តុលាការកំពូលអ៊ីស្រាអែលច្រានចោលច្បាប់ស្តីពីអាណានិគមកិច្ចលើទឹកដីប៉ាឡេស្ទីន
តុលាការកំពូលអ៊ីស្រាអែល បានចេញសេចក្តីសម្រេច នៅថ្ងៃអង្គារទី ១០ មិថុនា ច្រានចោលច្បាប់ស្តីពីអាណានិគមកិច្ចអ៊ីស្រាអែលលើទឹកដីប៉ាឡេស្ទីន។ ជាច្បាប់ដ៏ចម្រូងចម្រាសដែលនាំអ៊ីស្រាអែលឱ្យបានក្លាយជាម្ចាស់ដីរាប់សិបហិចតារ នៅតំបន់ស៊ីហ្សកដានី តែក៏ជាច្បាប់ដែលប៉ាឡេស្ទីនស្រែកបរិហារនិងប្រឆាំងយ៉ាងខ្លាំង។
ចុះផ្សាយនៅថ្ងៃ៖
ស្តាប់ - ០២:២២
ច្បាប់ស្តីពីអាណានិគមកិច្ចអ៊ីស្រាអែលលើទឹកដីប៉ាឡេស្ទីន ដ៏ចម្រូងចម្រាស ត្រូវបានអនុម័តដោយសភាអ៊ីស្រាអែលនៅឆ្នាំ២០១៧ ប៉ុន្តែត្រូវបានក្រុមប្រឹក្សាមូលដ្ឋានប៉ាឡេស្ទីន និងអង្គការក្រៅរដ្ឋាភិបាលប៉ាឡេស្ទីននិងអ៊ីស្រាអែល តវ៉ាប្រឆាំងនិងដាក់ពាក្យបណ្តឹងទៅតុលាការកំពូលអ៊ីស្រាអែលឱ្យអារកាត់សេចក្តី។
បើតាមខ្លឹមសារច្បាប់ដែលអនុម័តនៅថ្ងៃទី ៦កុម្ភៈឆ្នាំ២០១៧ អ៊ីស្រាអែលដែលបានទៅសាងសង់ផ្ទះធ្វើអាណានិគមកិច្ចនៅស៊ីហ្សកដានីដោយគ្មានការអនុញ្ញាតពីអាជ្ញាធរអ៊ីស្រាអែល អាចនឹងយកដីជារបស់ពលរដ្ឋប៉ាឡេស្ទីន មកធ្វើជាកម្មសិទ្ធិខ្លួន តាមរយៈសំណងជាថវិកា។ ពោលគឺជាច្បាប់ដែលតាក់តែងឡើងជាប្រយោជន៍ជនជាតិជ្វីហ្វ ដើម្បីធ្វើយ៉ាងណាឱ្យការធ្វើអាណានិគម ក្រៅផ្លូវការ មិនទទួលស្គាល់ដោយអាជ្ញាធរ ក្លាយជាទង្វើស្របច្បាប់ ហើយការពារមិនឱ្យតុលាការសម្រេចមានការវាយបំផ្លាញសំណង់នោះវិញ។
សូមបញ្ជាក់ថា អ៊ីស្រាអែលបានបែងចែកការធ្វើអាណានិគមកិច្ចជាពីរ ៖ អាណានិគមកិច្ចទទួលស្គាល់ដោយច្បាប់ និងអាណានិគមកិច្ចខុសច្បាប់អ៊ីស្រាអែល។ ប៉ុន្តែស៊ីហ្សកដានី ជាដែនដីប៉ាឡេស្ទីន ដែលអ៊ីស្រាអែលបានចូលធ្វើអាណានិគមតាំងពីឆ្នាំ១៩៦៧មក ហើយបើយោងតាមច្បាប់អន្តរជាតិ រាល់គ្រប់ការធ្វើអាណានិគមកិច្ចសុទ្ធតែខុសច្បាប់ទាំងអស់។
ជាងបីឆ្នាំក្រោយ តុលាការកំពូលបានផ្តល់សេចក្តីសម្រេច ច្រានច្រោលច្បាប់ដ៏ចម្រូងចម្រាសនេះ។ ភាគីប៉ាឡេស្ទីន ព្រមទាំងអង្គការក្រៅរដ្ឋាភិបាលដែលជាអ្នកដើមបណ្តឹងបានសម្តែងការអបអរ និងស្វាគមន៍សេចក្តីសម្រេចរបស់តុលាការកំពូលដែលជាការប្រយុទ្ធប្រឆាំងនឹងទង្វើគំរាមកំហែងធ្វើអាណានិគមឥតឈប់របស់អ៊ីស្រាអែល។ តែសម្រាប់អ៊ីស្រាអែលវិញ រដ្ឋមន្ត្រីទទួលបន្ទុកការតាំងលំនៅ បានបរិហារថាតុលាការប្រកាសសង្គ្រាមប្រឆាំងនឹងពលរដ្ឋអ៊ីស្រាអែលមិនឱ្យរស់នៅលើទឹកដីអ៊ីស្រាអែល។
ការធ្វើអាណានិគមកិច្ចអ៊ីស្រាអែលជាឧបសគ្គមួយនៃការចរចាសន្តិភាពជាមួយប៉ាឡេស្ទីន។ នៅខែកក្កដាខាងមុខ រដ្ឋាភិបាលរួបរួមអ៊ីស្រាអែល ត្រូវផ្តើមកម្មវិធីនយោបាយរបស់ខ្លួនតាមផែនការស្នើឡើងដោយរដ្ឋបាលលោកដូណាល់ ត្រាំ។ ផែនការ ដែលគ្រោងឱ្យមានការធ្វើអាណានិគមកិច្ចផ្នែកមួយនៃតំបន់ស៊ីហ្សកដានី ទន្ទឹមនឹងសំណើបង្កើតរដ្ឋប៉ាឡេស្ទីនឯករាជ្យតែមានដីតូចជាងមុន ដែលប៉ាឡេស្ទីនបដិសេធដាច់ខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ