អ៊ីស្រាអែល និងលីបង់ព្រមព្រៀងចរចាគ្នាផ្ទាល់ស្តីពីជម្លោះព្រំដែនសមុទ្រក្រោមអន្តរការីអាមេរិក
នៅថ្ងៃព្រហស្បតិ៍ ទី១ តុលា សហរដ្ឋអាមេរិកបានប្រកាសសាទរលើកិច្ចព្រមព្រៀងជាប្រវត្តិសាស្រ្តដែលប្រទេសអ៊ីស្រាអែល និងប្រទេសលីបង់បានប្រកាសពីការព្រមចរចាគ្នាដោយផ្ទាល់ស្តីពីជម្លោះព្រំដែនសមុទ្រ។ ប្រមុខការទូតអាមេរិកលោកម៉ៃ ប៉ុមប៉េអូបានថ្លែងថា ភាពត្រូវរ៉ូវគ្នារវាងអ៊ីស្រាអែល និងលីបង់លើសំណុំរឿងវិវាទមួយនេះជាលទ្ធផលនៃការប្រឹងប្រែងការទូតយ៉ាងមមាញឹករបស់រដ្ឋបាលអាមេរិក។ តែគេនៅមិនទាន់ដឹងពីថ្ងៃខែជួបចរចាពិតប្រាកដរវាងអ៊ីស្រាអែល និងលីបង់ក្រោមអន្តរការីរបស់អាមេរិកទេ។ អ្វីដែលគេអាចនិយាយបាន នេះជាលើកទី១ ក្នុងរយៈពេល ៣០ឆ្នាំដែលអ៊ីស្រាអែល និងលីបង់យល់ព្រមចរចាគ្នាដោយផ្ទាល់ក្នុងកម្រិតស៊ីវិលដើម្បីដោះស្រាយជម្លោះព្រំដែនសមុទ្រ។
ចុះផ្សាយនៅថ្ងៃ៖
ស្តាប់ - ០២:២៨
ការសាទររបស់សហរដ្ឋអាមេរិកបានធ្វើឡើងតាមរយៈសេចក្តីប្រកាសព័ត៌មានមួយរបស់ប្រមុខការទូតលោកម៉ៃ ប៉ុមប៉េអូ។ ក្រៅពីចាត់ទុកការព្រមព្រៀងរវាងអ៊ីស្រាអែល និងលីបង់ពេលនេះជាលទ្ធផលនៃការប្រឹងប្រែងផ្លូវទូតយ៉ាងសកម្មរបស់អាមេរិកជិត ៣ឆ្នាំ លោកប៉ុមប៉េអូក៏បានលើកឡើងថា ភាពត្រូវរ៉ូវគ្នារវាងអ៊ីស្រាអែល និងលីបង់ជាជំហានដ៏សំខាន់ដែលបម្រើឲ្យផលប្រយោជន៍លីបង់ អ៊ីស្រាអែល សហរដ្ឋអាមេរិក និងផលប្រយោជន៍តំបន់។ ម្យ៉ាងទៀត និងបើតាមលោកប៉ុមប៉េអូ ការចរចារវាងអ៊ីស្រាអែល និងលីបង់ស្តីពីជម្លោះព្រំដែនសមុទ្រក៏នឹងអនុញ្ញាតឲ្យប្រទេសទាំងពីរផ្តើមជជែកគ្នាដើម្បីឈានទៅសម្រេចបាននូវស្ថិរភាព សន្តិសុខ និងភាពសំបូររុងរឿងបន្ថែមទៀតសម្រាប់ប្រជាជនលីបង់ក៏ដូចជាប្រជាជនអ៊ីស្រាអែល។
ប្រមុខការទូតអាមេរិកមិនបានបញ្ជាក់ពីថ្ងៃខែនៃការផ្តើមកិច្ចចរចាទេ តែអ៊ីស្រាអែលបានបញ្ជាក់ថា ការចរចានឹងចាប់ផ្តើមនៅក្រោយថ្ងៃបុណ្យជនជាតិជ្វីហ្វដែលនឹងបិទបញ្ចប់នៅថ្ងៃទី១០ តុលា។ ចំណែកទីកន្លែងចរចានឹងធ្វើឡើងនៅទីស្នាក់ការនៃកម្លាំងរក្សាសន្តិភាពរបស់អង្គការសហប្រជាជាតិប្រចាំលីបង់។ ពីខាងលីបង់វិញ ប្រធានរដ្ឋសភាលោកណាប៊ី បេរីបានបញ្ជាក់ដូចគ្នានេះ និងថា ការចរចាដែលនឹងរៀបចំដោយអង្គការសហប្រជាជាតិ និងមានអាមេរិកធ្វើជាអន្តរការីជាសំណើរបស់ភាគីអ៊ីស្រាអែល និងលីបង់។ ក្នុងរយៈពេល ២ឆ្នាំចុងក្រោយនេះ អ៊ីស្រាអែល និងលីបង់បានទាក់ទងគ្នាដោយប្រយោលតាមរយៈភាគីអាមេរិកស្តីពីជម្លោះព្រំដែនសមុទ្រ។
ក្នុងឆ្នាំ ២០១៨ លីបង់បានចុះហត្ថលេខាទី១ លើកុងត្រាខួងយកប្រេង និងឧស្ម័ននៅដែនទឹករបស់ខ្លួន។ តែមានប្លុកខ្លះមានជាប់ជម្លោះជាមួយអ៊ីស្រាអែល។ បន្ទាប់មកក្នុងឆ្នាំ ២០១៩ រដ្ឋាភិបាលអ៊ីស្រាអែលបានថ្លែងពីការបើកភ្លើងខៀវឲ្យផ្តើមចរចាជាមួយលីបង់ដោយមានអាមេរិកធ្វើជាអាជ្ញាកណ្តាល។ ក្រៅពីជម្លោះព្រំដែនសមុទ្រ អ៊ីស្រាអែល និងលីបង់ក៏កំពុងមានបញ្ហាព្រំដែនគោក ពិសេសពាក់ព័ន្ធនឹងខ្សែបន្ទាត់ព្រំដែនដែលគេហៅ « ខ្សែខៀវ »។ ក្នុងបញ្ហានេះត្រូវបានប្រមុខការទូតអាមេរិកលោកប៉ុមប៉េអូយល់ថា កិច្ចចរចាដាច់ដោយឡែកក្នុងកម្រិតអ្នកជំនាញជារឿងដែលមិនអាចមើលរំលងបានដើម្បីស្ថិរភាពតំបន់។ គួររម្លឹកថានៅក្នុងជម្លោះព្រំដែនទឹក និងព្រំដែនគោករវាងលីបង់ និងអ៊ីស្រាអែល អាមេរិកបានប្រឹងប្រែងជិត ១០ឆ្នាំដើម្បីបើកផ្លូវឲ្យមានកិច្ចចរចាដោយផ្ទាល់រវាងភាគីជម្លោះទាំងពីរ។
សូមបញ្ជាក់ថាជាលក្ខណៈបច្ចេកទេស និងក្រោយពីបានប្រឈមមុខដាក់គ្នាច្រើនដង អ៊ីស្រាអែល និងលីបង់កំពុងស្ថិតក្នុងស្ថានភាពសង្រ្គាម។ ក្រោយសង្រ្គាមឆ្នាំ ២០០៦ រវាងអ៊ីស្រាអែល និងពួកហេស្បូឡាលីបង់ មានកម្លាំងមួកខៀវប្រមាណជា ១០ ៥០០នាក់កំពុងឈរជើងលើទឹកដីលីបង់ដើម្បីឃ្លាំមើលតាមព្រំដែន និងការអនុវត្តន៍សេចក្តីសម្រេចចិត្តលេខ ១៧០១ របស់ក្រុមប្រឹក្សាសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ