រដ្ឋមន្ត្រីការបរទេសអាមេរិក ទៅជួបនិយាយជាមួយអ៊ីស្រាអែល និងប៉ាឡេស្ទីន ពង្រឹងបទឈប់បាញ់
លោកអង់តូនី ប្លីងកិន រដ្ឋមន្ត្រីការបរទេសអាមេរិក បានធ្វើដំណើរទៅតំបន់ដើមបូព៌ា កាលពីថ្ងៃទី២៤ឧសភា។ កម្មវត្ថុនៃការធ្វើដំណើរនេះ គឺលោកនឹងទៅជួប ជាមួយថ្នាក់ដឹកនាំអ៊ីស្រាអែល ព្រមទាំងប៉ាឡេស្ទីន ដើម្បីរកវិធីពង្រឹងបទឈប់បាញ់ រវាងអ៊ីស្រាអែល និងក្រុមហាម៉ាសប៉ាឡេស្ទីន។ ជាបទឈប់បាញ់ ដែលមានលក្ខណៈផុយស្រួយបំផុត ខណៈដែលអំពើហិង្សាចលាចល នៅតែបន្តកើតមាន នៅទីក្រុងហ្សេរុយសាឡឹម និងនៅតំបន់ស៊ីហ្សកដានី។
ចុះផ្សាយនៅថ្ងៃ៖
ស្តាប់ - ០២:២១
នៅទីក្រុងហ្សេរុយសាឡឹម លោករដ្ឋមន្ត្រីការបរទេសអាមេរិក នឹងជួបនិយាយគ្នា ជាមួយលោកណេតាន់យ៉ាហ៊ូ នាយករដ្ឋមន្ត្រីអ៊ីស្រាអែល មុននឹងធ្វើដំណើរទៅកាន់ទីក្រុងរ៉ាម៉ាឡា ជួបជាមួយប្រមុខដឹកនាំអាជ្ញាធរប៉ាឡេស្ទីន លោកម៉ាសមូដ អាបាស។ បន្ទាប់មកទៀត លោកអង់តូនី ប្លីងកិន និងធ្វើដំណើរទៅជួបលោកអាប់ឌែល ហ្វាតាហ អាល់ស៊ីស៊ី ប្រធានាធិបតីអេហ្ស៊ីប។
កម្មវត្ថុនៃជំនួបទាំងនេះ ត្រូវបានក្រសួងការបរទេសអាមេរិក ប្រកាសឲ្យដឹងថា គឺលោករដ្ឋមន្ត្រីអាមេរិក មានបំណងរកវិធីពង្រឹង បទឈប់បាញ់ ដែលអ៊ីស្រាអែល បានយល់ព្រមទទួលយកជាមួយក្រុមហាម៉ាសនៅតំបន់ហ្កាហ្សា ដោយធ្វើយ៉ាងណា ឲ្យវាមានអាយុយូរអង្វែង។
គួរបញ្ជាក់ថា នេះគឺជាកម្មវត្ថុតូចស្តួចស្តើងបំផុត បើប្រៀបធៀប ទៅនឹងកម្មវត្ថុធំ គឺការឈានទៅកសាងសន្តិភាព រវាងអ៊ីស្រាអែល និង ប៉ាឡេស្ទីន។ នេះសបង្ហាញអំពីគោលនយោបាយការទូត ដើរដោយសន្សឹមៗ និងប្រុងប្រយ័ត្នរបស់រដ្ឋបាលលោកចូ បៃដិន។
យ៉ាងណាក៏ដោយ លោកអង់តូនី ប្លីងកិន បានបញ្ជាក់ថាសាជាថ្មីថា លោកគាំទ្រចំពោះដំណោះស្រាយ ទទួលស្គាល់រដ្ឋប៉ាឡេស្ទីនជាផ្លូវការ។ លោកអះអាងថា នេះគឺជាដំណោះស្រាយតែមួយគត់ ដើម្បីឈានទៅកសាងសន្តិភាពជារៀងរហូត។ លោកបានសង្កេតឃើញថា បទឈប់បាញ់ រវាងអ៊ីស្រាអែល និងក្រុមហាម៉ាសប៉ាឡេស្ទីន នៅតំបន់ហ្កាហ្សា គឺជាឱកាសដ៏ល្អ ដើម្បីបន្តបោះជំហានក្នុងកម្មវត្ថុកសាងសន្តិភាព។
គួរកត់សំគាល់ថា បើទោះបីមានបទឈប់បាញ់នៅតំបន់ហ្កាហ្សា មែនពិត តែបញ្ហាអំពើហិង្សាចលាចល បាតុកម្មតវ៉ា នៅតែមិនទាន់ស្ងប់ទេ នៅតំបន់ផ្សេងៗទៀត។ ជាក់ស្តែង កាលពីថ្ងៃចន្ទ ទី២៤ឧសភា មានករណីជនប៉ាឡេស្ទីន ម្នាក់បានយកកាំបិតចាក់ជនជាតិជ្វីហ្វអ៊ីស្រាអែល ឲ្យរបួសចំនួន២នាក់ នៅសង្កាត់ Cheikh Jarrah ក្នុងក្រុងហ្សេរុយសាឡឹម។ គឺសង្កាត់នេះហើយ ដែលអាជ្ញាធរអ៊ីស្រាអែល កំពុងតែរងចាំសេចក្តីសម្រេចរបស់តុលាការ អនុញ្ញាតឲ្យរឹបអូស ផ្ទះសំបែង របស់ជនជាតិប៉ាឡេស្ទីន ជាច្រើនគ្រួសារ។ ជនដៃដល់ ត្រូវបានសមត្ថកិច្ចបាញ់សម្លាប់នៅនឹងកន្លែង។ អំពើហិង្សានេះ សបង្ហាញឲ្យឃើញ អំពីកំហឹងពុះកញ្ជ្រោលរបស់ជនប៉ាឡេស្ទីនខ្លះ មានទៅលើរដ្ឋអ៊ីស្រាអែល និងប្រជាជនជ្វីហ្វជាទូទៅ បន្ទាប់ពីមានហេតុការណ៍ផ្ទុះសង្គ្រាមនៅតំបន់ហ្កាហ្សា កាលពីពេលថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ