អ៊ីរ៉ង់អះអាងថា ការសន្ទនាជាមួយនាយកទីភ្នាក់ងារ AIEA គឺប្រកបដោយ “ន័យស្ថាបនា”
លោកនាយកទីភ្នាក់ងារថាមពលនុយក្លេអ៊ែរអន្តរជាតិ ហៅកាត់ថា AIEA បានទៅដល់ទីក្រុងតេអេរ៉ង់ កាលពីថ្ងៃអង្គារទី២៥សីហា ដើម្បីជួបជាមួយ លោកនាយកថាមពលនុយក្លេអ៊ែរអ៊ីរ៉ង់ ដើម្បីនិយាយគ្នាអំពី សកម្មភាពនៃស្ថានីយ៍នុយក្លេអ៊ែរអ៊ីរ៉ង់។ ភាគីអ៊ីរ៉ង់ អះអាងថា ខ្លួនបាននិយាយជាមួយលោកនាយកទីភ្នាក់ងារថាមពលអន្តរជាតិ ដែលជាការសន្ទនាប្រកបដោយ “ន័យស្ថាបនា”។ គួរកត់សំគាល់ថា នេះគឺជាដំណើរទៅដល់លើកទីមួយ របស់អគ្គនាយកAIEA ហើយស្ថិតក្នុងបរិបទមួយដ៏តានតឹង ដែលក្នុងពេលនេះ សហរដ្ឋអាមេរិកកំពុងតែរន្ធាន់ ឲ្យអង្គការសហប្រជាជាតិ ត្រូវដាក់ទណ្ឌកម្មលើអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:២៣
លោក Rafael Mariano Grossi អគ្គនាយកទីភ្នាក់ងារថាមពលនុយក្លេអ៊ែរអន្តរជាតិ បានជួបនិយាយគ្នា ជាលើកទីមួយ នៅរដ្ឋធានីតេអេរ៉ង់ ជាមួយលោក Ali Akbar Salehi ប្រធានអង្គភាពថាមពលនុយក្លេអ៊ែរអ៊ីរ៉ង់ កាលពីថ្ងៃអង្គារទី២៥សីហា។ បន្ទាប់មកទៀត លោកត្រូវជួបជាមួយលោក Javad Zarif ប្រមុខការទូតអ៊ីរ៉ង់។
លោកប្រធានអង្គភាពថាមពលនុយក្លេអ៊ែរអ៊ីរ៉ង់ បានអះអាងប្រាប់បណ្តាញព័ត៌មាន Irna របស់អ៊ីរ៉ង់ថា ការសន្ទនាគ្នា រវាងលោកនិងលោកនាយកAIEA គឺពោរពេញដោយ "ខ្លឹមសារស្ថាបនា"។ លោកបន្តថា ទំព័រទំនាក់ទំនងថ្មី រវាងអ៊ីរ៉ង់ និងទីភ្នាក់ងារថាមពលអន្តរជាតិ បានចាប់ផ្តើមបើកហើយ។ លោក Ali Akbar Salehi បានអះអាងទៀតថា ឆ្លងកាត់ការនិយាយគ្នា គឺទីភ្នាក់ងារថាមពលអន្តរជាតិ បានធានាថានឹងបន្តការងារក្នុងក្របខណ្ឌឯករាជ និងដោយគោរពវិជ្ជាជីវៈពិតប្រាកដ ចំណែកអ៊ីរ៉ង់ វិញ បានធានាថានឹងធ្វើការងារ ដោយគោរពក្របខណ្ឌនៃការសន្យារបស់ខ្លួនដែរ។
គួរបញ្ជាក់ថា កន្លងមកនេះ មានភាពតានតឹងច្រើន រវាងអ៊ីរ៉ង់ និងទីភ្នាក់ងារ AIEA ទាក់ទិននឹងសកម្មភាព របស់ស្ថានីយ៍នុយក្លេអ៊ែរអ៊ីរ៉ង់។ កាលពីចុងខែមិថុនា ក្រុមប្រឹក្សាទេសាភិបាល AIEA បានកំណត់ថា ភាគីអ៊ីរ៉ង់ ត្រូវតែយល់ព្រមបើកឲ្យមានការចុះទៅត្រួតពិនិត្យ ស្ថានីយ៍នុយក្លេអ៊ែរ ចំនួន២ទីតាំង ដើម្បីបិទបញ្ចប់ការសង្ស័យ ថាអ៊ីរ៉ង់ពិតជាបានធ្វើសកម្មភាពបំពានកិច្ចព្រមព្រៀងពិតមែន ឬយ៉ាងណា។
ដើមដំបូងភាគីអ៊ីរ៉ង់បានប្រកែក មិនអនុញ្ញាតឲ្យមានការចុះទៅត្រួតពិនិត្យទេ ដោយអះអាងថា ការសង្ស័យរបស់ទីភ្នាក់ងារAIEA គឺវាឈរលើពាក្យមួរបង្កាច់ គ្មានភស្តុតាង របស់អ៊ីស្រាអែល ដែលគ្មានប្រាថ្នាអ្វីក្រៅតែពីបំផ្លាញអ៊ីរ៉ង់។ ក្រោយមក អ្នកនាំពាក្យអង្គភាពថាមពលនុយក្លេអ៊ែរអ៊ីរ៉ង់ បាននិយាយតាមទូរទស្សន៍ Al-Alam ថា គេអាចអនុញ្ញាតឲ្យអ្នកជំនាញអន្តរជាតិទៅពិនិត្យបាន តែសូមឲ្យចប់រឿងត្រឹមនេះ មិនត្រូវទាមទារអ្វីលើសនេះទេ។
សូមរំលឹកដែរថា ពេលមុនដំណើរទៅដល់អ៊ីរ៉ង់ របស់លោកអគ្គនាយកAIEA ភាគីអ៊ីរ៉ង់ បានចេញលិខិតប្រកាសមួយ ដោយបានលើកឡើងថា អ៊ីរ៉ង់ចង់ឃើញស្ថាប័នអន្តរជាតិមួយនេះ រក្សាអព្យាក្រិត្យភាពរបស់ខ្លួន ដោយមិនត្រូវយកបញ្ហានយោបាយការបរទេស មកលាយឡំ និងបញ្ហាបច្ចេកទេសថាមពលនុយក្លេអ៊ែរឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ