នាយករដ្ឋមន្ត្រីលីបង់ បោះបង់សំណើរៀបចំរដ្ឋាភិបាលថ្មី
ថ្ងៃព្រហស្បតិ៍ នាយករដ្ឋមន្ត្រីលីបង់ សាដ ហារីរី បោះបង់សំណើរៀបចំរដ្ឋាភិបាលថ្មី។ លោកថាមិនអាចរៀបចំគណៈរដ្ឋមន្ត្រីថ្មីតាមសំណើរបស់ប្រធានាធិបតីបានទេ។ ភ្លាមៗ សហរដ្ឋអាមេរិក បារាំង និងអង្គការសហប្រជាជាតិ បានសម្តែងក្តីសោកស្តាយចំពោះទង្វើអសកម្មរបស់ថ្នាក់ដឹកនាំនយោបាយលីបង់ ហើយប្រទេសមហាធំៗ ជំរុញទាមទារលីបង់ត្រូវរកមធ្យោបាយរៀបចំរដ្ឋាភិបាលឲ្យបានឆាប់ ដើម្បីដោះស្រាយវិបត្តិនយោបាយ និងសេដ្ឋកិច្ចដែលកំពុងតែធ្លាក់ដុនដាប ជាពិសេសបញ្ហាជំងឺរាតត្បាតកូវីដ១៩។
ចុះផ្សាយនៅថ្ងៃ៖
ស្តាប់ - ០២:១៥
លីបង់ គ្មានរដ្ឋាភិបាលដឹកនាំច្បាស់លាស់ច្រើនខែមកហើយ។ លោក សាដ ហារីរី កាន់តំណែងនាយករដ្ឋមន្ត្រី ចំនួនបីដង និងដែលត្រូវប្រជាពលរដ្ឋបាតុកម្មទាមទារទម្លាក់ពីតំណែង ប៉ុន្តែប្រធានាធិបតីបានជ្រើសតាំងលោក ហារីរី ឲ្យបង្កើតរដ្ឋាភិបាលថ្មីម្តងទៀត។ តែ ៩ខែមកហើយ គ្មានបានផលសោះ។
គួរជ្រាបថា មុនលោក សាដ ហារីរី គឺលោក Moustapha Adib ដែលត្រូវតែងតាំងបន្ទាប់ពីព្រឹត្តិការណ៍ផ្ទុះនៅកំពង់ផែលីបង់ នោះ ក៏បរាជ័យ មិនអាចបង្កើតរដ្ឋាភិបាលថ្មីបានដែរ។ អាស្រ័យហេតុនេះ ស្ថានការណ៍លីបង់ សព្វថ្ងៃ យ៉ាប់យឺន ស្មុគស្មាញខ្លាំង។ អ្នកនយោបាយប្រកាន់និន្នាការខុសគ្នា និងសាសនាចម្រុះគ្នា គិតតែប្រយោជន៍បក្សពួកខ្លួន ហើយប្រជាពលរដ្ឋលែងទុកចិត្តអ្នកនយោបាយ និងចោទពួកថ្នាក់ដឹកនាំ ថាពុករលួយស៊ីរូង។
លោក សាដ ហារីរី ប្រកាសផ្សាយនៅទូរទស្សន៍ក្នុងស្រុក ថាមិនអាចបង្កើតរដ្ឋាភិបាល តាមសំណើរបស់ប្រធានាធិតីបាន ព្រោះបើធ្វើតាមចិត្តរបស់ប្រមុខរដ្ឋ គឺលោកមិនអាចដឹកនាំប្រទេស និងមិនអាចកែទម្រង់តាមយុទ្ធសាស្ត្ររបស់ខ្លួន។ ដូច្នេះមានតែលោកសុំបោះបង់ចោលការបង្កើតរដ្ឋាភិបាលថ្មីនេះ។
ពីក្រុងវ៉ាស៊ីនតោន ប្រមុខការទូតអាមេរិក លោក អង់តូនី ប្លីងកិន សម្តែងក្តីខកចិត្ត និងចាត់ទុកថា ខាតពេលអស់៩ខែ ចោលទទេ។ ទន្ទឹមនឹងគ្នានេះ រដ្ឋមន្ត្រីការបរទេសអាមេរិក ក៏អំពាវវនាវឲ្យថ្នាក់ដឹកនាំនយោបាយលីបង់ គួរទម្លាក់គំនិតនិន្នាការនយោបាយខុសៗ ទុកមួយឡែកសិន ហើយនាំគ្នាដោះស្រាយបញ្ហាជាតិ ចំពោះមុខ។
ចំណែកបារាំងវិញ ប្រមុខការទូត Jean-Yves Le Drian យល់ថា ការណ៍នេះ បង្ហាញពីអសមត្ថភាពរបស់អ្នកនយោបាយលីបង់ ហើយ នេះជាទង្វើបំផ្លាញខ្លួនឯង។
បើតាមរដ្ឋមន្ត្រីការបរទេសបារាំង ប្រធានាធិបតី ម៉ាក្រុង ដែលស្ទុះស្ទារខ្លាំងក្នុងដំណោះស្រាយលីបង់ គឺនឹងរៀបចំសន្និសីទអន្តរជាតិ ជាថ្មីម្តងទៀត ដើម្បីរកដំណោះឲ្យលីបង់ នៅថ្ងៃ៤សីហា ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ