ក្រុមហ៊ុនប្រេងអារ៉ាប៊ីសាអូឌីតជួលបណ្តាញបំពង់បង្ហូរប្រេងរបស់ខ្លួនក្នុងតម្លៃ ១២ ៤០០លានដុល្លារ
នៅក្នុងប្រទេសអារ៉ាប៊ីសាអូឌីត ក្រុមហ៊ុន Aramco ដែលជាក្រុមហ៊ុននាំប្រេងឆៅទី១ ក្នុងលោកបានប្រកាសពីការចុះកិច្ចព្រមព្រៀងបង្កើតក្រុមហ៊ុនដៃគូមួយជាមួយក្រុមហ៊ុនអាមេរិកឈ្មោះ ElG Global Energy Partners។ នៅក្នុងកិច្ចព្រមព្រៀង ក្រុមហ៊ុនប្រេង Aramco ទទួលបានលុយជិត ១២ ៤០០លានដុល្លារពីការជួលបណ្តាញបំពង់បង្ហូរប្រេងរបស់ខ្លួនឲ្យក្រុមហ៊ុនដៃគូ។ ការវិនិយោគយុទ្ធសាស្រ្តមួយនេះបានធ្លាក់មកចំពេលដែលរាជាណាចក្រអារ៉ាប៊ីសាអូឌីតកំពុងត្រូវការទាក់ទាញក្រុមវិនិយោគិនបរទេសសម្រាប់ធ្វើការអភិវឌ្ឍន៍វិស័យសេដ្ឋកិច្ចចម្រុះរបស់ខ្លួន។
ចុះផ្សាយនៅថ្ងៃ៖
ស្តាប់ - ០២:១០
Aramco Oil Pipelines Company នេះជាឈ្មោះក្រុមហ៊ុនដៃគូបង្កើតឡើងដោយក្រុមហ៊ុនប្រេងអារ៉ាប៊ីសាអូឌីត Aramco និងក្រុមហ៊ុនថាមពលអាមេរិកឈ្មោះ ElG Global Energy Partners។ នៅក្នុងក្រុមហ៊ុនដៃគូនេះ ក្រុមហ៊ុន Aramco មានភាគហ៊ុនចំនួន ៥១% ហើយក្រុមហ៊ុន ElG Global Energy Partners មានភាគហ៊ុនចំនួន ៤៩%។ តាមកិច្ចព្រមព្រៀង ក្រុមហ៊ុន Aramco ដែលបន្តស្ថិតជាកម្មសិទ្ធិលើបណ្តាញបំពុងបង្ហូរប្រេងរបស់ខ្លួន និងបន្តជាអ្នកត្រួតពិនិត្យបានជួលបណ្តាញបំពង់បង្ហូរប្រេងឲ្យក្រុមហ៊ុនដៃគូ Aramco Oil Pipelines Company ក្នុងទឹកប្រាក់ជិត ១២ ៤០០លានដុល្លារសម្រាប់រយៈពេល ២៥ឆ្នាំ។
គេមិនដឹងថា តើមានក្រុមហ៊ុនផ្សេងបានចូលរួមជាមួយក្រុមហ៊ុនដៃគូដែលបង្កើតឡើងដោយក្រុមហ៊ុនប្រេងអារ៉ាប៊ីសាអូឌីត និងក្រុមហ៊ុនថាមពលអាមេរិកនេះឬអត់ទេ។ នៅក្នុងរយៈពេលជួលនេះ ក្រុមហ៊ុន Aramco ក៏អាចបន្តប្រើប្រាស់បណ្តាញបំពង់បង្ហូរប្រេងរបស់ខ្លួនដើម្បីបញ្ជូនប្រេងឆៅបានដែរ តែត្រូវបង់ថ្លៃប្រើប្រាស់ដោយគ្មានកំណត់ចំនួនបរិមាណប្រេងដែលបញ្ជូន។ យ៉ាងណាក៏ដោយ កិច្ចព្រមព្រៀងដៃគូនេះពិតជាដំណឹងល្អសម្រាប់ក្រុមហ៊ុនប្រេងអារ៉ាប៊ីសាអូឌីត Aramcon និងរដ្ឋាភិបាលអារ៉ាប៊ីសាអូឌីត ពិសេសរាជទាយាទបេន សាលម៉ាន។
ជាដំណឹងល្អសម្រាប់រាជទាយាទបេន សាលម៉ាន ព្រោះព្រះអង្គម្ចាស់កំពុងត្រូវការលុយដើម្បីចំណាយលើមហាគម្រោងសេដ្ឋកិច្ចក្នុងវិស័យផ្សេងទៀតក្រៅពីប្រេង។ ចូរកុំភ្លេចថា រាជាណាចក្រជង្រុកប្រេងដែលសេដ្ឋកិច្ចបានពឹងខ្លាំងលើចំណូលពីការលក់ប្រេងកំពុងជួបការលំបាកដោយសារតម្លៃប្រេងធ្លាក់ថ្លៃ និងវិបត្តិកូវីដ១៩។ ជាដំណឹងល្អសម្រាប់ក្រុមហ៊ុន Aramco ព្រោះតាំងពីតម្លៃប្រេងបានធ្លាក់ថ្លៃ ក្រុមហ៊ុនអារ៉ាប៊ីសាអូឌីតនាំប្រេងឆៅចេញទី១ ក្នុងលោកមួយនេះបានខាងបង់ទឹកប្រាក់ជិត ៥០ ០០០លានដុល្លារក្នុងឆ្នាំ ២០២០។ តាមក្រុមហ៊ុន Aramco កិច្ចព្រមព្រៀងដែលខ្លួនបានចុះហត្ថលេខាជាមួយក្រុមហ៊ុនអាមេរិកពេលនេះជាកិច្ចព្រមព្រៀងប្រេងមួយដ៏សំខាន់ខ្លាំងណាស់នៅក្នុងលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ