អាមេរិកទម្លាក់គ្រាប់បែកលើទីតាំងជីហាតរដ្ឋអ៊ីស្លាមនៅលីប៊ី
កាលពីថ្ងៃសុក្រម្សិលមិញ យន្តហោះចម្បាំងរបស់អាមេរិកបានបើកការវាយប្រហារទៅលើទីតាំងដែលគេសង្ស័យថាជាជំរំហ្វឹកហាត់របស់ក្រុមជីហាតរដ្ឋអ៊ីស្លាម នៅក្នុងប្រទេសលីប៊ី។ នៅគឺជាលើកទីពីរហើយ នៅក្នុងរយៈពេលបីខែកន្លងទៅនេះ ដែលអាមេរិកបើកការវាយប្រហារតាមផ្លូវអាកាសនៅក្នុងប្រទេសលីប៊ី ដែលក្រុមជីហាតរដ្ឋអ៊ីស្លាមកំពុងតែយកមកធ្វើជាមូលដ្ឋានធំទី៣ បន្ទាប់ពីអ៊ីរ៉ាក់ និងស៊ីរី។
ចុះផ្សាយនៅថ្ងៃ៖
ស្តាប់ - ០២:០៤
យោងតាមតុល្យការបណ្តោះអាសន្នផ្តល់ដោយអាជ្ញាធរលីប៊ី មានមនុស្សប្រមាណជា ៤០នាក់ ត្រូវស្លាប់នៅក្នុងការវាយប្រហាររបស់អាមេរិក កាលពីថ្ងៃសុក្រម្សិលមិញនេះ ក្នុងនោះភាគច្រើនគឺជាក្រុមជីហាតដើមកំណើតទុយនីស៊ី។ ក្រសួងការពារជាតិអាមេរិកវិញបានប្រកាសឲ្យដឹងថា នៅក្នុងចំណោមអ្នកស្លាប់ ទំនងជាមានមេភេរវជនដ៏សំខាន់ម្នាក់ ដែលគេសង្ស័យថាជាមេខ្លោងរៀបចំការវាយប្រហារទ្រង់ទ្រាយធំ នៅក្នុងប្រទេសទុយនីស៊ី ដែលបណ្តាលឲ្យទេសចរអឺរ៉ុបប្រមាណជា ៦០នាក់ ត្រូវបាត់បង់ជីវិត កាលពីឆ្នាំទៅមិញ។
អ្នកនាំពាក្យក្រសួងការពារជាតិអាមេរិកក៏បានឲ្យដឹងផងដែរថា ការវាយប្រហារតាមផ្លូវអាកាសនៅក្នុងទឹកដីលីប៊ីនេះត្រូវបានធ្វើឡើង ដោយមានការជូនដំណឹងជាមុនទៅកាន់អាជ្ញាធរលីប៊ី ក៏ប៉ុន្តែមិនបានបញ្ជាក់ឲ្យបានច្បាស់ទេថា តើអាជ្ញាធរណាមួយ ដែលអាមេរិកជូនដំណឹង ពីព្រោះថា នៅក្នុងពេលបច្ចុប្បន្ននេះ លីប៊ីមានរដ្ឋាភិបាលដល់ទៅពីរ។ ភាពអនាធិបតេយ្យដែលកើតឡើងតាំងពីក្រោយបដិវត្តន៍ទម្លាក់មេដឹកនាំផ្តាច់ការកាដាហ្វី កាលពីឆ្នាំ២០១១។
គឺភាពអនាធិបតេយ្យនេះហើយ ដែលធ្វើឲ្យក្រុមជីហាតរដ្ឋអ៊ីស្លាមឆ្លៀតឱកាសមកបោះទីតាំង ដើម្បីយកទុកធ្វើជាមូលដ្ឋានធំ ក្នុងពេលដែលមូលដ្ឋានរបស់ពួកគេនៅអ៊ីរ៉ាក់ និងស៊ីរី កំពុងប្រឈមមុខនឹងការវាយប្រហារពីសំណាក់ប្រទេសលោកខាងលិច។ យោងតាមការប៉ាន់ស្មានរបស់ក្រសួងការពារជាតិអាមេរិក នៅក្នុងពេលបច្ចុប្បន្ននេះ ក្រុមជីហាតរដ្ឋអ៊ីស្លាមប្រមាណជា ៥ពាន់នាក់ កំពុងបោះទីតាំងនៅក្នុងប្រទេសលីប៊ី ហើយពួកទាំងនេះ កំពុងតែធ្វើការហ្វឹកហាត់ និងរៀបចំគម្រោងការណ៍វាយប្រហារនៅបរទេស ក្នុងនោះសហរដ្ឋអាមេរិក ព្រមទាំងបណ្តាប្រទេសជាសម្ព័ន្ធមិត្តអាមេរិកនៅអឺរ៉ុប សុទ្ធសឹងជាចំណុចស៊ីបដ៏សំខាន់ៗរបស់ពួកគេ។
កាលពីពេលថ្មីៗកន្លងទៅនេះ លោកអូបាម៉ាធ្លាប់បានប្រកាសឲ្យដឹងថា អាមេរិកនឹងតាមប្រមាញ់ក្រុមជីហាតរដ្ឋអ៊ីស្លាមនៅគ្រប់ទីកន្លែង ដោយមិនកម្រិតតែនៅត្រឹមតែប្រទេសអ៊ីរ៉ាក់ និងស៊ីរីនោះទេ។ បណ្តាញព័ត៌មានអាមេរិកវិញបានចុះផ្សាយឲ្យដឹងថា នៅក្នុងពេលបច្ចុប្បន្ននេះ អាមេរិក និងអង់គ្លេសបានបង្កើនវត្តមានកងកុម្ម៉ង់ដូ ឲ្យធ្វើប្រតិបត្តិការសម្ងាត់នៅក្នុងប្រទេសលីប៊ី ដើម្បីស្វែងរកទីតាំងក្រុមជីហាតរដ្ឋអ៊ីស្លាមធ្វើជាចំណុចស៊ីបក្នុងការវាយប្រហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ