អ៊ីរ៉ង់សម្ភោធស្ថានីយ៍ស្តុកប្រេងថ្មី ដើម្បីងាយស្រួលនាំប្រេងចេញ គេចចេញពីច្រកសមុទ្រអកម៉ូស
ប្រធានាធិបតីអ៊ីរ៉ង់ ហាសាន់ រូហានី បានបើកសម្ភោធ ស្ថានីយ៍ស្តុកប្រេងឆៅ ថ្មីមួយកន្លែង កាលពីថ្ងៃព្រហស្បតិ៍ ទី២២កក្កដា។ យោងតាមការអះអាង របស់លោកប្រធានាធិបតីអ៊ីរ៉ង់ ស្ថានីយថ្មី ដែលស្ថិតនៅភាគខាងត្បូង នៅលើឆកសមុទ្រអូម៉ង់នេះ នឹងជួយឲ្យអ៊ីរ៉ង់ អាចនាំប្រេងចេញ យ៉ាងងាយស្រួល ដោយមិនបាច់ឆ្លងកាត់ ច្រកសមុទ្រអកមូស ដែលតូចចង្អៀត និងដែលមាននាវាចម្បាំងអាមេរិក យាមល្បាតជាប្រចាំ។
ចុះផ្សាយនៅថ្ងៃ៖
ស្តាប់ - ០២:៥៣
ថ្ងៃនេះគឺជាថ្ងៃចារក្នុងប្រវត្តិសាស្ត្រអ៊ីរ៉ង់ ព្រោះចាប់ពីពេលនេះទៅ អ៊ីរ៉ង់នឹងលែងបារម្ភ ខ្លាចមានបញ្ហាអាក់ខាន ក្នុងការនាំប្រេងឆៅ ទៅលក់នៅបរទេសទៀតហើយ ក្នុងករណីមានជម្លោះ វិវាទណាមួយកើតឡើង។ នេះគឺជាការលើកឡើង របស់លោក ហាសាន់ រូហានី ប្រធានាធិបតីអ៊ីរ៉ង់ ក្នុងឱកាសសម្ភោធ ដាក់ឲ្យប្រើប្រាស់ ស្ថានីយ៍ស្តុកប្រេងឆៅថ្មីមួយ ស្ថិតនៅកំពង់ផែJask ជាប់មាត់សមុទ្រអូម៉ង់ ភាគខាងត្បូងអ៊ីរ៉ង់។
យោងតាមរដ្ឋាភិបាលអ៊ីរ៉ង់ ស្ថានីយ៍ស្តុកប្រេងឆៅថ្មីនេះ ត្រូវបានចំណាយពេលសាងសង់ រយៈពេល២ឆ្នាំ ដោយចំណាយប្រាក់អស់ ប្រមាណ២ពាន់លានដុល្លារ។ លោកប្រធានាធិបតីអ៊ីរ៉ង់ អះអាងថា ជាមួយនឹងស្ថានីយ៍ថ្មីនេះ គឺអ៊ីរ៉ង់ នឹងចំណេញការធ្វើដំណើរដឹកប្រេងតាមកប៉ាល់ បានច្រើនថ្ងៃ បើប្រៀបធៀបទៅនឹង ស្ថានីយ៍ស្តុកប្រេងចាស់ ដែលស្ថិតនៅកំពង់ Kharg ក្នុងឈូងសមុទ្រពែក្ស។ ជាងនេះទៀត ចាប់ពីពេលនេះទៅ គឺនាវាដឹកប្រេងរបស់អ៊ីរ៉ង់ នឹងមិនចាំបាច់ ឆ្លងកាត់ច្រកសមុទ្រអកម៉ូស ដែលតូចចង្អៀត និងដែលមាននាវាចម្បាំងអាមេរិក នៅចល័តយាមនោះទេ។
ដោយឡែក ថ្វីបើរដ្ឋាភិបាលអ៊ីរ៉ង់ អះអាងថា ចង់នាំប្រេងចេញ តាមរយៈស្ថានីយ៍ថ្មីនេះ ឲ្យបាន ១លានធុងបារីលក្នុងមួយថ្ងៃ ក៏ប៉ុន្តែ បើផ្អែកតាមសំដីមន្ត្រីបច្ចេកទេស គឺស្ថានីយ៍ថ្មីនេះ មានសមត្ថភាពបញ្ចេញប្រេង បានត្រឹមតែ ៣៥ម៉ឺនធុងបារីលទេ ក្នុងមួយថ្ងៃ។
គួរបញ្ជាក់ថា ច្រកសមុទ្រសមុទ្រអកម៉ូស ដែលមានទទឹងប្រមាណតែ ៤០គីឡូម៉ែត្រ គឺច្រកដឹកប្រឹងឆៅចេញពីតំបន់ដើមបូព៌ា តែមួយគត់។ ប្រមាណ២ឆ្នាំចុងក្រោយនេះ ដោយសារតែបញ្ហាប្រឈមមុខដាក់គ្នាខ្លាំង រវាងអ៊ីរ៉ង់ និងសហរដ្ឋអាមេរិក មានការព្រួយបារម្ភច្រើនដង អំពីការផ្ទុះការវាយប្រហារដោយអាវុធ នៅច្រកសមុទ្រនេះ។
សូមរំលឹកផងដែរថា ពាក់ព័ន្ធនឹងសំណុំរឿងនុយក្លេអ៊ែរអ៊ីរ៉ង់ សហរដ្ឋអាមេរិក បានដាក់ទណ្ឌកម្មយ៉ាងធ្ងន់ទៅលើអ៊ីរ៉ង់ ដើម្បីកាត់ផ្តាច់ដង្ហើមសេដ្ឋកិច្ចអ៊ីរ៉ង់ ក្នុងវិស័យនាំប្រេងឆៅចេញទៅបរទេស។ តែយ៉ាងណា នៅតែមានអតិថិជនមួយចំនួន នៅតែបន្តទិញប្រេងពីអ៊ីរ៉ង់ ជាក់ស្តែង ស៊ីរី ចិន និងវ៉េណេស៊ុយអេឡាជាដើម។ សហរដ្ឋអាមេរិក ធ្លាប់បានចាបឃាត់នាវាដឹកប្រេងអ៊ីរ៉ង់ជាច្រើនគ្រឿង ដោយចោទថាបានបំពាននឹងទណ្ឌកម្ម។
សូមបញ្ជាក់ផងដែរថា យោងតាមតួលេខចុងក្រោយរបស់អង្គការ OPEP នៅខែមិថុនា អ៊ីរ៉ង់ផលិតប្រេងឆៅ បានចំនួន ២,៤៧លានធុងបារីល ក្នុងមួយថ្ងៃ។ ក្រសួងប្រេងអ៊ីរ៉ង់អះអាងថា គេនឹងបន្ថែមការផលិត ឲ្យបានមួយគុណជា៣ ដើម្បីពង្រឹងកម្លាំងយុទ្ធសាស្ត្ររបស់អ៊ីរ៉ង់។ ទីភ្នាក់ងារព័ត៌មានផ្លូវការអ៊ីរ៉ង់ បានចុះផ្សាយកាលពីថ្ងៃពុធថា ក្រៅឈានទៅដណ្តើមយកទីផ្សារប្រេងពិភពលោក តាមរយៈស្ថានីយ៍ស្តុកប្រេងថ្មីនេះ គឺវានឹងពង្រឹងការពារសន្តិសុខថាមពលរបស់អ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ