រដ្ឋមន្ត្រីការបរទេសអ៊ីស្រាអែលទៅហ្សកដានី ដើម្បីជំរុញការចរចាសន្តិភាព ជាមួយប៉ាឡេស្ទីន
កាលពីថ្ងៃព្រហស្បតិ៍ទី៣ធ្នូ រដ្ឋមន្ត្រីការបរទេសហ្សកដានី និងអ៊ីស្រាអែល បានជួបគ្នា នៅទីក្រុងអាំម៉ាន់ ដើម្បីរៀបចំជំរុញ ឲ្យមានការចរចាសន្តិភាព រវាងអ៊ីស្រាអែល និងប៉ាឡេស្ទីន។ នេះគឺជាជំនួបមួយដ៏កម្រ ជាងនេះទៀត វាបានធ្វើឡើង ប៉ុន្មានថ្ងៃ ក្រោយពេលដែលលោក ម៉ាមូដ អាបាស ប្រមុខដឹកនាំប៉ាឡេស្ទីន បានធ្វើដំណើរទៅហ្សកដាដនីដែរ។
ចុះផ្សាយនៅថ្ងៃ៖ កែប្រែថ្ងៃទី៖
ហ្សកដានី កំពុងតែព្យាយាម ដើរតួនាទី ជាស្ពានឆ្លង ដើម្បីឲ្យអ៊ីស្រាអែល និងប៉ាឡេស្ទីន អាចចាប់ផ្តើម រកច្រកចរចាសន្តិភាព។ កាលពីដើមសប្តាហ៍នេះ លោក ម៉ាមូដ អាបាស ប្រមុខដឹកនាំចលនារំដោះប៉ាឡេស្ទីន បានធ្វើដំណើរទៅហ្សកដានី ដើម្បីស្វែងរកការគាំទ្រ ឲ្យមានការទទួលស្គាល់ ការបង្កើតរដ្ឋប៉ាឡេស្ទីនពេញសិទ្ធិ។
បន្ទាប់មកទៀត នៅថ្ងៃទី ៣ធ្នូ លោក Gabi Ashkenazi រដ្ឋមន្ត្រីការបរទេសអ៊ីស្រាអែល ក៏បានទៅជួបលោក Aymane Safadi រដ្ឋមន្ត្រីការបរទេសហ្សកដានី ដែលតាមការស្មាន គឺដើម្បីពិគ្រោះគ្នា រកវិធីបើកផ្លូវ ឲ្យមានការចរចាជាមួយប៉ាឡេស្ទីន។
យោងតាមការចុះផ្សាយ របស់បណ្តាញព័ត៌មាន PETRA រដ្ឋមន្ត្រីការបរទេសហ្សកដានី បានលើកឡើងថា គ្មានមធ្យោបាយណាផ្សេង ក្រៅពីការទទួលស្គាល់រដ្ឋប៉ាឡេស្ទីន ជារដ្ឋឯករាជ្យ ពេញសិទ្ធិនោះទេ។ វាគឺជាដំណោះស្រាយតែមួយគត់ ដើម្បីទទួលបានសន្តិភាព។
ដោយឡែកថ្មីៗនេះ រដ្ឋាភិបាលអ៊ីស្រាអែល បានព្យួរផែនការ ធ្វើអាណានិគមលើដែនដីប៉ាឡេស្ទីន បន្ទាប់ពីបានចុះកិច្ចព្រមព្រៀង ចំណងមិត្តភាព ជាមួយប្រទេសអេមៀរ៉ាត់អារ៉ាប់រួម កាលពីខែសីហា។
គួររំលឹកថា ការចរចាសន្តិភាព រវាងអ៊ីស្រាអែល និងប៉ាឡេស្ទីន បានស្ថិតនៅជាប់គាំង តាំងតែពីឆ្នាំ២០១៤ម្លេះ។ កាលពីខែមករា ដើមឆ្នាំនេះ រដ្ឋាភិបាលលោកដូណាល់ ត្រាំ បានស្នើផែនការសន្តិភាពមួយ ដែលអ៊ីស្រាអែលពេញចិត្ត តែប៉ាឡេស្ទីនបានបដិសេធ។ ជាផែនការ ដែលបានទទួលស្គាល់ថា ទីក្រុងហ្សេរុយសាឡឹមទាំងស្រុង គឺជាទីក្រុងផ្តាច់មុខរបស់អ៊ីស្រាអែល ដោយមិនអាចពុះចែកបាន។ ចំណុចនេះ ភាគីប៉ាឡេស្ទីន តែងតែប្រកែកជានិច្ច ដោយខ្លួនទាមទារយក ទីក្រុងហ្សេរុយសាឡឹមភាគខាងកើត ដើម្បីធ្វើជារដ្ឋធានី នៃអនាគតប្រទេសរបស់ខ្លួន។
ក្រុមនយោបាយប៉ាឡេស្ទីន បានផ្តាច់ទំនាក់ទំនងទាំងស្រុង ជាមួយរដ្ឋាភិបាលលោកដូណាល់ ត្រាំ ដែលធ្វើឲ្យការចរចានៅជាប់គាំងមិនទៅមុខ។ តែយ៉ាងណា គេសង្ឃឹមថា ជាមួយនឹងរដ្ឋាភិបាលថ្មីរបស់លោកចូ បៃដិន ភាគីប៉ាឡេស្ទីន ប្រហែលជាអាចងាកមករកការចរចាវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ