លោកម៉ាក្រុង រន្ធាន់ឲ្យអ៊ីរ៉ង់ ត្រូវតែប្រញាប់ចាប់យកឱកាសដ៏ល្អ ដើម្បីស្រោចស្រង់កិច្ចព្រមព្រៀងនុយក្លេអ៊ែរ
លោកប្រធានាធិបតីបារាំង អេម៉ានុយអែល ម៉ាក្រុង បានទូរស័ព្ទនិយាយជាមួយ លោក អេប្រាហ៊ីម រ៉ៃស៊ី ប្រធានាធិបតីអ៊ីរ៉ង់ កាលពីថ្ងៃសៅរ៍ទី១៩កុម្ភៈ។ នៅក្នុងកិច្ចសន្ទនានោះ លោកម៉ាក្រុង បានរន្ធាន់ឲ្យភាគីអ៊ីរ៉ង់ ត្រូវតែប្រញាប់ចាប់យកឱកាសដ៏ល្អនាពេលនេះ ដើម្បីស្រោចស្រង់កិច្ចព្រមព្រៀងនុយក្លេអ៊ែរ ខណៈដែលភាគីអាមេរិក បានបញ្ជាក់អំពីលទ្ធផលវិជ្ជមាន នៅក្នុងការចរចា នៅទីក្រុងវីយែន។
ចុះផ្សាយនៅថ្ងៃ៖
ស្តាប់ - ០២:១០
យោងតាមវិមានប្រធានាធិបតីបារាំង លោកអេម៉ានុយអែល ម៉ាក្រុង បាននិយាយទូរស័ព្ទជាមួយលោកអេប្រាហ៊ីម រ៉ៃស៊ី រយៈពេល១ម៉ោងកន្លះ។ នៅក្នុងកិច្ចសន្ទនានោះ លោកម៉ាក្រុង បានបញ្ជាក់ប្រាប់ទៅលើប្រធានាធិបតីអ៊ីរ៉ង់ អំពីភាពចាំបាច់ និងដ៏បន្ទាន់បំផុត ក្នុងការទទួលយកលក្ខខណ្ឌវិជ្ជមានទាំងឡាយ ដើម្បីស្រោចស្រង់កិច្ចព្រមព្រៀងនុយក្លេអ៊ែរ បើមិនចង់ឲ្យវាហួសពេលទេនោះ។
លោកម៉ាក្រុងបានលើកឡើងថា ការចរចាកន្លងមកនេះ គឺគ្រប់ភាគីទាំងអស់ បានព្យាយាមដោយការគោរពគ្នា ដើម្បីឈានទៅរកចំណុចប្រសព្វមួយ។ ដូច្នេះ អ៊ីរ៉ង់ ត្រូវតែឆក់យកឱកាសនេះ ដើម្បីស្រោចស្រង់កិច្ចព្រមព្រៀងនុយក្លេអ៊ែរ ឲ្យមានជីវិតរស់ឡើងវិញ ព្រោះវាជាប្រយោជន៍សម្រាប់អ៊ីរ៉ង់ និងសម្រាប់គ្រប់ភាគីទាំងអស់។
ដូចគ្នាដែរ លោកអូឡាហ្វ ស្ហុល ប្រមុខរដ្ឋាភិបាលអាល្លឺម៉ង់ បានថ្លែងនៅក្នុងកម្មវិធីសន្និសីទទីក្រុងមុយនីឆ កាលពីថ្ងៃសៅរ៍ម្សិលមិញថា ពេលវេលានេះ ជាពេលដែលអ៊ីរ៉ង់ ត្រូវតែទទួលយកការពិត ហើយអ៊ីរ៉ង់ត្រូវតែ ត្រូវតែប្រញាប់ទទួលយកលក្ខខណ្ឌ ដែលជាលទ្ធផលនៃការចរចានៅទីក្រុងវីយែន។ លោកប្រមុខរដ្ឋាភិបាលអាល្លឺម៉ង់ បានអះអាងជាថ្មីថា ប្រទេសលោកនឹងមិនសុខចិត្តឲ្យអ៊ីរ៉ង់ មានអាវុធនុយក្លេអ៊ែរជាដាច់ខាត។
គួរបញ្ជាក់ថា ការចរចានៅទីក្រុងវីយែន បានចាប់ផ្តើមឡើងវិញ ដោយមានអាមេរិកចូលរួមចរចា ដោយប្រយោល ជាមួយអ៊ីរ៉ង់។ តំណាងក្រុមចរចាអាេមរិក បានអះអាងថា លទ្ធផលនៃការចរចា ប៉ុន្មានថ្ងៃចុងក្រោយនេះ មានលក្ខណៈវិជ្ជមានច្រើនណាស់ ហើយដែលធ្វើឲ្យភាគីអាេមរិក ជឿថាអាចនឹងឈានទៅដល់ការព្រមព្រៀងគ្នា ប្រសិនបើភាគីអ៊ីរ៉ង់ បង្ហាញជំហរត្រឹមត្រូវច្បាស់លាស់មួយ។
ដោយឡែក លោក Hossein Amir-Abdollahian រដ្ឋមន្ត្រីការបរទេសអ៊ីរ៉ង់ ដែលមានវត្តមាននៅក្នុងសន្និសីទស្តីពីសន្តិសុខ នៅទីក្រុងមុយនីឆ បានលើកឡើងថា វាច្បាស់ណាស់ហើយ ដែលអ៊ីរ៉ង់ ចង់ឃើញគេដកទណ្ឌកម្មសេដ្ឋកិច្ចចេញពីប្រទេសខ្លួន ឲ្យបានឆាប់បំផុត។ ក៏ប៉ុន្តែទន្ទឹមគ្នានេះ អ៊ីរ៉ង់ ចង់បានការធានាជាក់ច្បាស់មួយ ពីភាគីផ្សេងទៀត ថាកិច្ចព្រមព្រៀងនេះ នឹងមិនរលាយដូចអំបិលត្រូវទឹកម្តងទៀត នៅពេលណាអាមេរិកចង់ប្តូរចិត្តជាថ្មីនៅថ្ងៃខាងមុខ។ ក្នុងន័យនេះ ភាគីអ៊ីរ៉ង់ ចង់ឲ្យមានការធានាការពារសុពលភាពកិច្ចព្រមព្រៀងនេះ កុំឲ្យរដ្ឋាភិបាលថ្មីណាមួយរបស់អាមេរិក អាចបំផ្លាញវាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ