អ៊ីស្រាអែលជំរុញផែនការសំណង់អាណានិគមកិច្ច នៅមុនពេល លោកដូណាល់ ត្រាំ អស់អាណតិ្ត
នៅចំពោះមុខនៃការផ្លាស់ប្តូរប្រធានាធិបតីអាមេរិក រដ្ឋាភិបាលអ៊ីស្រាអែល បានឆ្លៀតយកពេលវេលាចុងក្រោយ នៃវត្តមានរបស់លោកដូណាល់ ត្រាំ នៅសេតវិមាន ដើម្បី ជំរុញការសាងសង់សំណង់អាណានិគម្មជ្វីហ្វ នៅលើទឹកដី ប៉ាឡេស្ទីន ដែលអ៊ីស្រាអែលបានចូលកាន់កាប់ដោយខុសច្បាប់អន្តរជាតិ។ នៅក្នុងសេចក្តីថ្លែងការណ៍ កាលពីថ្ងៃអាទិត្យ អង្គការសង្គមស៊ីវិល ប្រឆាំងសំណង់អាណានិគមកិច្ចអ៊ីស្រាអែល នៅលើទឹកដីប៉ាឡេស្ទីន ឈ្មោះ Ir Amim បានលើកឡើងពីគម្រោងសាងសង់សង្កាត់ជ្វីហ្វ ថ្មីមួយទៀត នៅទឹកដីភាគខាងកើតយេរូសាឡឹម ដែលប្រជាជនប៉ាឡេស្ទីន ទាមទារជារដ្ឋធានីរបស់ខ្លួន ទៅថ្ងៃអនាគត។
ចុះផ្សាយនៅថ្ងៃ៖ កែប្រែថ្ងៃទី៖
តាមការសង្កេតរបស់អង្គការសង្គមស៊ីវិលប្រឆាំងសំណង់អាណានិគមកិច្ចអ៊ីស្រាអែល រដ្ឋាភិបាលអ៊ីស្រាអែល បានបង្កើនល្បឿន គម្រោងការសាងសង់ សំណង់អាណានិគមកិច្ចជ្វីហ្វ ក្នុងទឹកដីប៉ាឡេស្ទីន នៅ មុនការផ្លាស់ប្តូរ រដ្ឋបាលអាមេរិក។
លោកដូណាល់ ត្រាំ បានដើរផ្ទុយពីជំហរ របស់អង្គការសហប្រជាជាតិ ក៏ដូចជាខ្សែបន្ទាត់នយោបាយការទូតរបស់អាមេរិកកន្លងមក ដោយធ្លាប់បានប្រកាសថា អាណានិគមកិច្ចអ៊ីស្រាអែល នៅទឹកដីប៉ាឡេស្ទីន ដែលរួមទាំងស៊ីហ្សកដានី និងយេរូសាឡឹមខាងកើត មិនខុសនឹងច្បាប់អន្តរជាតិ នោះទេ។ ប៉ុន្តែ លោកដូណាល់ ត្រាំ ដែលមានសំឡេងឆ្នោត តិចជាងលោកចូ បៃដិន ទំនងនឹងចាកចេញ ពីសេតវិមាន នៅ២ខែខាងមុខ។
ផ្ទុយពីលោកដូណាល់ ត្រាំ លោកចូ បៃដិនប្រធានាធិបតី ឈ្នះឆ្នោត ធ្លាប់បានប្រកាសថា រដ្ឋបាលរបស់លោក នឹងស្តារឡើងវិញ គោលជំហររបស់អាមេរិក ដែលតែងតែប្រឆាំងរាល់សំណង់អាណានិគមកិច្ចខុសច្បាប់អន្តរជាតិ និងរាល់សំណង់ដែលជាឧបសគ្គដល់ការចរចាបង្កើតសន្តិភាព អ៊ីស្រាអែល ប៉ាឡេស្ទីន។
ដោយប្រមើលមើលឃើញជំហរប្រឆាំងជាស្រេច របស់អនាគតប្រធានាធិបតីថ្មី រដ្ឋាភិបាលអ៊ីស្រាអែល បានបង្កើនល្បឿន នយោបាយសាងសង់សំណង់អាណានិគមកិច្ចរបស់ខ្លួន នៅទឹកដីប៉ាឡេស្ទីន ដែលខ្លួនបានចូលកាន់កាប់ដោយខុសច្បាប់អន្តរជាតិ។
តាមអង្គការសង្គមស៊ីវិល Ir Amim នៅសប្តាហ៍មុននេះ អាជ្ញាធរដីធ្លី អ៊ីស្រាអែល បានប្រកាសដាក់ដេញថ្លៃ គម្រោងសាងសង់លំនៅឋាន ប្រមាណ ១២០០នៅសង្កាត់ Givat Hamatos។ អង្គការសង្គមស៊ីវិលសំដែងការបារម្ភពីសំណង់អាណានិគមកិច្ចថ្មី នៅភាគខាងកើតយេរូសាឡឹម ព្រោះថា វាមិនត្រឹមតែទៅបំផ្លាញ ការចរចាសន្តិភាព អ៊ីស្រាអែល ប៉ាឡេស្ទីនតែប៉ុណ្ណោះទេ ប៉ុន្តែ សំណង់អាណានិគមកិច្ចអ៊ីស្រាអែល នឹងទៅពុះ កាត់ផ្តាច់ ទឹកដីប៉ាឡេស្ទីន ជាពីរ ពោល គឺកាត់ផា្តច់មិនBethléem អាចតភ្ជាប់ទៅ យេរូសាឡឹមខាងកើត ដែលជាអនាគតរដ្ឋធានី របស់ប្រជាជនប៉ាឡេស្ទីន។
ការប្រកាសដាក់ឲ្យដេញថ្លៃ សំណង់លំនៅឋានជនជាតិជ្វីហ្វ នៅGivat Hamatos ធ្វើឡើងនៅតែមួយសប្តាហ៍ក្រោយ ដែលអ៊ីស្រាអែល បានសម្រេចឲ្យគេសាងសង់ផ្ទះសម្បែង ៩៤ខ្នងថ្មី នៅសង្កាត់អាណានិគមកិច្ច នៅ Ramat Shlomo នៅយេរូសាឡឹមខាងកើត។ សូមបញ្ជាក់ថា គឺការផ្តល់សិទ្ធិសាងសង់ផ្ទះសម្បែង នៅសង្កាត់អាណានិគមកិច្ចនៅ Ramat Shlomoកាលពីឆ្នាំ ២០១០ ដែលធ្វើឲ្យរដ្ឋបាលលោកអូបាម៉ា ដែលមានលោកចូ បៃដិន ជាអនុប្រធានាធិបតី ផ្ទុះសង្រ្គាមពាក្យសំដី រិះគន់ ខ្លាំងៗ លោកនាយករដ្ឋមន្រ្តីអ៊ីស្រាអែល បិនចាមីន នេតាន់យ៉ាហ៊ូ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ