ស៊ីរី៖ អង្គការសហប្រជាជាតិបោះឆ្នោតបន្តប្រើច្រកទ្វារមនុស្សធម៌ ទោះបីនៅសល់តែមួយទីតាំង
ទីបំផុតទៅ ក្រុមប្រឹក្សាសន្តិសុខនៃអង្គការសហប្រជាជាតិ បានបោះឆ្នោតបន្តប្រើប្រាស់ច្រកទ្វារមនុស្សធម៌ ដើម្បីដឹកស្បៀងអាហារជួយប្រជាជនស៊ីរី តែច្រកទ្វារនោះគឺនៅអាចបើកដំណើរការបានតែមួយទីតាំងប៉ុណ្ណោះ។ ខណៈដែលប្រទេសសមាជិកខ្លះ បានសម្តែងការសោកស្តាយចំពោះការកាត់បន្ថយច្រកទ្វារមនុស្សធម៌ ប្រទេសសមាជិកខ្លះទៀត បានលើកឡើងថា រុស្ស៊ីជាអ្នកសម្រេចចាត់ចែងដាក់សំពាធសព្វបែបយ៉ាង ទៅលើក្រុមប្រឹក្សាសន្តិសុខ ទាក់ទិននឹងសំណុំរឿងស៊ីរីនេះ។
ចុះផ្សាយនៅថ្ងៃ៖
ស្តាប់ - ០២:២២
ប្រទេសសមាជិកក្រុមប្រឹក្សាសន្តិសុខអង្គការសហប្រជាជាតិចំនួន១២ បានបោះឆ្នោតទទួលយកសំណើរបស់អាល្លឺម៉ង់ និងបែលហ្ស៊ិក ដើម្បីបន្តប្រើប្រាស់១ឆ្នាំទៀត នូវច្រកទ្វារមនុស្សធម៌ ស្ថិតនៅព្រំដែនខាងជើងស៊ីរី។ ដោយឡែក រុស្ស៊ី ចិន និងសាធារណៈរដ្ឋដូមីនីកេន បានបោះឆ្នោតអនុបវាទ។
ក៏ប៉ុន្តែច្រកទ្វារមនុស្សធម៌ចំនួន២ ដែលស្ថិតនៅតំបន់នេះ នឹងនៅសល់តែ១ប៉ុណ្ណោះដែលអាចដំណើរការបាន គឺច្រកទ្វារ Bab al-Hawa ដែលស្ថិតនៅក្បែរតំបន់ Idleb។ ចំណែកច្រកទ្វារ Bab al-Salam ដែលជាច្រកចូលទៅក្រុង Alep ដែលមានប្រជាជនស៊ីរីរស់នៅប្រមាណ១លាន៣សែននាក់នោះ នឹងត្រូវបិទ។
សូមរំលឹកថា ច្រកទ្វារមនុស្សធម៌ ត្រូវបានសម្រេចបង្កើត កាលពីឆ្នាំ២០១៤ ដើម្បីអាចដឹកជញ្ជូនស្បៀងជំនួយមនុស្សធម៌ ទៅជួយប្រជាជនស៊ីរី ដោយមិនចាំបាច់ឆ្លងកាត់ការអនុញ្ញាតរបស់រដ្ឋាភិបាលស៊ីរី បាឆាអាល់អាសាដទេ។ លោក Richard Gowan អ្នកជំនាញនៅ International Crisis Group បានលើកឡើងថា រុស្ស៊ីគឺជាមេចាត់ចែង ចង់បើកឬបិទច្រកទ្វារទាំងនោះ តាមចិត្តចង់របស់ខ្លួន។ នៅក្នុងក្របខណ្ឌក្រុមប្រឹក្សាសន្តិុសុខ រុស្ស៊ី និងចិនបានប្រើសិទ្ធិវេតូ ដើម្បីបោះឆ្នោតប្រឆាំងរារាំង ការបន្តបើកច្រកទ្វារទាំងនោះ។
ភាគីរុស្ស៊ីបានលើកឡើងថា ច្រកទ្វារមនុស្សធម៌ខ្លះ មិនចាំបាច់បើកដំណើរការទៀតទេ ព្រោះមិនសូវមានការឆ្លងកាត់។ ការដឹកជញ្ជូនស្បៀងមនុស្សធម៌ ត្រូវត្រលប់មកធ្វើឲ្យបានច្រើន ដោយឆ្លងកាត់រដ្ឋាភិបាលក្រុងដាម៉ាសវិញ។ តែយ៉ាងណា អ្នកជំនាញអង្គការមនុស្សធម៌ ព្រមទាំងប្រទេសមួយជំនួនបានអះអាងថា រដ្ឋាភិបាលក្រុងដាម៉ាស មិនអាចធ្វើឲ្យគេទុកចិត្តបានទេ ហើយជាមួយនឹងអំពើពុករលួយ បក្សពួកនិយម គឺមិនអាចធ្វើឲ្យគេសង្ឃឹមថា ជំនួយមនុស្សធម៌នឹងអាចទៅដល់ដៃប្រជាជនស៊ីរីឡើយ។
គួរកត់សំគាល់ថា ច្រកទ្វារមនុស្សធម៌ដែលមាន៤ទីតាំងនៅឆ្នាំមុន តែពេលនេះ គឺសល់តែ១តែប៉ុណ្ណោះ។ អង្គការ Oxfarm និង Human Rights Watch បានថ្លែងព្រួយបារម្ភថា ច្រកទ្វារមនុស្សធម៌ដែលដំណើរការតែ១នេះ នឹងមិនគ្រប់គ្រាន់ក្នុងការដឹកជញ្ជូនស្បៀងទេ។ អេស្តូនី និងបែកហ្ស៊ីក ថ្វីបើត្រកអរចំពោះការបោះឆ្នោតយល់ព្រមនេះ តែបានសម្តែងការសោកស្តាយ ដែលឃើញចំនួនច្រកទ្វារមនុស្សធម៌ ត្រូវបិទម្តងមួយៗ ហើយក្រុមប្រឹក្សាសន្តិសុខគ្មានជម្រើសអ្វីផ្សេង ក្រៅតែពីទទួលធ្វើតាមការទាមទាររបស់រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ