ក្រុមហាម៉ាសប៉ាឡេស្ទីន អំពាវនាវឲ្យមានឯកភាពជាតិ ដើម្បីប្រយុទ្ធនឹងផែនការបំពាន របស់អ៊ីស្រាអែល
ក្រុមហាម៉ាសប៉ាឡេស្ទីន ដែលគ្រប់គ្រងតំបន់ហ្កាហ្សា បានអំពាវនាវកាលពីថ្ងៃចន្ទ ទី១៥មិថុនា ឲ្យក្រុមនយោបាយប៉ាឡេស្ទីនទាំងអស់ រួមរួមគ្នាកសាងកម្លាំង ដើម្បីតស៊ូ ប្រឆាំងនឹងផែនការទន្រ្ទានយកដីប៉ាឡេស្ទីន ពីសំណាក់អ៊ីស្រាអែល។ ជាផែនការសន្តិភាព គូសវាសដោយរដ្ឋាភិបាលរបស់លោកដូណាល់ត្រាំ ដែលបានស្នើទៅអ៊ីស្រាអែល ហើយដែលអ៊ីស្រាអែលពេញចិត្ត និងចង់យកមកអនុវត្តនៅរវាងខែកក្កដាខាងមុខ។
ចុះផ្សាយនៅថ្ងៃ៖
ស្តាប់ - ០២:៤៨
លោកSalah al-Bardawil មេដឹកនាំជាន់ខ្ពស់ម្នាក់ របស់ក្រុមហាម៉ាសប៉ាឡេស្ទីន បានធ្វើសន្និសីទកាសែត នៅតំបន់ហ្កាហ្សា ដោយបានថ្លែងអំពាវនាវ ឲ្យប្រជាជនប៉ាឡេស្ទីនទាំងអស់ ប្រមូលកម្លាំងគ្នា ដើម្បីប្រឆាំងនឹងផែនការទន្រ្ទានឈ្លានពានគ្រប់ទំរង់ ពីសំណាក់អ៊ីស្រាអែល។ ក្រៅពីប្រកាសប្រមូលការសាមគ្គីរបស់ប្រជាជន មេដឹកនាំក្រុមហាម៉ាសរូបនេះ បានប្រកាសប្រមូលការរួមរួមគ្នា ពីសំណាក់ក្រុមបក្សនយោបាយ ដែលដឹកនាំប៉ាឡេស្ទីន ដើម្បីតទល់ជាមួយផែនការ របស់លោកដូណាល់ ត្រាំ ដែលបានកាត់ដីមួយផ្នែកធំរបស់ប៉ាឡេស្ទីន ទៅឲ្យអ៊ីស្រាអែល។
សូមបញ្ជាក់ថា ចាប់ពីថ្ងៃទី១កក្កដានេះទៅ អ៊ីស្រាអែល នឹងត្រូវដាក់ចេញនូវយុទ្ធសាស្ត្ររបស់ខ្លួន ក្នុងការអនុវត្តផែនការសន្តិភាព ស្នើដោយរដ្ឋាភិបាលអាេមរិក។ ក្នុងផែនការនេះ អ៊ីស្រាអែល នឹងអាចកាត់បញ្ចូល តំបន់ជ្រលងទន្លេហ្សកដង់ទាំងមូល ឲ្យមកនៅក្នុងដីអ៊ីស្រាអែល រួមជាមួយនឹងតំបន់ភូមិជនជាតិជ្វីហ្វមួយចំនួនធំ ដែលបានទៅដាក់អាណានិគម ក្នុងតំបន់ស៊ីសហ្សកដានី របស់ប៉ាឡេស្ទីន។ បន្ថែមពីនេះ ទីក្រុងហ្សេរូសាឡឹម នឹងត្រូវទទួលស្គាល់ថា ជារដ្ឋធានីរបស់អ៊ីស្រាអែលតែម្នាក់ឯងគត់ ដោយផ្តាច់មុខ។ ដែលនេះ គឺវាផ្ទុយស្រលះ ពីការទាមទារចង់បានរបស់ ភាគីប៉ាឡេស្ទីន។
គួររំលឹកដែរថា ជាច្រើនឆ្នាំមកហើយ ការតស៊ូនយោបាយ ដើម្បីកសាងរដ្ឋប៉ាឡេស្ទីនឯករាជ្យ ត្រូវជួបបរាជ័យ ដោយសារតែភាគីនយោបាយប៉ាឡេស្ទីនបែកបាក់គ្នា។ ក្រុមហាម៉ាស ដែលគ្រប់គ្រងតំបន់ហ្កាហ្សា ដោយផ្តាច់មុខតាំងតែពីឆ្នាំ២០០៧មក បានបដិសេធ មិនសហការជាមួយក្រុមហ្វាតាហ ដែលដឹកនាំដោយលោក Mahmoud Abbas នៅតំបន់ស៊ីសហ្សកដានីទេ។ តែក្រុមភាគីប៉ាឡេស្ទីនទាំង២នេះ សុទ្ធតែបានប្រកាសច្រានចោល ផែនការសន្តិុភាពគូសវាសដោយ រដ្ឋាភិបាលលោកដូណាល់ ត្រាំ។
ការប្រកាសស្វែងរកឯកភាពជាតិ ពីសំណាក់ក្រុងហាម៉ាស នាពេលនេះ គឺជាដំណឹងល្អមួយ សម្រាប់អនាគតនៃការបង្រួបបង្រួមជាតិប៉ាឡេស្ទីន។ លោក Salah al-Bardawil តំណាងក្រុមហាម៉ាស បានសង្កត់ធ្ងន់ថា ចាប់ពីពេលនេះទៅ គឺគ្មានទៀតឡើយ ការគ្រប់គ្រងនយោបាយផ្តាច់មុខ តែម្នាក់ឯងតាមតំបន់នីមួយៗ។ លោកបានអំពាវនាវឲ្យមានការប្រជុំគ្នាក្នុងពេលដ៏ឆាប់ ជាមួយអង្គការតស៊ូរំដោះប៉ាឡេស្ទីន ដែលជាចលនារួមគ្នា រវាងក្រុមភាគីនយោបាយប៉ាឡេស្ទីនភាគច្រើន។
គួរកត់សំគាល់ដែរថា មួយរយៈចុងក្រោយនេះ ប្រជាជនប៉ាឡេស្ទីន បានធ្វើបាតុកម្មតវ៉ា ជាញឹកញាប់ ប្រឆាំងទៅនឹងផែនការគូសវាសព្រំដែនថ្មីរបស់អ៊ីស្រាអែល ដែលពុះញែកទឹកដីប៉ាឡេស្ទីន ជាជម្រៀកៗ។ បច្ចុប្បន្នដីប៉ាឡេស្ទីន ត្រូវពុះចែកដាច់គ្នាជា២ទៅហើយ គឺតំបន់ហ្កាហ្សា មានប្រជាជនប្រមាណ២លាននាក់ និងតំបន់ស៊ីសហ្សកដានី មានប្រជាជានប្រមាណ២លាន៧សែននាក់ ហើយដែលពួកគេ រស់នៅក្បែរសហគមជនជាតិជ្វីហ្វ ប្រមាណ៤សែន៥ម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ