លោកម៉ាក្រុងបញ្ជាក់ប្រាប់ប្រធានាធិបតីអ៊ីរ៉ង់ ពីភាពចាំបាច់នៃដំណោះស្រាយការទូត ក្នុងសំណុំរឿងនុយក្លេអ៊ែរ
លោកម៉ាក្រុងប្រធានាធិបតីបារាំង បាននិយាយទូរស័ព្ទ ជាមួយលោកអេប្រាហ៊ីម រ៉ៃស៊ី ប្រធានាធិបតីអ៊ីរ៉ង់ កាលពីថ្ងៃសៅរ៍ទី២៩មករា។ យោងតាមវិមានប្រធានាធិបតីបារាំង គឺលោកម៉ាក្រុង បានបញ្ជាក់ប្រាប់ទៅប្រធានាធិបតីអ៊ីរ៉ង់ថា ដំណោះស្រាយ ដ៏ល្អ និងតែមួយគត់នៃសំណុំរឿងនុយក្លេអ៊ែរ គឺជាដំណោះស្រាយការទូត ហើយលោកជឿថា វានឹងអាចទៅរួច។
ចុះផ្សាយនៅថ្ងៃ៖
ស្តាប់ - ០២:២៥
ក្នុងអំឡុងពេល ដែលក្រុមគណប្រតិភូចរចាសំណុំរឿងនុយក្លេអ៊ែរអ៊ីរ៉ង់ បានសម្រាក និងត្រលប់ទៅស្រុករៀងៗខ្លួន លោកម៉ាក្រុង បានឆ្លៀតទូរស័ព្ទទៅកាន់លោកប្រធានាធិបតីអ៊ីរ៉ង់ អេប្រាហ៊ីម រ៉ៃស៊ី កាលពីថ្ងៃសៅរ៍ទី២៩មករា។ ជាកិច្ចសន្ទនា ដែលលោកម៉ាក្រុង មានបំណងជំរុញ ឲ្យភាគីអ៊ីរ៉ង់ បង្ហាញជំហរ និងការតាំងចិត្តវិជ្ជមាន ដើម្បីឈានទៅដោះស្រាយវិបត្តិនុយក្លេអ៊ែរ ឲ្យបានឆាប់បំផុត។
យោងតាមវិមានអេលីហ្សេ លោកម៉ាក្រុង បានប្រាប់ទៅលោកអេប្រាហ៊ីម រ៉ៃស៊ី អំពីជំនឿចិត្តរបស់លោកទៅលើភាពចាំបាច់ នៃដំណោះស្រាយការទូត។ វាជាដំណោះស្រាយតែមួយ និងដ៏ល្អជាងគេ។ លោកប្រធានាធិបតីបារាំង បានធានាថា បារាំងនឹងរួមសហការជាមួយគ្រប់ភាគីផ្សេងទៀតនៃកិច្ចព្រមព្រៀង ដើម្បីធ្វើយ៉ាងណា ឲ្យការចរចាឈានទៅសម្រេចជោគជ័យ បង្ហាញលទ្ធផលជាក់ស្តែងក្នុងពេលឆាប់ៗ។
ដោយឡែក យោងតាមលិខិតប្រកាសរបស់វិមានប្រធានាធិបតីអ៊ីរ៉ង់វិញ ក្នុងពេលនិយាយទូរស័ព្ទ លោកអេប្រាហ៊ីម រ៉ៃស៊ី បានថ្លែងទៅកាន់លោកម៉ាក្រុង នូវឆន្ទៈចង់ដោះស្រាយបញ្ហា តែតោងតែភាគីម្ខាងទៀត បង្ហាញអាកប្បកិរិយាវិជ្ជមាន ធានាឲ្យអ៊ីរ៉ង់មានទំនុកចិត្តដែរ។
គួរបញ្ជាក់ថា ភាគីម្ខាងទៀត ដែលលោកអេប្រាហ៊ីម រ៉ៃស៊ី បានលើកឡើង គឺសំដៅទៅលើសហរដ្ឋអាមេរិក។ ការចរចា នៅទីក្រុងវីយែន ដើម្បីស្រោចស្រង់ កិច្ចព្រមព្រៀងនុយក្លេអ៊ែរអ៊ីរ៉ង់ បានចាប់ផ្តើមឡើងវិញ ដោយភាគីអឺរ៉ុប បានព្យាយាមអូសទាញ ឲ្យសហរដ្ឋអាមេរិក ចូលមកក្នុងកិច្ចព្រមព្រៀងនេះវិញ។ តែយ៉ាងណា ភាគីអ៊ីរ៉ង់ បានទាមទារ ថាដើម្បីអាចឈានទៅរកដំណោះស្រាយបាន គឺទាល់តែសហរដ្ឋអាមេរិក ដកទណ្ឌកម្មសេដ្ឋកិច្ចចេញពីអ៊ីរ៉ង់ជាមុនសិន ព្រោះសហរដ្ឋអាេមរិកខ្លួនឯង ជាអ្នកដើរចេញពីកិច្ចព្រមព្រៀង ហើយចាប់ផ្តើមមិនគោរពការសន្យា។ យ៉ាងណាក៏ដោយ យោងតាមប្រភពការទូត បានឲ្យដឹងថា ការចរចាកន្លងមកនេះ ហាក់កំពុងតែបត់ទៅរកផ្លូវត្រូវរ៉ូវគ្នាច្រើន។ វគ្គចរចានឹងចាប់ផ្តើមជាថ្មី នៅសប្តាហ៍ក្រោយនេះ។
គួរបញ្ជាក់ថា ក្រៅពីសំណុំរឿងនុយក្លេអ៊ែរ លោកម៉ាក្រុង បាននិយាយលើកឡើងជាមួយលោកប្រធានាធិបតីអ៊ីរ៉ង់ អំពីបញ្ហាវិបត្តិមួយចំនួននៅតំបន់ដើមបូព៌ាផងដែរ ដូចជាបញ្ហាយេម៉ែន និងលីបង់ជាដើម ដែលសុទ្ធតែមានពាក់ព័ន្ធជាមួយអ៊ីរ៉ង់។ លោកម៉ាក្រុងបានថ្លែងថ្កោលទោសចំពោះការវាយប្រហារទៅលើអេមៀរ៉ាតអារ៉ាប់រួម កាលពីពេលថ្មីៗនេះ។ លោកម៉ាក្រុង ក៏បានលើកឡើងផងដែរ អំពីករណីជនជាតិបារាំងម្នាក់ ឈ្មោះ Benjamin Brière ដែលត្រូវតុលាការអ៊ីរ៉ង់ កាត់ទោសឲ្យជាប់ពន្ធនាគារ៨ឆ្នាំ៨ខែ ពីបទឈ្លបយកការណ៍ និងឃោសនាប្រឆាំងរដ្ឋាភិបាលអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ