អ៊ីរ៉ង់ រួចផុតពីទណ្ឌកម្មផ្នែកសព្វាវុធ ខណៈក្រុមប្រឹក្សាសន្តិសុខអ.ស.ប.ខ្វែងគំនិតគ្នា
ថ្ងៃអាទិត្យ ទី១៨តុលា ទណ្ឌកម្មផ្នែកសព្វាវុធចំពោះ អ៊ីរ៉ង់ ត្រូវដល់ពេលផុតកំណត់។ ក្នុងខែសីហា និងពេលថ្មីៗនេះទៀត សហរដ្ឋអាមេរិក ដែលជាគូសត្រូវនឹង អ៊ីរ៉ង់ បានទាមទារឱ្យក្រុមប្រឹក្សាសន្តិសុខអង្គការសហប្រជាជាតិ ពន្យារពេលចំពោះទណ្ឌកម្មលើ អ៊ីរ៉ង់ ក៏ប៉ុន្តែសមាជិកដទៃផ្សេងទៀត ជំទាស់ គឺមានដូចជា ចិន និងរុស្ស៊ី ជាដើម។ ចិន និង រុស្ស៊ី មិនដែលរារែកឡើយ ក្នុងការរកស៊ីខាងសព្វាវុធ និងសហការផ្នែកយោធាជាមួយ អ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:១២
ក្នុងសេចក្តីថ្លែងការណ៍មួយ រដ្ឋាភិបាលអ៊ីរ៉ង់ ប្រកាសថា បម្រាបហាមឃាត់មិនឱ្យលក់អាវុធធន់ធ្ងន់ និងសម្ភារៈសឹកសង្គ្រាម មកឱ្យ អ៊ីរ៉ង់ គឺផុតកំណត់ហើយ នៅថ្ងៃនេះ។ ដូច្នេះ អ៊ីរ៉ង់ អាចទិញអាវុធពីអន្តរជាតិ បានដោយគ្មានបញ្ហា។ ក្រសួងការបរទេសអ៊ីរ៉ង់ ក៏បញ្ជាក់ដូចគ្នាអ៊ីចឹងដែរ ថា ចាប់ពីថ្ងៃនេះទៅ បម្រាមពាក់ព័ន្ធនឹងការផ្ទេរលុយកាក់ និង ផ្ទេរអាវុធ រវាងប្រទេសអ៊ីរ៉ង់ ត្រូវលើកលែងហើយ។ ចំពោះថ្នាក់ដឹកនាំ អ៊ីរ៉ង់ ការផុតកំណត់ទណ្ឌកម្មសព្វាវុធ ហើយនិង ការមិនអាចពន្យារយៈពេលនៃទណ្ឌកម្មនេះ គឺជាជោគជ័យមួយរបស់ខ្លួន។
សម្រាប់ សហរដ្ឋអាមេរិក និង អ៊ីស្រាអែល ដែលជាគូសត្រូវ គឺតែងតែប្រឆាំងដាច់ខាត ហើយតែងតែទាមទារឱ្យបន្តដាក់ទណ្ឌកម្មចំពោះអ៊ីរ៉ង់។ ផ្ទុយទៅវិញ រដ្ឋបាលក្រុងម៉ូស្កូ បានបង្ហើបតាំងតែពីខែកញ្ញាមកម្ល៉េះ ថានឹងជំរុញកិច្ចសហការផ្នែកយោធាជាមួយ រដ្ឋបាលក្រុងតេអេរ៉ង់ នៅពេលដែល អ៊ីរ៉ង់ រួចផុតពីទណ្ឌកម្ម ចាប់ពីថ្ងៃ១៨តុលា។ ក្រុងប៉េកាំង វិញ ក៏ដូច្នេះដែរ មិនបានលាក់លៀម ឆន្ទៈចង់រកស៊ីលក់ដូរអាវុធ ជាមួយនឹង អ៊ីរ៉ង់ ឡើយ។
ប្រទេសមហាអំណាចនៅអឺរ៉ុប បារាំង អង់គ្លេស អាល្លឺម៉ង់ គឺហាក់មិនបង្ហាញជំហរដាច់ណាត់យ៉ាងណាទេ។ ប៉ុន្តែក្នុងសេចក្តីថ្លែងការណ៍រួមមួយ ចុះកាលពីខែកក្កដា ប្រទេសទាំងបីបានស្នើឱ្យគ្រប់ភាគី គោរពតាមសេចក្តីសម្រេច លេខ ២ ២៣១ របស់ក្រុមប្រឹក្សាសន្តិសុខអង្គការសហប្រជាជាតិ ទាក់ទិននឹងកិច្ចព្រមព្រៀងសំណុំរឿងនុយក្លេអ៊ែរអ៊ីរ៉ង់។ កិច្ចព្រមព្រៀងនេះ ត្រូវសហរដ្ឋអាមេរិក របស់ប្រធានាធិបតី ដូណាល់ ត្រាំ ប្រកាសដកខ្លួនចេញ ជាឯកតោភាគី នៅឆ្នាំ២០១៨ ពីព្រោះ អាមេរិក យល់ថា អ៊ីរ៉ង់ រំលោភបំពានកាពត្វកិច្ច និងសម្ងំផលិតអាវុធនុយក្លេអ៊ែរ។ អាមេរិក ក៏បានជំរុញឱ្យសមាជិកផ្សេងទៀត ដាក់បន្ថែមទណ្ឌកម្មលើ អ៊ីរ៉ង់ ដែរ ប៉ុន្តែ មានបញ្ហាខ្វែងគំនិតគ្នា រហូតមកទល់នឹងពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ