លីបង់នៅតែមិនអាចជៀសផុតរួចពីការដឹកនាំរបស់នាយករដ្ឋមន្រ្តី Saad Al Hariri
មួយឆ្នាំក្រោយសុំលាលែងចេញពីតំណែងនាយករដ្ឋមន្រ្តីលីបង់ ដោយសារបាតុកម្មប្រឆាំងរបស់មហាជនលីបង់ លោក Saad Al Hariri បានត្រលប់មកធ្វើជានាយករដ្ឋមន្រ្តីលីបង់សាជាថ្មី។ នៅថ្ងៃ ព្រហស្បតិ៍ ម្សិលមិញ លោកSaad Al Hariri ត្រូវបានលោកប្រធានាធិបតី មីស្ហែល អាអ៊ូនMichel Aoun ជ្រើសតាំងឲ្យបង្កើតរដ្ឋាភិបាលថ្មី សម្រាប់លីបង់ ដែលគ្មានរដ្ឋាភិបាល ដឹកនាំច្បាស់លាស់ នៅក្រោយហេតុការណ៍ផ្ទុះនៅកំពង់ផែ ដែលបានសម្លាប់ មនុស្សជាង ២០០នាក់។
ចុះផ្សាយនៅថ្ងៃ៖
ស្តាប់ - ០២:៤៣
ស្ថិតក្រោមសម្ពាធរបស់សហគមន៍អន្តរជាតិ ដែលទាមទារឲ្យលីបង់បង្កើតរដ្ឋាភិបាលថ្មី ជាថ្នូរនឹងប្រាក់ជំនួយ រាប់ពាន់លានដុល្លារ ប្រធានាធិបតីលីបង់ លោកមីស្ហែល អាអ៊ូន កាលពីថ្ងៃព្រហស្បតិ៍ត្រូវប្រញាប់ ជ្រើសរើសលោកសាអាដ អាល់ ហារីរី ឲ្យធ្វើជានាយករដ្ឋមន្រ្តី លីបង់ នៅបន្ទាប់ពីនាយករដ្ឋមន្រ្តី មុន គឺ លោកមូស្តាហ្វា អាឌីប បរាជ័យមិនអាចបង្កើតរដ្ឋាភិបាលរួបរួម ជាតិ កាលពីខែចុងខែកញ្ញា កន្លងទៅ។
ដោយជ្រើសរើស លោកសាអាដ អាល់ ហារីរី ឲ្យរៀបចំបង្កើតរដ្ឋាភិបាលថ្មី ប្រធានាធិបតី លីបង់ ជៀសមិនរួច ពីត្រូវហៅកូនប្រុសរបស់មេដឹកនាំដ៏ល្បីឈ្មោះ របស់លីបង់ Rafic Hariri។ សាអាដ អាល់ ហារីរី ធ្លាប់កាន់តំណែងនាយករដ្ឋមន្រ្តី លីបង់ ពីរអាណត្តិ រហូតដល់ឆ្នាំ ២០១៩។ ដោយជ្រើសរើសលោកសាអាដ ហារីរី ឲ្យមកបង្កើតរដ្ឋាភិបាលថ្មី ថ្នាក់ដឹកនាំ នយោបាយរបស់លីបង់ កំពុងសើចចំអកដាក់ប្រជាជនលីបង់ ព្រោះថា គិតត្រឹមខែតុលា គឺមានរយៈពេល ១ឆ្នាំ គត់ ដែល លោកសាអាដ ហារីរី បានចុះចេញពីតំណែង ដោយសារមហាបាតុកម្មប្រឆាំង ដ៏ធំរបស់ប្រជាជនលីបង់។
នៅលីបង់ជាទីដែលប្រជាជនពាក់កណ្តាលមានជីវភាពក្រីក្រ គ្មានទឹកភ្លើង ប្រើប្រាស់គ្រប់គ្រាន់ ប្រជាជនលីបង់បានធ្វើបាតុកម្ម ដើម្បីទាមទារឲ្យមានការផ្លាស់ប្តូរសមាសភាពអ្នកនយោបាយលីបង់ ដែលគេឃើញនៅតែដដែលៗ ពុករលួយ និង អសមត្ថភាព។ លីបង់ដែលរួបរឹតដោយវិបត្តិនយោបាយ និងសេដ្ឋកិច្ច អស់ជាច្រើនឆ្នាំបានធ្លាក់ខ្លួន ដុនដាប មួយជាន់ទៀត ដោយសារហេតុការណ៍ផ្ទុះនៅកំពង់ផែដែលបានសម្លាប់មនុស្សជាង២០០នាក់ និងបានបំផ្លាញសំណង់អគារ ទីក្រុង ការងារ គិតជាប្រាក់ ជាង ១៥ពាន់លានដុល្លារ។
នៅថ្ងៃព្រហស្បតិ៍ នៅក្រោយ ប្រកាសតែងតាំង របស់ប្រធានាធិបតី លោកនាយករដ្ឋមន្រ្តី ហារីរី បានសន្យាបង្កើតរដ្ឋាភិបាលថ្មីមួយប្លែក ដែលគ្មានការចូលរួមរបស់អ្នកនយោបាយ ប៉ុន្តែ ដែលសំបូរដោយ ក្រុមអ្នកជំនាញ ទៅតាមមតិយោបលរបស់រដ្ឋាភិបាលបារាំង ដែលទាមទារចង់បានរដ្ឋាភិបាល ឯករាជ្យមួយនៅ លីបង់។ ផ្ទុយពីបេក្ខជននាយករដ្ឋមន្រ្តីលីបង់ ពីររូប មុន លោកហារីរី អ្នកនយោបាយជើងចាស់ ដែលមានខ្សែបណ្តាញ និងគាំទ្រពី គណបក្សភាគច្រើន នៅលីបង់ សង្ឃឹមអាចបានសំឡេង គាំទ្រពីគ្រប់និន្នាការនយោបាយ ដោយរួមមានទាំងក្រុមអេស្បូឡា លីបង់ ដែលមានដើរតួនាទីសំខាន់នៅលីបង់។
លោកអាល់ ហារីរី អាចមានសង្ឃឹមបង្កើតរដ្ឋាភិបាលថ្មី ដោយគ្មានឧបសគ្គច្រើន។ រដ្ឋាភិបាលថ្មីរបស់លីបង់ ដឹកនាំ ដោយអ្នកនយោបាយចាស់ មុខដដែល បានសន្យាធ្វើកំណែទម្រង់ លុបបំបាត់អំពើពុករលួយដើម្បី បានជំនួយអន្តរជាតិ រាប់ពាន់លានដុល្លារ។ ប៉ុន្តែ ចំណោទនៅត្រង់ថា តើប្រជាជនលីបង់ ដែលធ្វើបាតុកម្ម ប្រឆាំង ដាច់ខាត ចង់ឲ្យមានការផ្លាស់ប្តូរសមាសភាពនយោបាយ នៅលីបង់ យល់ព្រម ទទួលយកនាយករដ្ឋមន្រ្តី ដែលពួកគេបានធ្វើបាតុកម្ម បណ្តេញចេញពីតំណែង កាលពីឆ្នាំមុនដែរឬក៏យ៉ាងណា?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ