កងទ័ពអាមេរិក ចាប់បានអាវុធដឹកក្នុងនាវានេសាទ ដែលគេជឿថាអ៊ីរ៉ង់ បញ្ជូនទៅជួយក្រុមឧទ្ទាមហ៊ូទីនៅយេមែន
កងទ័ពជើងទឹកអាមេរិក ដែលសំចតនៅតំបន់ដើមបូព៌ា បានចាប់ស្ទាក់បាននាវានេសាទមួយគ្រឿង ដែលដឹកកាំភ្លើង ១៤០០ដើម និងគ្រប់កាំភ្លើងជាង២សែនគ្រាប់។ យោងតាមលិខិតប្រកាស របស់ទីបញ្ជាការកងទ័ពជើងទឹកអាមេរិក គេជឿថា នាវាដែលគេចាប់បាននេះ គឺបានចេញពីអ៊ីរ៉ង់ ដើម្បីដឹកអាវុធ យកទៅឲ្យក្រុមឧទ្ទាមហ៊ូទី នៅយេម៉ែន។
ចុះផ្សាយនៅថ្ងៃ៖
ស្តាប់ - ០២:៣៩
កាលពីថ្ងៃទី២០ធ្នូ នាវាកងពលទី៥ របស់ទ័ពជើងទឹកអាមេរិក បានស្ទាក់ចាប់នាវានេសាទមួយគ្រឿង ដែលគ្មានទង់ជាតិ នៅក្នុងតំបន់ភាគខាងជើងសមុទ្រអារ៉ាប៊ី។ នៅក្នុងនាវានេសាទនោះ មានបង្កប់ កាំភ្លើង AK-47 ចំនួន១៤០០ដើម និងគ្រាប់ចំនួន ២២៦៦០០គ្រាប់។ នេះបើយោងតាមលិខិតប្រកាស របស់ទីបញ្ជាការកងទ័ពជើងទឹកអាេមរិក នៅថ្ងៃទី២៣ធ្នូ។
យោងតាមប្រភពដដែល គឺគេជឿថានាវានោះ បានបើកចេញពីប្រទេសអ៊ីរ៉ង់ ឆ្ពោះទៅយេម៉ែន ដោយឆ្លងកាត់ច្រកផ្លូវដែនទឹកអន្តរជាតិ ដែលជាផ្លូវឆ្លងកាត់របស់នាវាដឹកអាវុធខុសច្បាប់។ មនុស្សចំនួន៥នាក់ ដែលស្ថិតនៅលើនាវានោះ អះអាងថាខ្លួនជាជនជាតិយេម៉ែន ហើយត្រូវបានកងទ័ពជើងទឹកអាមេរិក រៀបចំបញ្ជូនទៅកាន់ប្រទេសដើម មុននឹងពន្លិចនាវាចោលទៅក្នុងសមុទ្រ។
គួរបញ្ជាក់ថា ក្នុងឆ្នាំ២០២១នេះ នាវាកងពលទី៥ នៃកងទ័ពជើងទឹកអាេមរិក ដែលឈរជើងនៅប្រទេសបារ៉ែន បានចាប់ឃាត់អាវុធខុសច្បាប់ ចំនួន៨៧០០រួចមកហើយ។ សហរដ្ឋអាមេរិក បានចោទអ៊ីរ៉ង់ថា គឺជាអ្នកបញ្ជូនអាវុធ ទៅជួយក្រុមឧទ្ទាមហ៊ូទី ធ្វើសង្គ្រាមនៅយេម៉ែន។ យ៉ាងណាមិញ នៅក្នុងលិខិតប្រកាសរបស់កងទ័ពជើងទឹកអាមេរិក នៅថ្ងៃទី២៣ធ្នូ បានរំលឹកថា ការបញ្ជូន ផ្គត់ផ្គង់អាវុធទៅឲ្យក្រុមឧទ្ទាមហ៊ូទី ដោយផ្ទាល់ក្តី ដោយប្រយោលក្តី គឺជាអំពើរំលោភបំពាន នឹងសេចក្តីសម្រេចចិត្ត របស់អង្គការសហប្រជាជាតិ ហើយនឹងទៅរងការដាក់ទណ្ឌកម្ម ពីសហរដ្ឋអាមេរិក។
សង្គ្រាមនៅយេម៉ែន ផ្ទុះឡើងកាលពីឆ្នាំ២០១៤ នៅមិនទាន់រលត់នៅឡើយទេ។ អារ៉ាប៊ីសាអូឌីត ដែលដឹកនាំក្រុមសម្ព័ន្ធមិត្ត បានបង្កើនការទំលាប់គ្រាប់បែក នាប៉ុន្មានថ្ងៃចុងក្រោយនេះ ទៅលើព្រលានយន្តហោះក្រុងសាណា និងបន្ទាយផ្ទុកអាវុធ របស់ក្រុមឧទ្ទាមហ៊ូទី។ យ៉ាងណាមិញ ការវាយប្រហារលើព្រលានយន្តហោះក្រុងសាណា កាលពីថ្ងៃចន្ទដើមសប្តាហ៍នេះ បានធ្វើឲ្យប៉ះពាល់យ៉ាងខ្លាំង ដល់ការដឹកជញ្ជូនជំនួយមនុស្សធម៌ ទៅជួយប្រជាជនយេម៉ែន។
យោងតាមអង្គការសហប្រជាជាតិ គិតចាប់ពីឆ្នាំ២០១៤មក សង្គ្រាមនៅយេម៉ែន បានបណ្តាលឲ្យមនុស្សស្លាប់ ប្រមាណ៣៧៧០០០នាក់ ហើយដែលជាងពាក់កណ្តាល គឺស្លាប់ដោយផលវិបាកដោយប្រយោលដោយសារសង្គ្រាម ដូចជាជំងឺដង្កាត់ គ្រោះទុរភិក្ស គ្មានទឹកស្អាត គ្នាថ្នាំសង្កូវជាដើម។ កាលពីថ្ងៃទី២២ធ្នូ អង្គការកម្មវិធីស្បៀងអាហារពិភពលោក (PAM) បានអំពាវនាវស្វែងរកជំនួយសប្បុរសបន្ថែមទៀត ខណៈមានការបារម្ភកាន់តែខ្លាំងឡើង ថាប្រជាជនយេម៉ែននឹងប្រឈមនឹងគ្រោះទុរភិក្ស កាន់តែធ្ងន់ធ្ងរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ