អារ៉ាប៊ីសាអូឌីត លុបចោលទោសប្រហារជីវិត លើអនីតិជន
ក្រោយពីបាន ប្រកាសលុបចោលច្បាប់វាយអ្នកទោស អារ៉ាប៊ីសាអូឌីត ដែលជាប្រទេសមហាអភិរក្ស និងជាប់ចោទជាប្រទេសរំលោភសិទ្ធិមនុស្សខ្លាំងជាងគេមួយ បានប្រកាស នៅថ្ងៃអាទិត្យទី ២៦មេសា អារ៉ាប៊ីសាអូឌីត លុបចោលទោសប្រហារជីវិត លើអនីតិជន។ នេះបើតាមសេចក្តីថ្លែងការណ៍របស់ប្រធានគណៈកម្មការសិទ្ធិមនុស្ស ដែលជាស្ថាប័នអង្គការរបស់រដ្ឋាភិបាល។ ទោសប្រហារជីវិតលើក្មេងមិនទាន់ពេញវ័យនឹងត្រូវជំនួសមកវិញដោយការដាក់ទោសក្នុងពន្ធនាគារត្រឹម១០ឆ្នាំ។ នេះបើតាមប្រភពដដែល។
ចុះផ្សាយនៅថ្ងៃ៖
អារ៉ាប៊ីសាអូឌីតមានមុខមាត់ថ្មី និងមានច្បាប់ព្រហ្មទណ្ឌទំនើប ! ទោសប្រហារជីវិត នឹងមិនត្រូវអនុវត្តលើជនជាប់ទោសដែលមិនទាន់ពេញវ័យទេ ! នេះបើតាមសេចក្តីថ្លែងការណ៍របស់ប្រធានគណៈកម្មការសិទ្ធិមនុស្សអារ៉ាប៊ីសាអូឌីត ដែលបញ្ជាក់ថា ការលុបទោសប្រហារជីវិតលើអនីតិជន ត្រូវបានធ្វើឡើងដោយក្រិត្យរបស់ព្រះមហាក្សត្រ។ អំណើះតទៅ ទោសប្រហារជីវិតលើអនីតិជន នឹងត្រូវជំនួយមកវិញដោយការដាក់ទោសក្នុងពន្ធនាគាររយៈពេល១០ឆ្នាំ។
តាមរយៈក្រិត្យលុបទោសប្រហារជីវិតលើក្មេងមិនទាន់ពេញវ័យនេះ យុវជនដើមកំណើតអ៊ីស្លាមនិកាយឈីអ៊ីត (សហគមន៍ជនជាតិភាគតិចអ៊ីស្លាមនៅអារ៉ាប៊ីសាអូឌីត) ចំនួន ៦នាក់ ដែលតុលាការបានកាត់ទោសប្រហារជីវិតពីបទបានចូលរួមធ្វើបាតុកម្មប្រឆាំងនឹងរដ្ឋាភិបាល ទាំងមានអាយុក្រោម១៨ឆ្នាំ នឹងបានរួចជីវិត។
នៅក្នុងរបាយការណ៍របស់អង្គការ ចេញផ្សាយនៅសប្តាហ៍មុន បានបង្ហាញថា អារ៉ាប៊ីសាអូឌីត បានបំបែកកំណាត់ត្រា ដោយបានប្រហារជីវិតអ្នកទោស ចំនួន១៨៤នាក់ ក្នុងអំឡុងឆ្នាំ ២០១៩ ពោលជាចំនួនដ៏ច្រើនជាងបំផុតនៅលើពិភពលោក។ នៅអារ៉ាប៊ីសាអូឌីត ដែលជាប្រទេសមហាអភិរក្សអ៊ីស្លាម ការប្រព្រឹត្តអំពីមនុស្សឃាត រំលោភបំពានផ្លូវភេទ លួចប្លន់ឬវាយប្រហារដោយប្រើអាវុធ ជួញដូរគ្រឿងញៀន សកម្មភាពអាបធ្មប់ ទង្វើផិតក្បត់ ស្រលាញ់ភេទដូចគ្នា ប្រព្រឹត្តកាមតណ្ហាតាមផ្លូវធំ បោះបង់ព្រះ អាចនឹងត្រូវមានទោសដល់ប្រហារជីវិត។ កាលពីថ្ងៃសុក្រ តុលាការកំពូលអារ៉ាប៊ីសាអូឌីត បានសម្រេចលុបចោលទោសវាយនឹងរំពាត់។
តាំងពីព្រះអង្គម្ចាស់ សាល់ម៉ាន (Mohammed ben Salmane) ក្លាយជារាជបុត្រស្នងរាជនៅឆ្នាំ២០១៧មក អារ៉ាប៊ីសាអូឌីត រងការរិះគន់និងចង្អុលមុខកាន់តែខ្លាំងឡើងៗពីសំណាក់អង្គការការពារសិទ្ធិមនុស្ស។ ជម្រើសនយោបាយធ្វើកំណែទម្រង់បើកចំហសេដ្ឋកិច្ច និងសង្គម អបដោយការបង្ក្រាបកាន់តែច្រើនឡើងៗសំឡេងប្រឆាំងក្នុងផ្ទៃរាជវង្សនិងក្នុងចំណោមក្រុមបញ្ញវ័ន្ត។ នាមជាអ្នកកំណែទម្រង់ របស់ព្រះអង្គម្ចាស់សាល់ម៉ាន កាន់តែស្រអាប់ថែមទៀត ក្រោយឃាតកម្មសម្លាប់អ្នកកាសែត Jamal Khashoggi នៅក្នុងស្ថានកុងស៊ុលអារ៉ាប៊ីសាអូឌីត ប្រចាំទីក្រុងអ៊ីស្តង់ប៊ូល កាលពីឆ្នាំ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ