អ៊ីរ៉ង់សាកល្បងឧបករណ៍ចម្រើនធាតុអ៊ុយរ៉ានីញ៉ូមជំនាន់ថ្មីដែលអន្តរជាតិហាមឃាត់
នៅថ្ងៃសៅរ៍ទី ១០មេសា ២០២១នេះ អ៊ីរ៉ង់ បានដាក់ឱ្យដំណើរឬ ចាប់ផ្តើមធ្វើតេស្តឧបករណ៍ចម្រើនធាតុអ៊ុយរ៉ានីញ៉ូមជំនាន់ថ្មី ជាងមួយរយគ្រឿង។ ដែល ហាមឃាត់មិនឱ្យប្រើប្រាស់ដោយក្នុងកិច្ចព្រមព្រៀងនុយក្លេអ៊ែរអន្តរជាតិឆ្នាំ២០១៥ ឧបករណ៍ទំនើបជំនាន់ថ្មីនេះ អាចចម្រើនធាតុអ៊ុយរ៉ានីញ៉ូមបានលឿន និងក្នុងបរិមាណច្រើនខ្លាំងជាង ឧបករណ៍ចម្រើនធាតុជំនាន់ទីមួយឆ្ងាយណាស់។
ចុះផ្សាយនៅថ្ងៃ៖
ស្តាប់ - ០២:០៨
នៅក្នុងសុន្ទរកថាតាមវីដេអូ ចាក់ផ្សាយបន្តផ្ទាល់តាមកញ្ចក់ទូរទស្សន៍ជាតិ លោកប្រធានាធិបតីអ៊ីរ៉ង់ហាសាន់ រ៉ូហានី បានប្រកាសបើកសម្ពោធជាផ្លូវការការដាក់ឱ្យដំណើរការផលិកម្មចម្រើនធាតុអ៊ុយរ៉ានីញ៉ូម បណ្តាញឧបករណ៍ចម្រើនធាតុ ១៦៤ម៉ាស៊ីន ហៅកាត់ថា IR-6 នៅក្នុងមជ្ឈមណ្ឌលនុយក្លេអ៊ែរ Natanz និងបណ្តាញ ឧបករណ៍ចម្រើនធាតុឧស្ម័នអ៊ុយរ៉ានីញ៉ូម ៣០ ហៅ IR-5 ព្រមទាំងប្រកាសធ្វើតេស្តសាកល្បងដំណើរការរបស់ឧបករណ៍ចម្រើនធាតុអ៊ុយរ៉ានីញ៉ូមជំនាន់ថ្មីចុងក្រោយបំផុត IR-9ទៀត។
ឧបករណ៍ទាំងអស់នេះ សុទ្ធតែអាចចម្រើនធាតុអ៊ុយរ៉ានីញ៉ូមបានលឿនហើយក្នុងបរិមាណច្រើនជាងឧបករណ៍ចម្រើនធាតុអ៊ុយរ៉ានីញ៉ូមជំនាន់ទីមួយ ឆ្ងាយណាស់។ បើតាមអ្នកជំនាញវិស្វកម្មនៃអង្គការថាមពលបរមាណូអ៊ីរ៉ង់ ឧបករណ៍ចម្រើនធាតុអ៊ុយរ៉ានីញ៉ូមជំនាន់ថ្មី IR-6 និង IR-9 មានសមត្ថភាពចម្រើនធាតុអ៊ុយរ៉ានីញ៉ូមបានច្រើនជាង១០ និង៥០ដងលើសឧបករណ៍ជំនាន់ទីមួយដែលកិច្ចព្រមព្រៀងនុយក្លេអ៊ែរអន្តរជាតិក្រុងវីយ៉ែនឆ្នាំ២០១៥ បានចែងអនុញ្ញាតឱ្យអ៊ីរ៉ង់ប្រើ។ ក្នុងក្របខ័ណ្ឌនៃការស្រាវជ្រាវ និងអភិវឌ្ឍន៍ កិច្ចព្រមព្រៀងនុយក្លេអ៊ែរ ក៏បានកំណត់ឱ្យអ៊ីរ៉ង់អាចធ្វើតេស្តសាកល្បងឧបករណ៍ចម្រើនធាតុអុយរ៉ានីញ៉ូម ប្រភេទ IR-4 និង IR-5 និងក្នុងចំនួនមានកំណត់ទៀត និងហាមឃាត់មិនឱ្យអ៊ីរ៉ង់ធ្វើការសាកល្បងឧបករណ៍ចម្រើនធាតុអ៊ុយរ៉ានីញ៉ូមជំនាន់ក្រោយទេ។
បើតាមលោកប្រធានាធិបតីរ៉ូហានី ថ្ងៃសៅរ៍ទី ១០មេសានេះ ជាទិវាបច្ចេកវិទ្យានុយក្លេអ៊ែរជាតិ ហើយកម្មវិធីនុយក្លេអ៊ែរអ៊ីរ៉ង់មានទិសដៅសន្តិនិយមសុទ្ធសាធ។ ប៉ុន្តែសេចក្តីប្រកាស នេះ ផ្ទុយស្រលះនឹងអ្វីដែលអ៊ីរ៉ង់ព្រមព្រៀងជាមួយអន្តរជាតិ និងបានធ្លាក់មកចំពេលអ៊ីរ៉ង់កំពុងមានកិច្ចពិភាក្សា នៅទីក្រុងវីយ៉ែនប្រទេសអូទ្រីសជាមួយក្រុមប្រទេសហត្ថលេខីនៃកិច្ចព្រមព្រៀងនុយក្លេអ៊ែរអ៊ីរ៉ង់ (បារាំង អាល្លឺម៉ង់ អង់គ្លេស រុស្ស៊ី និងចិន) រកវិធីបញ្ចូលអាមេរិកមកក្នុងក្រុមវិញ។ ការពិភាក្សាដែលមានលទ្ធផលបែបស្ថាបនាផង។ ជាងនេះទៅទៀត កាលពីថ្ងៃសុក្រ ទី ៩ មេសា អ្នកទទួលខុសត្រូវអាមេរិក បានប្រកាសដោយមិនបញ្ចេញឈ្មោះថាវ៉ាស៊ីនតោនបានផ្តល់សំណើ ដោយប្រយោល យ៉ាងច្បាស់លាស់មួយដល់អ៊ីរ៉ង់ សម្រាប់ផ្តល់សន្ទុះដល់កិច្ចព្រមព្រៀងនុយក្លេអ៊ែរអ៊ីរ៉ង់ឡើងវិញ និងរង់ចាំកាយវិការដូចគ្នាមកពីខាងអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ