ប្រធានាធិបតីអាមេរិកទទួលជួបស្តេចហ្សកដានីមុនប្រមុខដឹកនាំអារ៉ាបផ្សេងៗ
ព្រះមហាក្សត្រ អាប់ដាឡា ស្តេចប្រទេសហ្សកដានី កំពុងបំពេញទស្សនកិច្ចចំនួនបីសប្តាហ៍នៅសហរដ្ឋអាមេរិក។ កម្មវិធីដ៏សំខាន់ជាងគេគឺជំនួបជាមួយប្រធានាធិបតីអាមេរិក លោក ចូបៃដិន នៅថ្ងៃចន្ទទី ១៩កក្កដា២០២១នេះតែម្តង។ ស្តេចអាប់ដាឡា ហ្សកដានី ជាប្រមុខដឹកនាំអារ៉ាបដំបូងគេបង្អស់ដែលប្រធានាធិបតីអាមេរិកអាណត្តិថ្មី ទទួលជួបនៅសេតវិមាន។ ពិតជាជំនួបប្រកបដោយនិម្មិតរូបខ្លាំងណាស់ ព្រោះហ្សកដានីសូវមានទំនាក់ទំនងល្អទេជាមួយរដ្ឋបាលអាមេរិកមុន។
ចុះផ្សាយនៅថ្ងៃ៖
ស្តាប់ - ០២:០២
បួនឆ្នាំកន្លងមកនេះ ស្តេចអាប់ដាឡាហ្សកដានី មានជំហរប្រឆាំងយ៉ាងមុះមុតនឹងផែនការសន្តិភាព ដើម្បីបិទបញ្ចប់ជម្លោះអ៊ីស្រាអែល-ប៉ាឡេស្ទីន ដែលស្នើឡើងដោយរដ្ឋបាលលោកដូណាល់ត្រាំ។ ផ្ទុយពីបណ្តាមេដឹកនាំនៃប្រទេសអារ៉ាប់ភាគច្រើន ជាពិសេសប្រទេសនៅតំបន់ឈូងសមុទ្ទពែក្ស ព្រះអង្គម្ចាស់ អាប់ដាឡា យល់ថាគំនិតផ្តួចផ្តើមរកសន្តិភាពឱ្យតំបន់ដើមបូព៌ារបស់រដ្ឋបាលអាមេរិកមុន អាចនឹងប៉ះពាល់ដល់តួនាទីជាអ្នកការពារវិហារអ៊ីស្លាម នៅក្រុងហ្សេរុយសាឡិម ដែលជាទីសក្ការៈបំផុតទីបីរបស់សាសនាអ៊ីស្លាមផង និងអាចធ្វើឱ្យប្រទេសហ្សកដានីផ្ទាល់តែម្តងជួបបញ្ហា ព្រោះប្រជាពលរដ្ឋហ្សកដានីពាក់កណ្តាល មានដើមកំណើតជាប៉ាឡេស្ទីន។
ប៉ុន្តែពេលនេះ សហរដ្ឋអាមេរិកក្រោមការដឹកនាំរបស់លោក ចូ បៃដិន បានទទួលស្វាគមន៍ ស្តេចហ្សកដានី នៅសេតវិមានមុនគេ មុនមេដឹកនាំនៃប្រទេសអារ៉ាប់ទាំងឡាយផង និងជាពិសេសមុនទទួលនាយករដ្ឋមន្ត្រីអ៊ីស្រាអែលទៅទៀត។ នេះសបញ្ជាក់ឱ្យឃើញថា លោកចូ បៃដិន បានផ្តល់តម្លៃពិសេសដល់ហ្សកដានី ដែលកាលពីខែមេសាបានប្រកាសកម្ចាត់បានផែនការធ្វើរដ្ឋប្រហារបានទាន់ពេលវេលាផង។
ក្នុងក្រសែភ្នែកសេតវិមាន ហ្សកដានីគឺជាដៃគូសន្តិសុខផង និងជាសម្ព័ន្ធមិត្តផង។ សម្ព័ន្ធមិត្ត ដែលត្រូវយកចិត្តថែថួនជាងគេបើប្រៀបទៅនឹងបណ្តាប្រទេសអារ៉ាប់ដទៃ សម្រាប់ពេលនេះ។
ចំពោះហ្សកដានីវិញ ជំនួបនេះជាការពង្រឹងអំណាចនយោបាយរបស់ស្តេចអាប់ដាឡា។ ហើយស្តេចអាប់ដាឡា សង្ឃឹមទៀតថានឹងអាចទាញប្រយោជន៍សេដ្ឋកិច្ចពីទស្សនកិច្ចនៅអាមេរិក។ ហ្សកដានីចង់សុំឱ្យសហរដ្ឋអាមេរិកពន្យារផែនការផ្តល់ជំនួយ៥ឆ្នាំ ដែលនឹងត្រូវផុតឱសានវាទនៅឆ្នាំក្រោយ។ មានសេដ្ឋកិច្ចទន់ខ្សោយស្រាប់ផង វិបត្តិកូវីដ១៩ បានមកកាត់ចំណូលរដ្ឋបានមកពីវិស័យទេសចរណ៍ មួយជាន់ទៀត។ ហើយមានតែអាមេរិកទេ ដែលជាប្រភពផ្គត់ផ្គង់ជំនួយខ្លាំងគេរបស់ហ្សកដានី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ