ប្រតិកម្មផ្សេងៗចំពោះមរណភាពរបស់អតីតមេដឹកនាំផ្តាច់ការអេហ្ស៊ីប
លោក ហូស្នី ម៉ូបារ៉ាក់ (Hosni Moubarak) អតីតប្រធានាធិបតីអេហ្ស៊ីប ពីឆ្នាំ ១៩៨១-២០១១ បានស្លាប់នៅថ្ងៃទី ២៥កុម្ភៈ ២០២០ ក្នុងជន្មាយុ ៩១ឆ្នាំ។ អេហ្ស៊ីបបានប្រកាសកាន់ទុក្ខថ្នាក់ជាតិរយៈពេលបីថ្ងៃ ចាប់ពីថ្ងៃពុធទី ២៦កុម្ភៈនេះទៅ និងរៀបចំពិធីបុណ្យសពអតីតប្រធានាធិបតី ដោយផ្តល់កិត្តយស ជាវីរបុរសជាតិ។ តែប្រជាជនអេហ្ស៊ីប និងបស្ចិមលោក ខ្លះ ចាត់ទុកលោក ម៉ូបារ៉ាក់ ជាជនផ្តាច់ការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
សម្រាប់រដ្ឋាភិបាលកំពុងកាន់អំណាច និងអគ្គមេបញ្ជាការកងទ័ពអេហ្ស៊ីប អតីតប្រធានាធិបតី ម៉ូបារ៉ាក់ ជា “វីរបុរសជាតិ” ដែលសក្តិសមនឹងទទួលបាននូវការប្រារព្ធពិធីបុណ្យជាផ្លូវការថ្នាក់ជាតិ។ ជាវីរបុរសជាតិ ព្រោះលោក ម៉ូបារ៉ាក់ បានដឹកនាំអេហ្ស៊ីបឱ្យមានសន្តិភាពបញ្ចប់សង្គ្រាមជាមួយអ៊ីស្រាអែល នៅឆ្នាំ១៩៧៣ បានផ្សះផ្សាពិភពអារ៉ាប ដោយជួយឱ្យមានស្ថិរភាពនៅតំបន់ដើមបូព៌ា និងសម្រេចបានកិច្ចព្រមព្រៀងអ៊ីស្រាអែលប៉ាឡេស្ទីននៅឆ្នាំ ១៩៩៤។
ស្នាដៃសម្របសម្រួល និងនាំស្ថិរភាពឱ្យតំបន់ បានធ្វើឱ្យបស្ចិមលោក មើលឃើញលោក ម៉ូបារ៉ាក់ ជាមេដឹកនាំដ៏សំខាន់ ជាអ្នកធានាសន្តិភាពឱ្យតំបន់ ដែលមិនអាចខ្វះបាន និងដែលត្រូវផ្តល់ការគោរពនិងឧទ្ទិសវិញ្ញាណក្ខន្ធ នាឱកាសនេះ។ សម្រាប់អ្នកជំនាញការទូត នេះជាការធម្មតាទេ ដែលពិភពលោកត្រូវបែបចែកឱ្យដាច់រវាងនយោបាយការបរទេស និងនយោបាយផ្ទៃក្នុង របស់ប្រទេសមួយនោះ។
ប៉ុន្តែចំពោះប្រជាពលរដ្ឋមួយចំនួនវិញ ពួកគេមិនចង់ដឹងចង់ឮអំពីអតីតប្រធានាធិបតីរូបនេះទៀតទេ ព្រោះ លោក ម៉ូបារ៉ាក់ ជាបានដឹកនាំប្រទេសដោយផ្តាច់ការ។ ក្នុងរយៈពេលកាន់អំណាច៣០ឆ្នាំ លោក ម៉ូបារ៉ាក់ ដែលជាអតីតមេបញ្ជការយោធា បានបង្ក្រាប បំបាត់សំលេងប្រឆាំង និងបានខ្ទាតចេញពីតំណែង ដោយចលនាបាតុកម្មបះបោរប្រឆាំងនឹងអំពើពុករលួយ និងអំពើផ្តាច់ការរបស់រដ្ឋាភិបាល នៅខែមករា ឆ្នាំ២០១១។ អស់តំណែងដោយចលនា “បដិវត្តអារ៉ាប” លោកម៉ូបារ៉ាក់ថែមទាំងត្រូវបានតុលាការកាត់ទោសឱ្យជាប់ពន្ធនាគារអស់មួយជីវិតពីបទបានបង្ក្រាបបាតុករដោយហិង្សា ស្លាប់អស់ជាង៨០០នាក់។ តុលាការបានលុបលាងទោសលោកម៉ូបារ៉ាក់ ទៅវិញ នៅថ្ងៃទី ២ មីនា ២០១៧ និងដោះលែងឱ្យមានសេរីភាពទាំងស្រុងនៅថ្ងៃទី ២៤មីនា ២០១៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ