លោកកាកឡូស ហ្គោន ធ្វើសន្និសីទកាសែតនៅលីបង់ ចោទថ្នាក់ដឹកនាំក្រុមហ៊ុនNissan និងប្រព័ន្ធយុត្តិធម៌ជប៉ុន
កាលពីរសៀលថ្ងៃពុធ ទី៨មករា ពីទីក្រុងបេរូត ប្រទេសលីបង់ លោក កាកឡូស ហ្គោន អតីតអគ្គនាយកក្រុមហ៊ុនរថយន្ត រឺណូ-នីសាន់ (Renault-Nissan) បានធ្វើសន្និសីទកាសែតមួយ បន្ទាប់ពីលោកបានរត់គេចខ្លួន ចេញពីការឃុំឃាំងនៅប្រទេសជប៉ុន។ ជាសន្និសីទកាសែត ដែលលោកអះអាងថា លោកនឹងនិយាយការពិត ពីការឃុបឃិត របស់ក្រុមហ៊ុន Nissan ជាមួយនឹងប្រព័ន្ធតុលាការជប៉ុន ក្នុងការប្រឌិតបង្កាច់បង្ខូច ចោទប្រកាន់លោក ដោយអយុត្តិធម៌។
ចុះផ្សាយនៅថ្ងៃ៖ កែប្រែថ្ងៃទី៖
ជាសន្និសីទកាសែត ដែលគេទន្ទឹងរងចាំជាខ្លាំង បន្ទាប់ពីលោក កាកឡូស ហ្គោន (Carlos Ghosn) បានរត់គេចពីជប៉ុន ទៅដល់ប្រទេសលីបង់ កាលពីថ្ងៃ៣០ធ្នូ ឆ្នាំ២០១៩។
ចំពោះមុខអ្នកកាសែតបរទេសជាច្រើននាក់ នៅឯទីស្នាក់ការ សហជីពសារព័ត៌មានលីបង់ លោក កាឡូស ហ្គោន បានបញ្ជាក់ថា លោកនឹងមិននិយាយអ្វីទាំងអស់ ទាក់ទិននឹងការរត់គេចខ្លួន ពីជប៉ុនមកលីបង់ ដោយឆ្លងកាត់តួកគីនោះទេ។ លោកមិននិយាយ ព្រោះលោកចង់ការពារ កុំឲ្យមានបញ្ហាដល់អ្នកដែលបានជួយលោក។
នៅក្នុងសន្និសីទកាសែតនេះ លោក កាកឡូស ហ្គោន បានអះអាងថា ការសម្រេចរត់គេចខ្លួនពីការឃុំឃាំងនៅជប៉ុននេះ គឺជាការសម្រេចចិត្តមួយដ៏លំបាកបំផុត ដែលលោកមិនធ្លាប់ជួបប្រទះ។ តែលោកគ្មានជំរើសណាផ្សេង ក្រៅពីរត់គេចខ្លួនទេ ព្រោះជម្រើសនេះ អាចឲ្យលោកការពារខ្លួន និងការពារក្រុមគ្រួសារលោក។ លោកអះអាងថា លោកបានរត់គេចចេញពីប្រព័ន្ធតុលាការមួយ ដែលលំអៀង ដែលអយុត្តិធម៌ ដែលរំលោភបំពានសិទ្ធិរបស់លោក។ ការរត់គេចខ្លួនមកលីបង់នេះ លោកអះអាងថា គឺជាឱកាស ដែលអាចឲ្យលោកមានសេរីភាពនិយាយស្តី ដើម្បីលាងសម្អាតកិត្តិយស កេរ្តិ៍ឈ្មោះរបស់លោក។
ថ្ងៃនេះ ជាថ្ងៃដ៏មានសារៈសំខាន់ខ្លាំងណាស់ សម្រាប់ខ្ញុំ។ ប្រមាណជាង១ឆ្នាំមកហើយ ដែលខ្ញុំរងចាំថ្ងៃនេះ ចាប់ពីថ្ងៃដែលខ្ញុំ ត្រូវបានគេបំបែក ចេញពីក្រុមគ្រួសារខ្ញុំ ពីមិត្តភ័ក្តខ្ញុំ និងពីបុគ្គលិករបស់ ក្រុមហ៊ុន Renault Nissan និង Mitsubishi។ខ្ញុំមិនបានស្គាល់សេរីភាពភាពទេ តាំងតែពីខែវិច្ឆិកាឆ្នាំ២០១៨មក។ វាជារឿងចាំបាច់ណាស់ ដែលខ្ញុំត្រូវនិយាយអំពី លក្ខខណ្ឌដ៏លំបាកទាំងឡាយ ដែលគេបានធ្វើមកលើខ្ញុំ យ៉ាងអយុត្តិធម៌។ ហេតុដូច្នេះហើយ បានជាឱកាសថ្ងៃនេះ មានសារៈសំខាន់ណាស់សម្រាប់ខ្ញុំ។ថ្ងៃនេះ ខ្ញុំនឹងមិននិយាយរៀបរាប់ ថាខ្ញុំរត់គេចពីជប៉ុនដោយរបៀបណាខ្លះនោះទេ បើទោះបីខ្ញុំដឹងថា អ្នកទាំងអស់គ្នាចង់ដឹងណាស់ក៏ដោយ។ អ្វីដែលខ្ញុំនឹងនិយាយ គឺខ្ញុំនិយាយអំពីមូលហេតុ។ មូលហេតុដែលបង្ខំឲ្យខ្ញុំគ្មានជំរើសណាផ្សេង ក្រៅតែពីរត់គេខ្លួន។នេះជាលើកទីមួយហើយ តាំងតែពីពេលគេចាប់ខ្លួនខ្ញុំ ដែលខ្ញុំអាចមានសិទ្ធិនិយាយ ការពារខ្លួនខ្ញុំបាន ដោយសេរី ហើយអាចឆ្លើយសំណួររបស់អ្នកទាំងអស់គ្នាបាន។
ប្រសាសន៍លោក កាកឡូស ហ្គោន ពេលបើកសន្និសីទកាសែតនៅបេរូត ប្រែសម្រួលដោយ ម៉ម ពិសី
លោកកាកឡូស ហ្គោន បានលើកឡើងថា បទចោទប្រកាន់មកលើរូបលោក ដែលគេដាក់នៅចំពោះមុខរដ្ឋអាជ្ញាជប៉ុន គឺជាការប្រឌិតទាំងស្រុង។ លោកកាកឡូស ហ្គោន បានចោទថ្នាក់ដឹកនាំក្រុមហ៊ុន Nissan របស់ជប៉ុន ថាបានឃុបឃិតគ្នា ជាមួយមន្ត្រីតុលាការជប៉ុន ដើម្បី "វាយបំបាក់"លោក បង្ខំឲ្យលោកសារភាព នូវកំហុសដែលលោកមិនបានសាងទាល់តែសោះ។ ទាំងនេះ ក៏ព្រោះតែ Nissan ច្រណែននឹងរូបលោក ព្រមទាំងច្រណែននឹងឥទ្ធិពល របស់ក្រុមហ៊ុនRenault ទៅលើក្រុមហ៊ុន Nissan៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ