អេហ្ស៊ីបប្រឹងសម្រុះសម្រួល ដើម្បីពង្រឹងបទឈប់បាញ់ និងការសហការគ្នារវាងអ៊ីស្រាអែល-ប៉ាឡេស្ទីន
១០ថ្ងៃ ក្រោយការចូលជាធរមាន នូវកិច្ចព្រមព្រៀងឈប់បាញ់ រវាងក្រុមហាម៉ាម៉ាស ប៉ាឡេស្ទីន និងកងទ័ពអ៊ីស្រាអែល មន្ត្រីការទូតអេហ្ស៊ីបនៅតែបន្តប្រឹងប្រែង សម្រុះសម្រួលភាគីទាំងសងខាង ដើម្បី ការពារកិច្ចព្រមព្រៀងដ៏ផុយស្រួយនេះ ឲ្យមានភាពរឹងមាំ។ អេហ្ស៊ីប ក៏កំពុងតែបើកផ្លូវចរចា សហការគ្នាផងដែរ រវាងភាគីពាក់ព័ន្ធ ដើម្បីកសាងតំបន់ហ្កាហ្សាឡើងវិញ បន្ទាប់ពីបានខ្ទេចខ្ទាំយ៉ាងដំណំ ក្រោមមីស៊ីលរបស់អ៊ីស្រាអែល។
ចុះផ្សាយនៅថ្ងៃ៖
ស្តាប់ - ០២:៥៣
យោងតាមលិខិតប្រកាសរបស់ខុទ្ទកាល័យ លោកនាយករដ្ឋមន្ត្រីអ៊ីស្រាអែល លោក Abbas Kamel ប្រធានស៊ើបការណ៍សំងាត់របស់អេហ្ស៊ីប បានមកដល់ក្រុងហ្សេរុយសាឡឹម នៅថ្ងៃអាទិត្យ ទី៣០ឧសភា ដើម្បីនិយាយជាមួយភាគីអ៊ីស្រាអែល ស្តីពីការពង្រឹង សហប្រតិបត្តិការរវាងប្រទេសទាំង២ នៅក្នុងដំណោះស្រាយតំបន់ហ្កាហ្សា។ នៅក្នុងជំនួបនេះ ភាគីទាំង២ បាននិយាយគ្នា អំពីការគូសវាសផែនការ ឈានទៅកសាងតំបន់ហ្កាហ្សាឡើងវិញ។ ភាគីអ៊ីស្រាអែល បានលើកឡើងផងដែរ អំពីការទាមទារឲ្យក្រុមហាម៉ាស នៅតំបន់ហ្កាហ្សា ប្រគល់យសាកសព និងចំណាប់ខ្មាំងជនជាតិអ៊ីស្រាអែល។ ប្រធានស៊ើបការណ៍សំងាត់អេហ្ស៊ីប ក៏នឹងបន្តដំណើរទៅជួបជាមួយ តំណាងអាជ្ញាធរប៉ាឡេស្ទីន ដើម្បីនិយាយគ្នា អំពីការផ្សះផ្សារបង្រួមបង្រួម រវាងក្រុម ហាម៉ាស និងក្រុមហ្វាតាស។
ដោយឡែក នៅទីក្រុងគែរ រដ្ឋធានីអេហ្ស៊ីបឯណោះ លោក Sameh Choukri រដ្ឋមន្ត្រីការបរទេសអេហ្ស៊ីប បានទទួលជួបលោក Gabi Ashkenazi ប្រមុខការបរទេសអ៊ីស្រាអែល នៅថ្ងៃអាទិត្យដែរ។ លោក Gabi Ashkenazi បានសរសេរលើ Twitter ថា ភាគីអ៊ីស្រាអែល មានបំណង និយាយឲ្យបានស៊ីជំរៅ ទាក់ទិននឹងយន្តការការពារបទឈប់បាញ់ ឲ្យមានភាពរឹងមាំ ចៀសវាងការផ្ទុះអាវុធជាថ្មីម្តងទៀត។ មេក្រុមហាម៉ាស ក៏នឹងទៅអេហ្ស៊ីប នៅរវាងប៉ុន្មានថ្ងៃទៀតផងដែរ។
គួរបញ្ជាក់ថា សង្គ្រាមផ្ទុះអាវុធ រវាងក្រុមហាម៉ាសប៉ាឡេស្ទីន និងកងទ័ពអ៊ីស្រាអែល ចាប់ពីថ្ងៃទី ១០ឧសភា បានបិទបញ្ចប់ទៅ នៅថ្ងៃទី២១ឧសភា បន្ទាប់ពីអេហ្ស៊ីប បានប្រឹងប្រែងបញ្ចុះបញ្ចូល ឲ្យមានបទឈប់បាញ់។ ខាងហ្កាហ្សាមានស្លាប់ ២៥៤នាក់ ក្នុងនោះកុមារ ៦៦នាក់ ចំណែកអ៊ីស្រាអែល ស្លាប់១២នាក់ ក្នុងនោះកុមារម្នាក់។ តំបន់ហ្កាហ្សា ដែលមានប្រជាជនប្រមាណ២លាននាក់ និងដែលមានជីវភាពក្រីក្រណាស់ទៅហើយ បានរងការខូចខាត យ៉ាងដំណំក្រោមគ្រាប់មីស៊ីលរបស់អ៊ីស្រាអែល។
ប្រធានាធិបតីអេហ្ស៊ីប បានប្រកាសសន្យាផ្តល់ប្រាក់ចំនួន ៥០០លានដុល្លារ ដើម្បីជួយកសាងតំបន់ហ្កាហ្សាឡើងវិញ។ ដូចគ្នាដែរ កាតា ក៏បានប្រកាសផ្តល់ជំនួន៥០០លានដុល្លារដែរ។ កាលពីថ្ងៃព្រហស្បតិ៍សប្តាហ៍កន្លងទៅ អង្គការសហប្រជាជាតិ បានអំពាវនាវ ប្រមូលថវិកាចំនួន៩៥លានដុល្លារ ដើម្បីជួយប្រជាជនប៉ាឡេស្ទីន។
ដោយឡែក សហរដ្ឋអាមេរិក បានប្រកាសផ្តល់ប្រាក់ចំនួន៥.៥លានដុល្លារ ដើម្បីជួយប្រជាជននៅតំបន់ហ្កាហ្សាជាបន្ទាន់ បន្ថែមពីលើប្រាក់សន្យា ចំនួន៧៥លានដុល្លារ សម្រាប់ជួយប្រជាជនប៉ាឡេស្ទីនទាំងមូល។ តែយ៉ាងណាលោករដ្ឋមន្ត្រីការបរទេសអាមេរិក អះអាងថាប្រាក់ជំនួយទាំងនេះ គឺគេមិនអាចបណ្តោយ អោយធ្លាក់ចូលហោប៉ៅ ក្រុមហាម៉ាសជាដាច់ខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ