អ៊ីស្រាអែល បាញ់ប្លោងគ្រាប់ទៅលើតំបន់ហ្កាហ្សា ជាការឆ្លើយតបនឹងការបង្ហោះគោមភ្លើងបង្ករអគ្គីភ័យ
កងទ័ពអ៊ីស្រាអែល បានឲ្យដឹងថា នៅព្រឹកថ្ងៃអាទិត្យទី២៩សីហា ខ្លួនបានបាញ់ប្លោងគ្រាប់ កំទេចទីតាំងមូលដ្ឋា នរបស់ក្រុមហាម៉ាសប៉ាឡេស្ទីន នៅក្នុងតំបន់ហ្កាហ្សា។ ការបាញ់ផ្លោងនេះគឺជាការឆ្លើយតបផងដែរ ទៅនឹងការបង្ហោះគោមភ្លើង បង្កអគ្គីភ័យ ចេញពីតំបន់ហ្កាហ្សា មកកាន់ទឹកដីអ៊ីស្រាអែល។
ចុះផ្សាយនៅថ្ងៃ៖
ស្តាប់ - ០២:២៩
យោងតាមលិខិតប្រកាសមួយ របស់កងទ័ពអ៊ីស្រាអែល បានឲ្យដឹងថា កងទ័ពអ៊ីស្រាអែល បានបាញ់ប្លោងគ្រាប់ នៅវេលាព្រលឹមស្រាងៗ ថ្ងៃអាទិត្យទី២៩សីហា ទៅលើទីតាំងមួយកន្លែង របស់ក្រុមហាម៉ាស។ កងទ័ពអ៊ីស្រាអែល អះអាងថា ទីតាំងនោះគឺជាកន្លែងផលិត និងស្តុកអាវុធរបស់ក្រុមហាម៉ាស ព្រមទាំងជាច្រកចេញចូលទៅកាន់រូងក្រោមដី ដែលក្រុមនេះ បានជីកដើម្បីឆ្លងទៅកាន់ទីក្រុង Jabalia។
កងទ័ពអ៊ីស្រាអែល បានបញ្ជាក់ដែរថា នេះគឺជាការឆ្លើយតប ចំពោះការដែលក្រុមហាម៉ាស បានជំរុញ បំផុសបំផុលឲ្យប្រជាជនតំបន់ហ្កាហ្សា ធ្វើបាតុកម្មហឹង្សាចលាចល កាលពីថ្ងៃសៅរ៍ និងបានបង្ហោះគោមភ្លើងបង្កអគ្គីភ័យ មកខាងដីអ៊ីស្រាអែល។ យោងតាមក្រុមពន្លត់អគ្គីភ័យអ៊ីស្រាអែល គោមភ្លើងដែលត្រូវគេបង្ហោះចេញពីតំបន់ហ្កាហ្សា បានធ្លាក់បង្កជាភ្លើងឆេះព្រៃចំនួន២ទីតាំង នៅអ៊ីស្រាអែល។
ដោយឡែក អាជ្ញាធរប៉ាឡេស្ទីន មិនបានបញ្ជាក់ឲ្យដឹងទេ ថាការវាយប្រហាររបស់អ៊ីស្រាអែល នៅព្រឹកថ្ងៃអាទិត្យនេះ បានធ្វើឲ្យមានអ្នករបួស ឬស្លាប់ប៉ុន្មាននាក់។ ពីទីក្រុងវ៉ាស៊ីនតោន លោកនាយករដ្ឋមន្ត្រីអ៊ីស្រាអែល Naftali Bennett ដែលកំពុងតែបំពេញទស្សនកិច្ច បានលើកឡើងថា សម្រាប់លោក ទីតាំងដែលកងទ័ពអ៊ីស្រាអែលបានវាយកម្ទេច គឺជាទីតាំងរបស់ក្រុមហាម៉ាស ហើយការវាយប្រហារនេះ គឺវាឆ្លើយតបទៅនឹងផលប្រយោជន៍អ៊ីស្រាអែល។
គួរបញ្ជាក់ថា កាលពីថ្ងៃសៅរ៍ ប្រជាជនប៉ាឡេស្ទីន បានធ្វើបាតុកម្ម ដុតកង់ឡាននៅតំបន់ហ្កាហ្សា ក្បែរច្រកយាមរបស់ឆ្មាំព្រំដែនអ៊ីស្រាអែល ដើម្បីប្រឆាំងនឹងការរាំងខ្ទប់អស់រយៈពេល១៥ឆ្នាំ។ យោងតាមអ្នកកាសែតបារាំង AFP សមត្ថកិច្ចអ៊ីស្រាអែល បានប្រើគ្រាប់បែកផ្សែង និងបាញ់រះជាច្រើនគ្រាប់។ រដ្ឋមន្ត្រីសុខាភិបាលតំបន់ហ្កាហ្សា បានបញ្ជាក់ថា គ្រាប់កាំភ្លើងរបស់អ៊ីស្រាអែល កាលពីថ្ងៃសៅរ៍ បានបណ្តាលឲ្យកុមារប៉ាឡេស្ទីន អាយុ១២ឆ្នាំម្នាក់ស្លាប់ និងមានមនុស្សរបួសជាង៤០នាក់។
គួររំលឹកថា កាលពីខែឧសភា អ៊ីស្រាអែល និងក្រុមហាម៉ាស បានបាញ់ប្លោងគ្រាប់ដាក់គ្នាទៅវិញទៅមក រយៈពេល១១ថ្ងៃ បណ្តាលឲ្យស្លាប់២៦០នាក់ខាងហ្កាហ្សា និង១៣នាក់ខាងអ៊ីស្រាអែល។ ត្រូវបិទខ្ទប់រយៈពេល១៥ឆ្នាំ តំបន់ហ្កាហ្សាស្ថិតនៅក្នុងភាពក្រីក្រជាខ្លាំង ខណៈវិបត្តិជំងឺឆ្លងកូវីដ១៩ បានមកបន្ថែមការលំបាក។ នៅថ្ងៃអាទិត្យទី២៩សីហាដែរ អេហ្ស៊ីបបានបើកឡើងវិញ នូវច្រក Rafah ដែលជាច្រកតែមួយគត់ ដែលមិនស្ថិតក្រោមការត្រួតពិនិត្យរបស់អ៊ីស្រាអែល។ ច្រកនេះគឺជាដង្ហើមសេដ្ឋកិច្ច និងការដឹកទំនិញចេញចូលយ៉ាងសំខាន់ សម្រាប់តំបន់ហ្កាហ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ