អារ៉ាប៊ីសាអូឌីតបាញ់ស្ទាក់បានមីស៊ីលរបស់ពួកហ៊ូទីបាញ់ចេញពីយេម៉ែន
អារ៉ាប៊ីសាអូឌីតបានប្រកាសនៅថ្ងៃអាទិត្យទី ៥កញ្ញា២០២១នេះថា បានបាញ់ស្ទាក់មីស៊ីលចំនួនបី និងដ្រូន បង្ហោះចេញពីប្រទេសយេម៉ែន ពីសំណាក់ពួកឧទ្ទាមហ៊ូទី បានទាន់ពេលវេលា។ ប៉ុន្តែបំណែកគ្រាប់ បានបែកខ្ទាត ទៅប៉ះក្មេងពីរនាក់បណ្តាលឱ្យរងរបួស និងផ្ទះសម្បែងជាច្រើនខ្នងរងការខូចខាត។
ចុះផ្សាយនៅថ្ងៃ៖
ស្តាប់ - ០២:១៨
មីស៊ីលបាលីស្ទិកចំនួនបី និងដ្រូនបីគ្រឿងមានផ្ទុកបាញ់គ្រាប់បែកផង បានបាញ់ចេញពីប្រទេសយេម៉ែន សំដៅខេត្តភាគខាងកើតនិងក្រុងភាគខាងត្បូងរបស់អារ៉ាប៊ីសាអូឌីត តែអាជ្ញាធរអារ៉ាប៊ីសាអូឌីត បានបាញ់ស្ទាក់កម្ទេចបានមុន មិនឱ្យធ្លាក់ផ្ទុះទាន់។ ប៉ុន្តែ បំណែកគ្រាប់បានធ្លាក់ត្រូវចំលើក្មេងពីរនាក់ និងធ្វើឱ្យផ្ទះចំនួន១៤ខ្នងរងការខូចខាត។ នេះបើតាមអ្នកនាំពាក្យក្រសួងការពារជាតិអារ៉ាប៊ីសាអូឌីត ដែលពុំបានលម្អិតអំពីស្ថានភាពរបួសរបស់ក្មេងទាំងពីរនោះទេ។
ជាមួយនឹងពាក្យសន្យា ចាត់វិធានការតឹងរឹងដើម្បីការពារជីវិតពលរដ្ឋស៊ីវិល អ្នកទទួលខុសត្រូវអារ៉ាប៊ីសាអូឌីត បានច្រានចោលទាំងស្រុងសេចក្តីប្រកាសរបស់ពួកឧទ្ទាមយេម៉ែនហ៊ូទី។ អ្នកនាំពាក្យហ៊ូទី បានអះអាងនៅថ្ងៃអាទិត្យនេះដែរថា ការវាយប្រហារសំដៅលើទីតាំងជាយុទ្ធសាស្ត្រមួយចំនួន ដូចជាមណ្ឌលស្តុកប្រេង និងមូលដ្ឋានយោធារបស់អារ៉ាប៊ីសាអូឌីត បានសម្រេចទិសដៅដូចការគ្រោងទុក តែហ៊ូទីមិនបានបញ្ជាក់អំពីប្រភេទនៃការវាយប្រហារទេ។
ជាមេដឹកនាំសម្ព័ន្ធអន្តរជាតិ អារ៉ាប៊ីសាអូឌីត បានចូលធ្វើអន្តរាគមន៍យោធាជួយរដ្ឋាភិបាលយេម៉ែន ដើម្បីធ្វើសង្គ្រាមប្រឆាំងនឹងពួកឧទ្ទាមហ៊ូទី តាំងពីឆ្នាំ២០១៥មក។ ហើយពួកហ៊ូទី ដែលគាំទ្រដោយអ៊ីរ៉ង់ ជាគូសត្រូវនឹងអារ៉ាប៊ីសាអូឌីត តែងតែដៅការវាយប្រហារមីស៊ីសឬដ្រូន មកលើអារ៉ាប៊ីសាអូឌីត ជាញឹកញយ ជាពិសេសតំបន់ប៉ែកខាងកើតប្រទេស ដែលជាបណ្តុំរចនាសម្ព័ន្ធប្រេងដ៏សំខាន់របស់អារ៉ាប៊ីសាអូឌីតតែម្តង។ ការវាយប្រហារកាលពីខែកញ្ញា២០១៩ ពីរឆ្នាំមុន បានកាត់បន្ថយសកម្មភាពផលិតកម្មប្រេងពាក់កណ្តាលនិងអស់មួយរយៈ។
ការវាយប្រហារលើកនេះ កើតឡើងតែបួនថ្ងៃក្រោយការវាយប្រហារ លើអាកាសយានដ្ឋានអន្តរជាតិAbha ដោយប្រើដ្រូន និងតែប៉ុន្មានម៉ោងមុនការចូលកាន់តួនាទីរបស់អន្តរការីអង្គការសហប្រជាជាតិទទួលបន្ទុកនៅយេម៉ែន លោក Hans Grundberg។
បើតាមអង្គការសហប្រជាជាតិ សង្គ្រាមនៅយេម៉ែន បានបង្កឱ្យមានមនុស្សជាសិបពាន់នាក់ស្លាប់ និងភៀសខ្លួន ព្រមទាំងបង្កឱ្យមានវិបត្តិមនុស្សធម៌ដ៏អាក្រក់បំផុតនៅលើលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ