អ៊ីរ៉ង់ធ្វើសមយុទ្ធយោធា បង្ហាញកម្លាំងសព្វាវុធ នៅច្រកសមុទ្រអកម៉ូស
កាលពីថ្ងៃអាទិត្យ ទី៧វិច្ឆិកាម្សិលមិញ កងទ័ពអ៊ីរ៉ង់ បានធ្វើសមយុទ្ធយោធា នៅច្រកសមុទ្រអកម៉ូស ដែលជាតំបន់យុទ្ធសាស្ត្រដ៏សំខាន់បំផុត នៃចរាចរណ៍ដឹកប្រេងឆៅអន្តរជាតិ។ ការធ្វើសមយុទ្ធបញ្ចេញកម្លាំងសព្វាវុធរបស់អ៊ីរ៉ង់ គឺបានធ្វើឡើង ប៉ុន្មានថ្ងៃ បន្ទាន់ពីអ៊ីរ៉ង់ បានប្រកាសថានឹងត្រឡប់ចូលតុចរចា ជាមួយក្រុមប្រទេសមហាអំណាចវិញ នៅក្នុងសំណុំរឿងនុយក្លេអ៊ែរ។
ចុះផ្សាយនៅថ្ងៃ៖
ស្តាប់ - ០២:១៧
លោក Mahmoud Mousavi អគ្គមេបញ្ជាការកងទ័ពជើងទឹកអ៊ីរ៉ង់ បានប្រកាសតាមទូរទស្សន៍រដ្ឋថា ការធ្វើសមយុទ្ធយោធា នៅក្នុងច្រកសមុទ្រអកម៉ូស ជាយឆ្នេរខាងអ៊ីរ៉ង់ គឺធ្វើឡើង នៅក្នុងកម្មវត្ថុ បង្ហាញកម្លាំងទ័ព ព្រមទាំងត្រៀមខ្លួនប្រយុទ្ធ ជាមួយសត្រូវមកពីគ្រប់ទិសទី។
សមយុទ្ធដែលមានឈ្មោះថា Zolfaqar-1400 នេះ ត្រូវបានប្រព្រឹត្តិធ្វើទៅនៅតំបន់ ចាប់ពីខាងកើត ច្រកសមុទ្រអកម៉ូស រហូតទៅដល់ភាគជើង ដែលជាប់មហាសមុទ្រឥណ្ឌា ព្រមទាំងនៅផ្នែកខ្លះ នៃសមុទ្រក្រហម ថែមទៀតផង។ រូបភាពផ្សាយតាមទូរទស្សន៍រដ្ឋ គេឃើញមាន ឧត្ថម្ភាគចក្រ រថពាសដែក ដ្រូន នាវាចម្បាំង និងនាវាប្រដេញជាច្រើនគ្រឿង ចូលរួមក្នុងសមយុទ្ធនេះ។
គួរបញ្ជាក់ថា ភាពតានតឹងនៅតំបន់ឈូងសមុទ្រពែក្ស បានចាប់ផ្តើមពុះកញ្ជ្រោលកាន់តែខ្លាំង រវាងសហរដ្ឋអាមេរិក និងអ៊ីរ៉ង់ តាំងតែពីឆ្នាំ២០១៨មក នៅក្រោយពេលដែលសហរដ្ឋអាមេរិក ដឹកនាំដោយលោកដូណាល់ ត្រាំ បានសម្រេចចិត្តដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់។ អ៊ីរ៉ង់ ដែលគិតថាអាមេរិកបានលេងខ្សែលើ បានចាប់ផ្តើម ដកថយពីកិច្ចព្រមព្រៀងម្តងបន្តិច និងបានងាកទៅចាប់ផ្តើម បន្ថែមការចំរាញ់ធាតុអ៊ុយរ៉ានីញ៉ូម។
ទើបតែនៅរវាងខែមេសាកន្លងទៅនេះ ដែលការចរចាចាប់ផ្តើម ដំណើរការឡើងវិញ យ៉ាងលំបាកលំបិន ក្រោមការប្រឹងប្រែងរបស់ក្រុមប្រទេសអឺរ៉ុប។ ក៏ប៉ុន្តែការចរចានេះ បានពើបនឹងឧបសគ្គថ្មីទៀត ក្រោយជ័យជំនះរបស់លោក Ebrahim Raïssi ដែលជាមនុស្សអភិរក្សនិយមជ្រុល បានឡើងមកធ្វើប្រធានាធិបតីអ៊ីរ៉ង់។ ភាគីអ៊ីរ៉ង់ បានទាមទារ ឲ្យសហរដ្ឋអាមេរិក ត្រូវតែដកទណ្ឌកម្មសេដ្ឋកិច្ចចោលទាំងអស់ ដើម្បីបង្ហាញពីឆន្ទៈចង់ចរចា។ កាលពីថ្ងៃ ទី៣វិច្ឆិកា លោក Ali Bagheri Kani តំណាងគណប្រតិភូរចរចារបស់ភាគីអ៊ីរ៉ង់ បានប្រកាសថា ការចរចានៅទីក្រុងវីយែន អាចចាប់ផ្តើមបាននៅថ្ងៃទី ២៩វិច្ឆិកាខាងមុខ។
សមយុទ្ធយោធារបស់អ៊ីរ៉ង់ នៅច្រកសមុទ្រអកម៉ូស គឺត្រូវបានគេតាមដាន យ៉ាងប្រុងប្រយ័ត្នបំផុត ព្រោះច្រកនេះ គឺជាច្រកចរាចរណ៍ដឹកប្រេងឆៅ ដ៏សំខាន់បំផុត។ ក្រៅអារ៉ាប៊ីសាអូឌីត អេមៀរ៉ាតអារ៉ាប់រួម ដែលនៅទល់មុខនោះ កងទ័ពអាមេរិក ក៏បានបញ្ជូននាវាចម្បាំងទៅយាមសន្តិសុខជាប្រចាំដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ