អាមេរិកមានអ្នកផ្ទុកជំងឺអេបូឡាជាលើកដំបូងក្នុងប្រទេស
អ្នកជំងឺម្នាក់ ទើបធ្វើដំណើរមកពីប្រទេសលីបេរីយ៉ា ត្រូវបានបញ្ជូនទៅមន្ទីរពេទ្យ ក្រុង ដាឡាស រដ្ឋតិចសាស់ហើយ ! ឯម្នាក់ទៀត ធ្វើដំណើរមកពីប្រទេសសៀរ៉ាឡេអូន កំពុងស្ថិតក្នុងស្ថានភាពតាមដានត្រួតពិនិត្យ នៅវ៉ាស៊ីនតោន។ ករណីបុគ្គលទាំងពីរគ្មានទំនាក់ទំនងនឹងគ្នា។ ប៉ុន្តែ អាជ្ញាធរអាមេរិកមិនធ្វេសប្រហែសឡើយ ! មជ្ឈមណ្ឌលជាតិត្រួតពិនិត្យនិងការពារជំងឺ ដែលមានទីស្នាក់ការនៅក្រុងអាត្លង់តា បានរៀបចំសន្និសីទកាសែតភ្លាម ដើម្បីពន្យល់បំភ្លឺអំពីករណីជំងឺអេបូឡាលើទឹកដីអាមេរិកនេះបង្កភាពព្រួយបារម្ភដល់ប្រជាពលរដ្ឋទាន់។
ចុះផ្សាយនៅថ្ងៃ៖
សម្រាប់ក្រុមគ្រូពេទ្យនៃមជ្ឈមណ្ឌលត្រួតពិនិត្យនិងការពារសុខភាព ការផ្តល់ព័ត៌មានបានកាន់តែច្រើន កាន់តែធ្វើឱ្យប្រជាពលរដ្ឋអាមេរិកទុកចិត្តនិងបញ្ចៀសភាពស្លន់ស្លោ។ រហូតមកទល់នឹងពេលនេះ មានពលរដ្ឋអាមេរិកផ្ទុកជំងឺអេបូឡាបីនាក់ហើយ បានទទួលការព្យាបាលជាសះស្បើយ ប្រកបដោយជោគជ័យ ៖ ពីរនាក់គឺជាគ្រូពេទ្យ និងម្នាក់ទៀត ជាជំនួយការសុខាភិបាល ធ្វើការនៅក្នុងតំបន់គ្រោះថ្នាក់នៃទ្វីបអាហ្វ្រិក មានអេបូឡារាតត្បាតខ្លាំង។
ប៉ុន្តែសម្រាប់ករណីអ្នកជំងឺអេបូឡាទីមួយ ធ្វើរោគវិនិច្ឆ័យរកឃើញនៅលើទឹកដីអាមេរិកនេះ គឺជាអ្នកដំណើរ មកពីប្រទេសលីបេរីយ៉ា ដើម្បីមកលេងគ្រួសារនៅសហរដ្ឋ និងមិនមែនជាអ្នកធ្វើការក្នុងផ្នែកសុខាភិបាលអ្វីទេ។ អ្នកជំងឺរូបនោះបានមកដល់ទឹកដីអាមេរិកនៅថ្ងៃទី ២០ កញ្ញា មានបញ្ចេញអាការៈសញ្ញារោគ ៦ថ្ងៃក្រោយ ពោលគឺនៅថ្ងៃទី ២៦កញ្ញា និងបញ្ជូនមកមន្ទីរពេទ្យ ព្រមដាក់បង្ឃាំងដាច់ដោយឡែកពីគេនៅថ្ងៃទី២៨ កញ្ញា។
ក្រុមគ្រួសារនិងគ្រប់បុគ្គលដែលបានជួបរូបអ្នកមានផ្ទុកអេបូឡា ក្នុងអំឡុងពេលមួយសប្តាហ៍នេះ ត្រូវស្ថិតក្រោមការតាមដានវេជ្ជសាស្ត្រទាំងអស់។ ប៉ុន្តែក្រុមគ្រូពេទ្យបានអះអាងជាផ្លូវការ ថាគ្មានគ្រោះរោគរាតត្បាតក្នុងទឹកដីសហរដ្ឋអាមេរិកទេ។ យ៉ាងណាក៏ដោយ ក៏មជ្ឈមណ្ឌលមិនបានបញ្ជាក់ព័ត៌មានលម្អិតស៊ីជម្រៅឡើយ ដោយត្រូវគោរពការសម្ងាត់សុខភាពរបស់បុគ្គល និងមិនបានប្រកាសឈ្មោះជើងយន្តហោះហើរដែលអ្នកជំងឺអេបូឡានោះបានជិះចេញពីលីបេរីយ៉ាមកកាន់សហរដ្ឋអាមេរិកទេ ព្រោះខ្លាចអ្នកដំណើរស្លន់ស្លោសម្រុករត់ចូលមន្ទីរពេទ្យ។ អ្នកដំណើររួមយន្តហោះមិនអាចឆ្លងអេបូឡាឡើយ ព្រោះដរាបណាជំងឺនេះមិនទាន់ផ្តល់រោគសញ្ញា គឺគ្មានទេការចម្លងរោគ។
ករណីអេបូឡាលើទឹកដីអាមេរិកនេះ ដូចជាបានដាស់សតិមនុស្សគ្រប់រូប និងរំលឹកដល់អាជ្ញាធរអាមេរិកថា រោគរាតត្បាតអេបូឡាមិនមែនមាននៅតែក្នុងតំបន់អាហ្វ្រិកខាងលិចទេ តែដើម្បីទប់ស្កាត់ត្រូវធ្វើជាលក្ខណៈអន្តរជាតិ។ សម្រាប់ពេលនេះ ទាហានអាមេរិកចំនួន១៧០០នាក់ ក្នុងចំណោម៣០០០នាក់ បានទៅដល់តំបន់រងគ្រោះហើយ។ ពួកគេមានបន្ទុកកសាងមន្ទីរពេទ្យជនបទដែលលីបេរីយ៉ា ខ្វះខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ