លីបង់៖ នាយករដ្ឋមន្ត្រីថ្មីប្រកាសថា ប្រទេសកំពុងប្រឈមខ្លាំងនឹងមហន្តរាយ
លីបង់មាននាយករដ្ឋមន្ត្រី និងរដ្ឋាភិបាលថ្មីហើយ ដើម្បីដោះស្រាយបញ្ចប់បាតុកម្មតវ៉ា និងស្តារប្រទេសឲ្យផុតពីវិបត្តិ។ តែយ៉ាងណានាយករដ្ឋមន្ត្រី និងរដ្ឋាភិបាលថ្មីនេះ នៅតែត្រូវបានក្រុមបាតុករលីបង់ បដិសេធដដែល ថាជាបក្សពួកពុករលួយដូចតែមុន។ ជាមួយនឹងកំហឹងតវ៉ាមិនស្ងប់នេះ លោកហាសាន ឌីយ៉ាប នាយករដ្ឋមន្ត្រីថ្មីលីបង់ បានប្រកាសថា លីបង់កំពុងប្រឈមនឹងមហន្តរាយសេដ្ឋកិច្ច ធ្ងន់ធ្ងរណាស់ ហើយលោកនិងរដ្ឋាភិបាលថ្មី ត្រូវការពេលវេលា ដើម្បីស្តារប្រទេសនេះឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
៣ខែមកហើយ ដែលលីបង់បានធ្លាក់ក្នុងវិបត្តិសេដ្ឋកិច្ច និងនយោបាយធ្ងន់ធ្ងរ។ ទីបំផុត កាលពីយប់ថ្ងៃទី២១មករា រដ្ឋាភិបាលថ្មី ត្រូវបានបង្កើតឡើង ដោយមានលោក ហាសាន ឌីយ៉ាប (Hassan Diab) អតីតសាស្ត្រាចារ្យបច្ចេកទេសវិស្វកម្ម វ័យ៦១ឆ្នាំ ធ្វើជានាយករដ្ឋមន្ត្រី។ រដ្ឋាភិបាលថ្មី គឺជារដ្ឋាភិបាលដែលមានទំហំតូច ព្រោះវាស្ថិតនៅក្នុងភាពអាសន្ន ដោយរដ្ឋមន្ត្រីខ្លះ ត្រូវកាន់មុខតំណែងដល់ទៅ២ក្រសួង។
នៅព្រឹកថ្ងៃពុធ ទី២២មករា លោកនាយករដ្ឋមន្ត្រីថ្មី បានដឹកនាំការប្រជុំគណរដ្ឋមន្ត្រីជាលើកទីមួយ។ ក្រោយការប្រជុំនេះ លោកហាសាន ឌីយ៉ាប បានសរសេរសេចក្តីប្រកាសមួយ ដែលមានខ្លឹមសារថា៖ “លីបង់កំពុងតែប្រឈមនឹងវិបត្តិសេដ្ឋកិច្ច ហិរញ្ញវត្ថុ និងវិបត្តិសង្គមធ្ងន់ធ្ងរណាស់។ រដ្ឋាភិបាលថ្មីត្រូវតែធ្វើឲ្យអស់ពីសមត្ថភាព ដើម្បីបញ្ចៀសកុំឲ្យប្រជាជនរងផលប៉ះពាល់ខ្លាំងពេក។ ការងារនេះមិនមែនជាការងាយទេ ហើយប្រជាជនលីបង់ហត់នឿយ មិនអាចទទួលយកការសន្យាខ្យល់ ដូចមុនទៀតបានឡើយ”។
សូមបញ្ជាក់ថា រដ្ឋាភិបាលថ្មីនេះ គឺក្រុមនយោបាយហេសបូឡា ជាអ្នកបង្កើតឡើង ដោយសហការជាបក្សសម្ព័ន្ធមិត្ត ព្រោះក្រុមហេសបូឡា មានសម្លេងភាគច្រើននៅក្នុងសភា។ ចំណែកគណបក្សរបស់លោក សាដ ហារីរី អតីតនាយករដ្ឋមន្ត្រីដែលលាលែងពីតំណែង បានបដិសេធ មិនចូលរួមក្នុងរដ្ឋាភិបាលថ្មីនេះទេ។
តែយ៉ាងណា កំហឹងរបស់ប្រជាជនហាក់មិនទាន់ស្រកចុះទេ។ ប្រជាជនលីបង់ ចង់ឲ្យមានការផ្លាស់ប្តូរទាំងស្រុង ក្នុងចំណោមថ្នាក់ដឹកនាំនយោបាយ ពោលគឺមិនមែនបក្សពួក ក្រុមគ្រួសារមនុស្សដដែលៗនោះទេ។ បាតុកម្មហឹង្សា នៅតែកើតឡើងខ្លាំងនៅតាមទីក្រុងធំៗ កាលពីយប់ថ្ងៃអង្គារ ហើយបន្តនៅថ្ងៃពុធ នៅតាមទីតាំងខ្លះ។ នៅរដ្ឋធានីបេរូត ក្រុមបាតុករបានចោលដុំថ្ម និងគុបផាវបំផ្ទុះទៅលើអាគាររដ្ឋសភា ចំណែកសមត្ថកិច្ចវិញបានធ្វើការបង្រ្កាប ដោយប្រើគ្រាប់បែកផ្សែង និងឧស្ម័នបង្ហូរទឹកភ្នែក។
បាតុករម្នាក់ឈ្មោះ Alaa Khodor បានលើកឡើងថា រដ្ឋាភិបាលថ្មីរបស់លោក ហាសាន់ ដ្យ៉ាប មិនមែនជារដ្ឋាភិបាលឯករាជ្យទេ ហើយក៏មិនអាចឆ្លើយតប ទៅនឹងការចង់បានរបស់មហាជនដែរ។ បាតុករម្នាក់ទៀតឈ្មោះ Ahmad Zaid អាយុ២១ឆ្នាំ បាននិយាយថា អស់ពីក្រុមអ្នកនយោបាយពុករលួយ ពេលនេះគេដាក់បក្សពួកគ្នាគេ មកវិញដដែល។
គួររំលឹកថា លីបង់កំពុងប្រឈមនឹងហានិភ័យ ជាមួយនឹងបំណុលសាធារណៈចំនួនប្រមាណ៩០ពាន់លានដុល្លារ។ ការស្តារសេដ្ឋកិច្ច និងស្តារទំនុកចិត្តពីប្រជាជនលីបង់ គឺជាការងារដ៏លំបាក សម្រាប់រដ្ឋាភិបាលថ្មី។ ភ្លាមៗក្រោយចូលកាន់មុខតំណែង លោក ហាសាន ឌីយ៉ាប បានថ្លែងថា ការស្តារសេដ្ឋកិច្ច គឺជាអាទិភាពរបស់រដ្ឋាភិបាលថ្មី ហើយលោកសូមមេត្តា ឲ្យប្រជាជនទុកពេលវេលាឲ្យរដ្ឋាភិបាលថ្មី បានបញ្ចេញសមត្ថភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ