យេម៉ែន៖ នាវាផ្ទុកប្រេងឆៅចតចោល៥ឆ្នាំ កំពុងបង្កការព្រួយបារម្ភថានឹងលិច ធ្លាយប្រេងក្នុងសមុទ្រ
នាវាចំណាស់ ផ្ទុកប្រេងឆៅប្រមាណជាង១លានធុងបារីល ដែលចតចោលតាំងពីឆ្នាំ២០១៥ នៅប្រទេសយេម៉ែន កំពុងប្រឈមនឹងការលិចទៅក្នុងសមុទ្រ។ ប្រេងឆៅដែលស្តុកនៅលើនាវានោះ អាចនឹងធ្លាយចូលទៅក្នុងសមុទ្រ ដែលនេះអាចជាគ្រោះមហន្តរាយដ៏ធំមហិមា។ ប្រឈមនឹងការព្រួយបារម្ភដ៏ធំនេះ អង្គការសហប្រជាជាតិ នឹងបើកការប្រជុំបន្ទាន់ជាមួយអ្នកជំនាញ នៅថ្ងៃទី១៥កក្កដា ដើម្បីស្វែងរកដំណោះស្រាយ ឲ្យក្រុមឧទ្ទាមហ៊ូទីដែលគ្រប់គ្រងតំបន់នោះ បើកផ្លូវឲ្យគេចូលទៅជួសជុលនាវា មុននឹងអ្វីៗហួសពេល។
ចុះផ្សាយនៅថ្ងៃ៖
ស្តាប់ - ០២:៣១
នាវា FSO Safer មានចំណាស់៤៥ឆ្នាំ ផ្ទុកប្រេងឆៅចំនួន១លាន១សែនធុងបារីស បានបោះយុថ្កាចតចោលក្នុងសមុទ្រក្បែរកំពង់ផែ Hodeida ប្រមាណជាង៥ឆ្នាំមកហើយ។ ពោលគឺចាប់តាំងពីក្រុមឧទ្ទាមហ៊ូទី បានវាយសង្រ្គប់កាន់កាប់តំបន់នេះ នៅឆ្នាំ២០១៥។ ៥ឆ្នាំមកហើយ ដែលនាវានេះ ពុំមានការថែរទាំជួសជុល ហើយដែលកំពុងបង្កការព្រួយបារម្ភជាខ្លាំង។
លោក Ian Ralby អ្នកជំនាញនៅការិយាល័យ IR Consilium បានអះអាងថា នាវានេះមានស្ថានភាពទ្រុឌទ្រោមណាស់។ ក្រៅពីតួនាវាត្រូវច្រេសស៊ី សឹករិចរិល កាលពីខែឧសភា គេបានរកឃើញទុយយោបង្ហូរហ្កាសបែកធ្លាយ ហូរទឹកចូលទៅក្នុងបន្ទប់គ្រឿងម៉ាស៊ីន។ ប្រព័ន្ធឧស្ម័នហ្កាសក្នុងនាវានេះ អាចនឹងផ្ទុះក្នុងពេលខាងមុខ បើសិនជាគ្មានការជួសជុល។
ក្រុមប្រឹក្សាសន្តិសុខបានកោះប្រជុំបន្ទាន់ នៅថ្ងៃទី១៥កក្កដា។ លោក Stephane Dujarric អ្នកនាំពាក្យខុទ្ទការល័យ លោកអគ្គលេខាធិការអង្គការសហប្រជាជាតិ បានលើកឡើងថា អ្នកជំនាញសង្ឃឹមថា នឹងអាចទទួលបានការយល់ព្រមពីសំណាក់ក្រុមឧទ្ទាមហ៊ូទី ដើម្បីបើកផ្លូវឲ្យអ្នកជំនាញអាចចូលទៅពិនិត្យ និងជួសជុលនាវានេះ ឲ្យទាន់ពេលវេលា។
សូមបញ្ជាក់ថា ប្រេងឆៅនៅលើនាវានេះ ត្រូវគេប៉ាន់ស្មានថាមានតម្លៃប្រមាណ៤០លានដុល្លារ បើគិតតាមតម្លៃទីផ្សារបច្ចុប្បន្ន។ ក្រុមហ៊ូទី បានទាមទារកាលពីខែមិថុនាកន្លងទៅ ថាត្រូវតែមានការធានាប្រគល់ប្រាក់នេះ មកឲ្យក្រុមខ្លួនយកទៅបើកប្រាក់ខែឲ្យបុគ្គលិកហ៊ូទី។ ដោយឡែក លោកនាយករដ្ឋមន្ត្រីយេម៉ែន បានអំពាវនាវ ឲ្យសហគមអន្តរជាតិ ត្រូវផ្តន្ទាទោសក្រុមហ៊ូទី ដែលរារាំងការងារសង្រ្គោះនាវាដឹកប្រេងនេះ ពីការលិចលង់ក្នុងសមុទ្រ ហើយប្រាក់ថ្លៃប្រេង ត្រូវយកទោចំណាយក្នុងកិច្ចការមនុស្សធម៌សុខាភិបាល។
លោកស្រី Lise Grande អ្នកសម្របសម្រួលកិច្ចការមនុស្សធម៌ប្រចាំយេម៉ែន របស់អង្គការសហប្រជាជាតិបានលើកឡើងថា បើនាវានេះលិច ហើយធ្លាយប្រេងឆៅជាង១លានធុងបារីលទៅក្នុងសមុទ្រ នោះនឹងកើតមានមហន្តរាយដ៏ធំ២ ទីមួយគឺមហន្តរាយដល់បរិស្ថានធម្មជាតិ ហើយទី២ គឺមហន្តរាយសេដ្ឋកិច្ចនិងជីវភាពមនុស្ស។ ទំហំប្រេងឆៅដ៏ច្រើនសម្បើមនេះ នឹងធ្លាយអណ្តែតលាតសន្ធឹងគ្របដណ្តប់ នៅឈូងសមុទ្រអាដែន និងសមុទ្រអារ៉ាប៊ី។ កំពង់ផែ Hodeida នឹងត្រូវរាំងស្ទះប្រើការលែងកើត លែងមានចរាចរណ៍នាវា ហើយអ្នកនេសាទយេម៉ែនប្រមាណជាង១២ម៉ឺននាក់ នឹងមិនអាចប្រកបរបរចិញ្ចឹមជីវិតបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ