ហេតុអ្វីប្រជាជនលីបង់ធ្វើបាតុកម្ម ទាមទារឲ្យដកចៅក្រមដែលស៊ើបអង្កេតលើករណីផ្ទុះនៅកំពង់ផែបេរូត?
កំពុងផុងខ្លួនក្នុងវិបត្តិនយោបាយ វិបត្តិសេដ្ឋកិច្ច គ្មានប្រេង លីបង់កំពុងជួបហេតុការណ៍ចលាចលមួយទៀត នៅថ្ងៃព្រហស្បតិ៍ ទី ១៤តុលា បន្ទាប់ពី ជនប្រដាប់អាវុធបាញ់សម្លាប់បាតុករ ដែលទាមទារតវ៉ាឲ្យគេដកតំណែងចៅក្រមម្នាក់ ដែលស៊ើបអង្កេតលើករណីផ្ទុះនៅកំពង់ផែបេរូត។ ករណីផ្ទុះនៅកំពង់ផែបេរូតកាលពីខែសីហា ឆ្នាំ ២០២០ បានសម្លាប់មនុស្ស២១៤នាក់ និងរបួស ជាង ៦៥០០នាក់។
ចុះផ្សាយនៅថ្ងៃ៖
នៅលីបង់ បាតុកម្មនៅក្បែរតុលាការកំពូល ដើម្បីទាមទារឲ្យគេដកតំណែងចៅក្រមស៊ើបអង្កេត លើសំណុំរឿងផ្ទុះនៅកំពង់ផែបេរូតកាលពី ឆ្នាំ ២០២០ បានរាលដាលទៅជាការប្រឈមមុខដាក់ដ៏ហិង្សា និងការបាញ់សម្លាប់មនុស្ស ពីសំណាក់ក្រុមប្រដាប់អាវុធបិទមុខ។ តាមក្រសួងមហាផ្ទៃលីបង់ មនុស្ស៦នាក់បានស្លាប់ដោយគ្រាប់កាំភ្លើង។ កាកបាទក្រហមលីបង់រាប់ឃើញមានអ្នករបួស ៣០នាក់ ដោយសារគ្រាប់កាំភ្លើង ដែលបាញ់រះទៅលើបាតុករ កាលពីថ្ងៃព្រហស្បតិ៍ម្សិលមិញ។
រថក្រោះ និងទាហានលីបង់ត្រូវបានដាក់ពង្រាយបិទជុំជិតសង្កាត់ ដែលកើតមានចលាចល។ កងទ័ពបានព្រមានចាត់ការជនណាដែលហ៊ានបាញ់កាំភ្លើងមកលើសមត្ថកិច្ចជាមុន។
នៅក្នុងសេចក្តីថ្លែងការណ៍រួម ចលនាហេស្បូឡា និងអាម៉ាល់ ដែលជាអ្នកប្រកូកប្រកាសឲ្យគេធ្វើបាតុកម្ម កាលពីថ្ងៃម្សិលមិញ បានចោទប្រកាន់ ក្រុមខ្មាន់កាំភ្លើង ថា ជាអ្នកបាញ់រះទៅលើបាតុករ។ រដ្ឋមន្រ្តីមហាផ្ទៃលីបង់ក៏បញ្ជាក់ដែរថា ជនប្រដាប់អាវុធបិទមុខ ជាអ្នកបាញ់សម្លាប់បាតុករ។ នាយករដ្ឋមន្រ្តីថ្មីរបស់លីបង់ លោក Nagib Mikati បានអំពាវនាវឲ្យមានភាពស្ងប់ស្ងាត់ និងព្រមានរាល់ការប៉ុនប៉ងដែលចង់ឲ្យលីបង់ធ្លាក់ក្នុងអំពើហិង្សា មិនចេះចប់។
ទៅតាមការអំពាវនាវរបស់ក្រុមហេស្បូឡា និងសម្ព័ន្ធមិត្ត ឈ្មោះ Amal អ្នកគាំទ្រចលនាទាំងពីរ មកពីនិកាយឈីអ៊ីតបានធ្វើបាតុកម្ម នៅប៉ុន្មានម៉ោងក្រោយ តុលាការកំពូលទាត់ចោល ពាក្យបណ្តឹងរបស់មន្រ្តីហេស្បូឡា ដែលសុំឲ្យតុលាការដកចៅក្រមស៊ើបអង្កេត លើសំណុំរឿងផ្ទុះនៅកំពង់ផែ ដែលបានសម្លាប់មនុស្ស២១៤នាក់ និងបង្កឲ្យមានការខូចខាត សេដ្ឋកិច្ច រាប់ពាន់លានដុល្លារ កាលពីឆ្នាំមុន។
នៅថ្ងៃអង្គារ ចៅក្រមស៊ើបអង្កេត លោក តារេក ប៊ីតា Tarek Bitar បានចេញដីការចាប់ខ្លួន សមាជិកសភា និងអតីតមន្រ្តីហិរញ្ញវត្ថុ ដែលជាសមាជិករបស់ចលនាAmal សម្ព័ន្ធមិត្តរបស់ក្រុមហេស្បូឡាលីបង់។ រងការចោទប្រកាន់ថា ខ្ជីខ្ជារ ធ្វេសប្រហែស រហូតធ្វើឲ្យមានការផ្ទុះ ឆេះកំពង់ផែ ដែលស្តុកទុកខុសច្បាប់ សារធាតុនីត្រាតចំនួន ២៧៥០តោន អតីតមន្រ្តីរដ្ឋាភិបាលលីបង់ ជាច្រើននាក់បានបដិសេធការចោទប្រកាន់ មិនបង្ហាញខ្លួនតាមការកោះហៅរបស់ចៅក្រមស៊ើបអង្កេត និងបានទាមទារឲ្យតុលាការ ដកចៅក្រមស៊ើបអង្កេត មួយលើក ជាពីរលើក។ ចៅក្រមស៊ើបអង្កេតរឿងផ្ទុះនៅកំពង់ផែ បេរូតជាច្រើននាក់ត្រូវបានដកចេញពីតំណែង ប៉ុន្តែ នៅថ្ងៃព្រហស្បតិ៍ តុលាការកំពូលលីបង់សម្រេច រក្សាទុកឲ្យចៅក្រមស៊ើបអង្កេតលោក តារេក ប៊ីតា បន្តការងារ ក្នុងហេតុផលថា ពាក្យបណ្តឹងរបស់មន្រ្តីរដ្ឋាភិបាល គ្មានអំណះអំណាងតាមផ្លូវច្បាប់។
ភាគីបារាំង តាមរយៈ អ្នកនាំពាក្យក្រសួងការបរទេស ដែលបានផ្តល់ជំនួយ ក្នុងការស៊ើបអង្កេតរកអ្នកទទួលខុសត្រូវធ្វើឲ្យមានការផ្ទុះឆេះនៅកំពង់ផែបេរូតបានសំដែងក្តីកង្វល់ និងអំពាវនាវឲ្យគ្រប់ភាគី រក្សាភាពស្ងប់ស្ងាត់ និងអនុញ្ញាតឲ្យតុលាការធ្វើការរបស់ខ្លួន ដោយគ្មានការលូកដៃពីអ្នកនយោបាយ។
ទី ៤ សីហា ២០២០ ក្នុងពេលដែលពិភពលោកហាក់ទើបត្រដរខ្យល់បានបន្តិចពីជំងឺរាតត្បាតសកលកូវីដ១៩ លីបង់ត្រូវផុងលង់ក្នុងគ្រោះមហន្តរាយដ៏ធ្ងន់ធ្ងរមួយ។ កំពង់ផែ បេរូតបានផ្ទុះឆេះ រាលដាលបំផ្លាញសង្កាត់ជាច្រើនក្នុងរដ្ឋធានី បង្កឱ្យពលរដ្ឋ ២១៤នាក់ស្លាប់បាត់បង់ជីវិត និងជាង៦៥០០នាក់រងរបួស។ នៅយប់នោះភ្លាម អាជ្ញាធរលីបង់ បានអះអាងថាសារធាតុនីត្រាតចំនួន ២៧៥០តោន ស្តុកទុកចោលនៅកំពង់ផែតាំងពី៦ឆ្នាំ ដោយគ្មានវិធានការការពារ ជាដើមហេតុនាំឱ្យមានសោកនាដកម្មយ៉ាងដូច្នេះ។
ប៉ុន្តែមួយឆ្នាំក្រោយមក ពុំមានទេលទ្ធផលឬសេចក្តីសន្និដ្ឋាននៃការអង្កេត។ សម្រាប់មតិសាធារណៈលីបង់ នេះគឺដោយហេតុតែមានការជ្រៀតជ្រែកពីអ្នកនយោបាយ។
តើនរណាជាអ្នកបង្កឱ្យមានអគ្គីភ័យផ្ទុះឆេះឡើង ? ហេតុអ្វីបានសារធាតុដ៏គ្រោះថ្នាក់ដូចយ៉ាងនីត្រាតនេះ ត្រូវបានគេបំភ្លេច ចោលនៅកំពង់ផែបេរូត ? អ្នកដឹកនាំនយោបាយ អ្នកទទួលខុសត្រូវជាន់ខ្ពស់ប្រទេស ដឹងអ្វីខ្លះ ? មានតែសំណួរនិងចម្ងល់ តែគ្មានចម្លើយ។ បណ្តាជនលីបង់ភាគច្រើនសង្ស័យថា គ្មានថ្ងៃដែលគេដឹងចម្លើយទេ ហើយក៏គ្មានថ្ងៃដែលរកយុត្តិធម៌ឃើញដែរ។
ចៅក្រមអង្កេត តារេក ប៊ីតា Tarek Bitar ចង់ធ្វើការចោទប្រកាន់អតីតរដ្ឋមន្ត្រី និងមន្ត្រីជាន់ខ្ពស់មួយចំនួន តែតុលាការមិនអាចធ្វើកើតដោយពួកគេមានអភ័យឯកសិទ្ធិនយោបាយ និងតួនាទីជាអ្នកដឹកនាំប្រទេស។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ