អ៊ីរ៉ង់បិទបញ្ចប់សមយុទ្ធបាញ់គ្រាប់មីស៊ីលបាលីស្ទិកជំនាន់ថ្មីលើផ្ទាំងស៊ីបនៅមហាសមុទ្រឥណ្ឌា
នៅថ្ងៃសៅរ៍ ទី១៦ មករា កងឆ្មាំបដិវត្តន៍អ៊ីរ៉ង់បានបិទបញ្ចប់សមយុទ្ធដែលបានចាប់ផ្តើមក្នុងថ្ងៃសុក្រ ទី១៥ មករា។ សមយុទ្ធបាញ់មីស៊ីលបាលីស្ទិកជំនាន់ថ្មីនេះបានធ្វើឡើងនៅប៉ែកកណ្តាលប្រទេសដោយជ្រើសយកផ្ទាំងស៊ីបរបស់សត្រូវនៅក្នុងមហាសមុទ្រឥណ្ឌាប៉ែកខាងជើង នេះជាព័ត៌មានចុះផ្សាយដោយគេហទំព័រ Sepanews។ គួររម្លឹកថានៅដើមខែមករា ឆ្នាំ ២០២១ ពោលក្រោយថ្ងៃរម្លឹកខួប ១ឆ្នាំនៃការសម្លាប់ឧត្តមសេនីយអ៊ីរ៉ង់លោកសូឡីម៉ានីដោយកងទ័ពអាមេរិកក្នុងប្រទេសអ៊ីរ៉ាក់ កងទ័ពអ៊ីរ៉ង់បានធ្វើសមយុទ្ធជាបន្តបន្ទាប់។
ចុះផ្សាយនៅថ្ងៃ៖
ស្តាប់ - ០២:០៥
« Great Prophet 15 » នេះជាឈ្មោះសមយុទ្ធបាញ់មីស៊ីលបាលីស្ទិកជំនាន់ថ្មីរៀបចំដោយកងឆ្មាំបដិវត្តន៍អ៊ីរ៉ង់។ នៅក្នុងសមយុទ្ធនោះ កងឆ្មាំបដិវត្តន៍អ៊ីរ៉ង់បានជ្រើសយកមហាសមុទ្រឥណ្ឌានៅប៉ែកខាងជើងជាផ្ទាំងស៊ីប ហើយបើតាមគេហទំព័រ Sepanews មីស៊ីលជំនាន់ថ្មីនេះអាចហោះទៅកម្ទេចនាវាចម្បាំងរបស់សត្រូវដែលស្ថិតចម្ងាយ ១ ៨០០គីឡូម៉ែត្រពីទីតាំងបាញ់មីស៊ីល។ គេហទំព័រ Sepanews បានស្រង់សម្តីមេបញ្ជាការកងទ័ពអ៊ីរ៉ង់ឧត្តមសេនីយម៉ូហាម៉ាដ បាហ្កឺរីដែលថា ការប្រើមីស៊ីលបាញ់ចម្ងាយឆ្ងាយនេះជាសក្ខីកម្មដែលបញ្ជាក់ថា បើសត្រូវមានបំណងអាក្រក់ប្រឆាំងនឹងផលប្រយោជន៍អ៊ីរ៉ង់តាមផ្លូវពាណិជ្ជកម្មសមុទ្រ ឬតាមផ្លូវគោក ពួកគេនឹងក្លាយជាផ្ទាំងស៊ីបដែលត្រូវកម្ទេច។
តែឧត្តមសេនីយបាហ្កឺរីបានបន្ថែមថា អ៊ីរ៉ង់គ្មានបំណងបើកការវាយប្រហារណាមួយទេ និងថា អ៊ីរ៉ង់បានត្រៀមខ្លួនរួចជាស្រេចដើម្បីការពារខ្លួនប្រឆាំងទល់នឹងគ្រប់ការវាយប្រហាររបស់សត្រូវ។ ការអះអាងស្រដៀងគ្នានេះក៏មានពីប្រមុខកងឆ្មាំបដិវត្តន៍ឧត្តមសេនីយហូសសេន សាឡាមីដោយបញ្ជាក់ថា គោលដៅមួយនៃគោលដៅសំខាន់ៗនៅក្នុងនយោបាយ និងយុទ្ធសាស្រ្តការពាររបស់អ៊ីរ៉ង់ គឺប្រើមីស៊ីលបាញ់ចម្ងាយឆ្ងាយដើម្បីកម្ទេចនាវា នាវាដឹកយន្តហោះ និងនាវាចម្បាំងរបស់សត្រូវនៅសមុទ្រ។ គួរបញ្ជាក់ថាក្នុងសប្តាហ៍នេះដែរ កងទ័ពជើងទឹកអ៊ីរ៉ង់បានធ្វើសមយុទ្ធនៅឈូងសមុទ្រអូម៉ង់រយៈពេល ២ថ្ងៃ ហើយកាលពីថ្ងៃទី៥ មករា មានការធ្វើសមយុទ្ធដោយប្រើដ្រូនរយៈពេល ២ថ្ងៃដូចគ្នា។
អ្វីជាការកត់សម្គាល់ សមយុទ្ធទាំង ៣ នេះត្រូវបានអ៊ីរ៉ង់ធ្វើឡើងនាឱកាសរម្លឹកខួបនៃការសម្លាប់មេបញ្ជាការអ៊ីរ៉ង់ឧត្តមសេនីយសូឡីម៉ានីដោយកងទ័ពអាមេរិកកាលពីថ្ងៃទី៣ មករា ឆ្នាំ ២០២០ នៅក្នុងប្រទេសអ៊ីរ៉ាក់។ មួយវិញទៀត សមយុទ្ធទាំង ៣ នេះក៏បានធ្វើឡើងនៅក្នុងបរិបទនៃកំណើនភាពតានតឹងរវាងក្រុងតេហេរ៉ង់ និងរដ្ឋបាលអាមេរិករបស់លោកត្រាំដែលនឹងអស់អាណត្តិនៅថ្ងៃទី២០ មករាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ