ប្រទេសហត្ថលេខីកិច្ចព្រមព្រៀងនុយក្លេអ៊ែរអ៊ីរ៉ង់ ពេញចិត្តនឹងទទួលសហរដ្ឋអាមេរិក បើចង់ត្រលប់ចូលវិញ
រដ្ឋមន្ត្រីកាបរទេស នៃប្រទេសហត្ថលេខីកិច្ចព្រមព្រៀងនុយក្លេអែរអ៊ីរ៉ង់ បានបើកការប្រជុំពីចំងាយ កាលពីថ្ងៃចន្ទ ទី២១ធ្នូម្សិលមិញ ដើម្បីបន្តពិគ្រោះគ្នា ស្វែងរកលទ្ធភាពរក្សាការពារកិច្ចព្រមព្រៀងនេះ។ ក្រុមប្រទេសអឺរ៉ុប រុស្ស៊ី និងចិន បានសំដែងសុទិដ្ឋិនិយម ចង់ឃើញរដ្ឋាភិបាលថ្មីរបស់សហរដ្ឋអាេមរិក សម្រេចចិត្តវិលត្រលប់ ចូលមកក្នុងកិច្ចព្រមព្រៀងនេះវិញ។ ក្រុមប្រទេសហត្ថលេខី ក៏បានអំពាវនាវផងដែរ ឲ្យអ៊ីរ៉ង់ត្រូវប្រឹងប្រែងអត់ធ្មត់ កុំធ្វើបំពានកិច្ចសន្យាខ្លួនឲ្យសោះ។
ចុះផ្សាយនៅថ្ងៃ៖
ស្តាប់ - ០២:២៣
លោកចូ បៃដិន ដែលនឹងចូលកាន់តំណែង ចាប់ពីថ្ងៃទី ២០មករាទៅ ធ្លាប់បានអះអាងថា លោកនឹងនាំសហរដ្ឋអាមេរិក ឲ្យត្រលប់មកក្នុងកិច្ចព្រមព្រៀងនុយក្លេអ៊ែរអ៊ីរ៉ង់វិញ។ នៅក្នុងកិច្ចប្រជុំពីចំងាយ កាលពីថ្ងៃចន្ទទី ២១ធ្នូ រដ្ឋមន្ត្រីការបរទេស នៃក្រុមប្រទេសហត្ថលេខី មានបារាំង អង់គ្លេស អាល្លឺម៉ង់ រុស្ស៊ី និងចិន បានសំដែងសមានចិត្តត្រេកអរ និងបានលើកឡើងថាគេត្រៀមឆ្លើយតប ទទួលយល់ព្រមដោយរីករាយ ប្រសិនបើរដ្ឋាភិបាលថ្មីរបស់អាមេរិក ចង់ត្រលប់មកចូលរួម ក្នុងកិច្ចព្រមព្រៀងនុយក្លេអ៊ែរអ៊ីរ៉ង់វិញ។
ទន្ទឹមនឹងនេះដែរ ក្រុមប្រទេសហត្ថលេខី បានអំពាវនាវ សុំឲ្យអ៊ីរ៉ង់ ត្រូវបន្តប្រឹងប្រែងអត់ធ្មត់ កុំធ្វើអ្វីបំពាន ឬជ្រុលជ្រួល ឃ្លាតឆ្ងាយកាន់តែខ្លាំងអំពីកាតព្វកិច្ចរបស់ខ្លួន ដែលមានចែងក្នុងកិច្ចព្រមព្រៀង ដែលបានចុះហត្ថលេខានៅខែកក្កដា ឆ្នាំ២០១៥។
សូមរំលឹកថា កិច្ចព្រមព្រៀងនុយក្លេអ៊ែរអ៊ីរ៉ង់ ត្រូវបានជួបភាពរង្គោះរង្គើរ ស្ទើរតែគ្មានប្រសិទ្ធិភាព បន្ទាប់ពីលោកដូណាល់ ត្រាំ ចូលកាន់តំណែងនៅឆ្នាំ២០១៦ ហើយបានសម្រេចចិត្តដកខ្លួនចេញ។ រដ្ឋាភិបាលលោកដូណាល់ ត្រាំ បានសម្រេចជាឯកតោភាគី ដាក់ទណ្ឌកម្មសេដ្ឋកិច្ចលើអ៊ីរ៉ង់ និងបិទផ្លូវ មិនឲ្យប្រទេសផ្សេងទៀត មានទំនាក់ទំនងសេដ្ឋកិច្ច ពាណិជ្ជកម្មជាមួយអ៊ីរ៉ង់។
បើទោះបីប្រទេសហត្ថលេខីផ្សេងទៀត បានធានាថានឹងបន្តគោរពកិច្ចព្រមព្រៀង ទោះគ្មានសហរដ្ឋអាមេរិកក្តី តែអ៊ីរ៉ង់ហាក់បានអស់សង្ឃឹម និងឈប់គោរពបន្តិចម្តងៗ នូវកាតព្វកិច្ចរបស់ខ្លួន។
កាលពីចុងខែវិច្ឆិកា ភាពតានតឹង កាន់តែមានខ្លាំងឡើង បន្ទាប់ពីមានអំពើឃាតកម្មសម្លាប់ លោក Mohsen Fakhrizadeh ដែលជាមន្ត្រីទទួលបន្ទុកកម្មវិធីនុយក្លេអ៊ែរអ៊ីរ៉ង់ ដ៏សំខាន់ម្នាក់។ អ៊ីរ៉ង់ បានចោទ ថាអ៊ីស្រាអែល និងសហរដ្ឋអាមេរិក បានឃុបឃិតគ្នា ធ្វើអំពើនេះ។ ក្រោយហេតុការណ៍នេះ នៅដើមខែធ្នូ អ៊ីរ៉ង់បានសម្រេចបើកម៉ាស៊ីនចំរាញ់ធាតុអ៊ុយរ៉ានីញ៉ូម ចំនួន៣ នៅស្ថានីយ៍ Natanz ភាគកណ្តាលប្រទេស។
ទោះជាយ៉ាងនេះក្តី កាលពីថ្ងៃព្រហស្បតិ៍សប្តាហ៍កន្លងទៅ លោក ហាសាន់ រូហានី ប្រធានាធិបតីអ៊ីរ៉ង់ បានថ្លែងថា លោកមានសុទិដ្ឋិនិយម ជឿថា លោកចូ បៃដិន និងនាំសហរដ្ឋអាមេរិក ឲ្យមកគោរពកិច្ចព្រមព្រៀងអន្តរជាតិ ដែលលោកដូណាល់ ត្រាំ ធ្លាប់បានបំផ្លាញចោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ