប្រឈមនឹងការវាយប្រហារផ្លូវអាកាសផង និងទម្លាក់គ្រាប់បែកផង ជនជីហាតអ៊ីស្លាម បានរកឃើញទិសដៅថ្មីគឺប្រទេស លីប៊ី។ ប្រទេសដែលបាននិងកំពុងស្គាល់ភាពវឹកវរ ទើបត្រូវបានពួកយុទ្ធជនអ៊ីស្លាមជ្រុលនិយម នាំគ្នាសម្រុកទៅផ្តុំកម្លាំងគ្នាកាន់តែច្រើនឡើង។ ចំនួនជនជីហាត បានកើនឡើងទ្វេមួយជាពីរនៅលីប៊ី !
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ថយចំនួននៅស៊ីរី និងនៅអ៊ីរ៉ាក់មែន (ពី ៣៣០០០នាក់មក ១៩០០០ ទៅ២៥០០០) ប៉ុន្តែចំនួនយុទ្ធជនជីហាតបានងាកទៅកើនឡើងឥតឈប់នៅលីប៊ី ! បើតាមរដ្ឋ បាលអាមេរិក វត្តមានជនជីហាតផ្តាច់ខ្លួនជ្រុលនិយម បានកើនឡើងដល់ទៅ ៥ពាន់នាក់លីប៊ី ទល់នឹងពីរឬបីពាន់នាក់ប៉ុណ្ណោះ កាលពីស្ថិតិប៉ាន់ស្មានលើកមុន។
តួលេខផ្តល់ដោយអ្នកទទួលខុសត្រូវជាន់ខ្ពស់អាមេរិកសុំមិនបញ្ចេញឈ្មោះនេះធ្លាក់មកជួនចំពេលដែលអាជ្ញាធរអាមេរិកទើបបានប្រកាសបញ្ជាក់ ថាលីប៊ីបានក្លាយជាសមរភូមិ និងជាជម្រកថ្មី ដ៏ទាក់ទាញរបស់ពួកជីហាត។ ការពង្រីកខ្លួនរបស់អង្គការរដ្ឋអ៊ីស្លាម មានល្បឿនលឿននិងខ្លាំង ដែលជាគួរឱ្យព្រឺខ្លាចបំផុត។ នេះបើតាមអ្នកវិភាគម្នាក់ដែលធ្លាប់ជាអតីតភ្នាក់ងារចារកិច្ចCIA។
អង្គការរដ្ឋអ៊ីស្លាមបានទទួលបរាជ័យយ៉ាងធ្ងន់ធ្ងរ ជាបន្តបន្ទាប់ និងគួរឱ្យកត់សម្គាល់ នៅស៊ីរី និងអ៊ីរ៉ាក់ ក្រោមប្រតិបត្តិការផ្លូវអាកាសរបស់ក្រុមសម្ព័ន្ធមិត្តអន្តរជាតិ ប៉ុន្តែក៏បានងាកទៅរកដែនដីថ្មី ដណ្តើមគ្រប់គ្រងតំបន់ភាគខាងកើតក្រុងទ្រីប៉ូលីរបស់លីប៊ី ព្រោះជាប្រទេសដែលកំពុងញាំញីដោយសង្គ្រាមស៊ីវិលនិងភាពវឹកវរនយោបាយ។
ប៉ុន្តែពេលនេះ អាមេរិកនិងសម្ព័ន្ធមិត្តដែលត្រៀមជាស្រេចនឹងធ្វើសកម្មភាព មិនទាន់លើកឡើងអំពីលទ្ធភាពធ្វើអន្តរាគមន៍យោធានៅលីប៊ីទេ ដោយរង់ចាំលទ្ធផលនៃការចរចាបង្កើតរដ្ឋាភិបាលប្រទេសនេះសិន។ ក្រុមប្រឹក្សាប្រធានាធិបតីលីប៊ីកំពុងពិភាក្សាស្នើបង្កើតរដ្ឋាភិបាលថ្មី ស្របតាមកិច្ចព្រមព្រៀងនយោបាយដឹកនាំដោយអង្កការសហប្រជាជាតិ ដើម្បីនាំលីប៊ីចេញពីភាពវឹកវរ។
ម្យ៉ាងវិញទៀត ការបង្ហើបអំពីតួលេខនៃជនជីហាតនៅលីប៊ីពេលនេះ ក៏មកពីអាមេរិកចេតនាចង់ដាក់សម្ពាធលើក្រុមសម្ព័ន្ធអន្តរជាតិ ដែលនឹងត្រូវរៀបចំជំនួបថ្នាក់រដ្ឋមន្ត្រីការពារជាតិ ដើម្បីប្រយុទ្ធប្រឆាំងនឹងពួកជីហាត នៅទីក្រុងព្រុចសែល។ រដ្ឋមន្ត្រីទាំង២៦ប្រទេស និងរដ្ឋាភិបាលអ៊ីរ៉ាក់ ត្រូវរិះរកវិធីរួមសម្រាប់បើកយុទ្ធនាការយោធាប្រឆាំងនឹងអង្គការរដ្ឋអ៊ីស្លាមនិងស្វែងរកមធ្យោបាយវាយប្រហារឱ្យកាន់តែសន្ធាប់ឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ